ʼE Uga Tatou e Te ʼu Fono Ki He ʼu Gāue Lelei
1 Ko te ʼu faʼahi tāfito e lua ʼo tatatou tauhi, ko tatatou kau ki te ʼu fono ʼo te kokelekasio pea mo tatatou kau ki te fai faka mafola. ʼE ʼalutahi te ʼu faʼahi ʼaia. ʼE nā feʼugaʼaki. ʼE uga e te ʼu fono faka Kilisitiano te ʼu gāue lelei, te gāue lelei ʼaē ko te faka mafola ʼo te Puleʼaga pea mo te fai ʼo ni ʼu tisipulo. (Hep. 10:24) Kapau ʼe mole kei tou kau ki te ʼu fono, ʼe gata anai tatatou fai faka mafola koteʼuhi ʼe mole kei uga tatou ke tou fai te faʼahi ʼaia.
2 ʼI te ʼu fono ʼo te vāhaʼa, ʼe tou maʼu ai te ako fakalaumālie neʼe fakatuʼutuʼu moʼo uga ʼo tatou ke tou fai faka mafola. ʼE fakahā tuʼumaʼu ai te maʼuhiga ʼo te temi, ʼo uga ai tatou ke tou fakahā te logo ʼo te Tohi-Tapu ʼaē ʼe ina foaki te maʼuli ki te hahaʼi. ʼE fakaloto mālohiʼi ai tatou ke tou faʼa kātaki ʼi te gāue fai faka mafola. (Mat. 24:13, 14) ʼI tatatou fakaʼaogaʼi te ʼu fealagia ʼaē moʼo fai ʼo hatatou ʼu tali ʼi te ʼu fono, ʼe tou fakamāmāhani ai ʼi te fakahā ʼo tatatou tui ʼi muʼa ʼo te hahaʼi. (Hep. 10:23) Ko tatatou kau ki te Ako ʼo Te Minisitelio Faka Teokalatike, ʼe ko he akoʼi ʼaia ʼo tatou ke tou liliu ko he ʼu minisi faiva pea mo tou hikihiki tatatou ʼu faʼahiga faiako.—2 Tim. 4:2.
3 ʼE Uga Feafeaʼi Tatou e Te ʼu Fono Gāue Ke Tou Fai Faka Mafola: ʼE fakaloto mālohiʼi ia tatou fuli ke tou vakaʼi fakatomuʼa te ʼu alatike ʼo Te Minisitelio ʼo Te Puleʼaga. ʼE ko he faka fealagia ʼaia ke pipiki te ʼu manatu ʼaia ki totatou ʼatamai mokā tou kau ki te Fono Gāue, pea mo tou sio ki he ʼu faʼifaʼitaki ʼe fai mai muʼa. ʼI te gāue fai faka mafola, ʼe feala ke tou manatuʼi Te Minisitelio ʼo Te Puleʼaga, ʼo tou manatuʼi te ʼu faʼifaʼitaki ʼaē neʼe fai, pea ʼaki te faʼahi ʼaia ʼe tou faiva anai ʼi te fai faka mafola. Neʼe fai te faʼahi ʼaia e te tokolahi ʼi te ʼu kaugā fai faka mafola.
4 ʼI te hili ʼo te Fono Gāue, ʼe fai e ʼihi te ʼu fakatuʼutuʼu ke nātou gāue fakatahi ʼi te minisitelio. ʼE kei manatuʼi e te ʼu kaugā fai faka mafola te ʼu puani ʼaē ʼe tonu ke fakaʼaogaʼi ʼi te gāue fai faka mafola pea ʼe uga ai nātou ke nātou ʼahiʼahiʼi, koteʼuhi neʼe fakaloto mālohiʼi nātou e te ʼu fono ʼaia ke nātou kau ki te gāue fai faka mafola ʼi te vāhaʼa fuli.
5 ʼE mole ʼi ai he meʼa ʼe ina fetogi tatatou ʼu fono faka Kilisitiano, ʼaē ʼe tou fakatahitahi ai mo totatou ʼu kaugā fagona pea mo uga ai tatou ki te ʼu gāue lelei. Kapau ʼe tou loto ke fua lelei tatatou minisitelio, pea ʼe tonu ke tou kau tuʼumaʼu ki te ʼu fono ʼo te kokelekasio. ʼOfa pe ke tou fakahā tatatou loto fakafetaʼi ki te fakatuʼutuʼu taulekaleka ʼaē ʼe haʼu mai ia Sehova “ ʼo mole tou līaki ʼatatou ʼu fakatahi.”—Hep. 10:25.