ʼE Nātou Tuʼaniaʼi Takotou Puli!
1 ʼI ʼihi temi, ʼe feala ke tou tō ʼi he fono e tahi ʼo te kokelekasio peʼe laka age, ʼo tou manatu ‘ ʼe mole nātou tuʼaniaʼi anai taku puli; ʼe mole nātou tokagaʼi anai taku mole kau ki te fono.’ ʼE mole moʼoni te faʼahi ʼaia! Ohage ko te ʼu koga ʼo totatou sino, ʼe tou ʼaoga fuli ki te fakahaʼele ʼo te kokelekasio. (1 Ko. 12:12) Ko tatatou mole kau ki he fono ʼi te vāhaʼa ʼe feala ke lave kovi ki te maʼuli lelei ʼi te faʼahi fakalaumālie ʼo nātou ʼaē ʼe kau kiai. Kapau ʼe mole koutou kau ki he fono, koutou ʼiloʼi papau—ʼe nātou tuʼaniaʼi takotou puli!
2 ʼE Koutou ʼAoga ʼAupito: Neʼe holi mālohi ia Paulo ke fakatahi mo tona ʼu tēhina. ʼE ina fakamahino ia Loma 1:11, 12 tona tupuʼaga: “Ke ʼau foaki atu kia koutou he meʼa ʼofa fakalaumālie . . . ke ia koutou he fefakaloto mālohiʼaki, ʼo tahi lotomālohi ʼi te tui ʼa he tahi age, ʼaki takotou tui pea mo taku tui.” ʼO toe feiā aipe, ʼaki tatatou ʼu tali, tatatou ʼu akonaki ʼi te fono, pea mo tatatou kau kiai, ʼe tou tokoni ʼaupito ki tatatou fefakaloto mālohiʼaki ke hoko atu tatatou nofo agatonu.—1 Tes. 5:11.
3 ʼE mole koutou holi koa la ke koutou sio ki takotou ʼu tēhina mo tuagaʼane ʼi te ʼu fono ʼo te kokelekasio? Koutou fakalogo lelei ki tanatou ʼu tali, pea mo koutou leleiʼia tanatou fakahā ʼo tanatou tui. ʼE tokoni atu tanatou ʼu meʼa ʼofa fakalaumālie moʼo fakaloto mālohiʼi koutou. Kanapaula ʼe nātou pupuli ʼi te fono, ʼe koutou logoʼi anai ʼe puli te meʼa maʼuhiga. ʼE toe logoʼi feiā e te ʼu tēhina mo te ʼu tuagaʼane ʼo ʼuhiga mo koutou, mokā mole koutou kau ki te fono.
4 Te Maʼuhiga ʼo Te ʼu Fono: ʼI te tahi temi, neʼe talanoa fēnei Te Tule Leʼo ki te maʼuhiga ʼo te ʼu fono ki tatatou maʼuli fakalaumālie: “ ʼI te mālama ʼaenī ʼaē kua tahi ʼalu pea mo aga heʼeʼaoga, ko te kokelekasio faka Kilisitiano ʼe ko he holaʼaga fakalaumālie moʼoni . . . , ʼe ko he potu ʼe maʼu ai te tokalelei pea mo te ʼofa. Koia, koutou kau tuʼumaʼu ki te ʼu fono fuli.” (Te Tule Leʼo, ʼo te ʼaho 15 ʼo ʼAukusito 1993, pasina 11) ʼI te ʼaho fuli, ʼe tou tauʼi te ʼu ʼaluʼaga ʼe nātou fakaloto vaivaiʼi tatou ʼi te faʼahi fakalaumālie. Kapau ʼe mole tou nofo tokaga, pea ʼe feala ke lahi fau tatatou tokaga ki tatatou ʼu tuʼania, ʼo mole kei tou tokagaʼi te ʼu meʼa ʼaē ʼe maʼuhiga ʼi te faʼahi fakalaumālie. ʼE tou ʼaoga fuli moʼo fakaloto mālohiʼi ʼo tatou ke tou logo tahi pea mo faiva ʼi te tauhi ki te ʼAtua.—Hep. 10:24, 25.
5 ʼE maʼuhiga tatatou kau ki te ʼu fono. ʼI ʼihi temi, ʼe lagi tou mahahaki peʼe hoko fakafokifā mai he ʼu meʼa, ʼo mole feala ai ke tou kau ki te ʼu fono. Kae tou lotomālohi tuʼumaʼu ke tou kau ʼi te hahaʼi tokolahi ʼaē ʼe fakatahitahi moʼo vikiʼi ia Sehova!—Pes. 26:12.