Tou Fai Faka Mafola ʼAki Tatatou Aga ʼAē ʼe Lelei
1 ʼI te mālama ʼaenī ʼaē ʼe maʼuli faʼitaliha ai te hahaʼi, ʼe tokolahi te kau tūpulaga ʼe nātou maumauʼi tonatou maʼuli ʼo nātou fakaʼaogaʼi te toloke, mo nātou fai te ʼu aga heʼeʼaoga, mo agatuʼu, pea mo agamālohi. ʼI te tahi faʼahi, ʼe ko he meʼa fakafiafia tatatou sio ki te ʼu aga ʼaē ʼe lelei ʼa te kau tūpulaga ʼi te kokelekasio faka Kilisitiano, pea ʼe ko he meʼa matamatalelei ʼaia kia mata ʼo Sehova. ʼE ko he fakamoʼoni lelei ʼaia kia Sehova, pea ʼe feala ke ʼōmai ai ʼihi ki te moʼoni.—1 Pet. 2:12.
2 ʼE lahi te ʼu faʼifaʼitaki ʼe nātou fakahā mai, ko te ʼu aga ʼaē ʼe lelei ʼa te kau tūpulaga Kilisitiano, ʼe malave ʼaupito ki te hahaʼi ʼaē ʼe nātou sivisivi tatou. Neʼe ʼui fēnei e te fafine faiako ki tana kalasi katoa, ʼo ʼuhiga mo te kiʼi taʼahine Fakamoʼoni ʼa Sehova neʼe ina akoʼi, ko Sehova, te ʼAtua ʼo te kiʼi taʼahine ʼaia ʼe ko te ʼAtua moʼoni. Neʼe ina ʼui te faʼahi ʼaia he neʼe aga fakaʼapaʼapa tuʼumaʼu te kiʼi taʼahine. Neʼe faitohi te tahi faiako ki te Sosiete, ʼo ina ʼui fēnei: “ ʼE ʼau fia vikiʼi koutou ʼuhi ko te ʼu tūpulaga agalelei ʼaē ʼe kau ki tokotou lotu. . . . Ko te kau tūpulaga ʼaia ʼe ko he ʼu faʼifaʼitaki moʼoni. ʼE nātou fakaʼapaʼapa kia nātou ʼaē ʼe lalahi age, ʼe nātou agalelei, pea ʼe nātou teu fakaʼapaʼapa. Pea ʼe nātou mālama lelei ki te Tohi-Tapu! Ko te faka ʼuhiga moʼoni ʼaia ʼo te lotu!”
3 Ko te tahi fafine faiako neʼe ōfo ʼaupito ʼi te aga ʼaē ʼe lelei ʼa te kiʼi tama ʼe taʼu fitu ʼo tana kalasi, pea ʼe ko te Fakamoʼoni ʼa Sehova. Neʼe ina leleiʼia te agamālū pea mo te agalelei ʼa te kiʼi tama, ʼaē neʼe kehe ai mo te tahi ʼu kiʼi tama ʼo te kalasi. Neʼe toe ōfo foki ʼi tana agatonu ki tana lotu—neʼe mole mataku ia ʼi tona kehekehe mo te tahi ʼu tamaliki ako ʼuhi ko tana lotu. Neʼe mahino ki te fafine faiako, neʼe kua akoʼi te leʼo ʼo loto ʼo te kiʼi tama ʼaia, pea neʼe feala hana “fakakeheʼi te lelei pea mo te kovi.” (Hep. 5:14) Ki muli age, ko te faʼe ʼo te tama ʼaia neʼe ina ʼaʼahi tana fafine faiako, pea neʼe kamata ai te ako Tohi-Tapu. ʼAki te temi, neʼe papitema te fafine faiako pea neʼe liliu ki muli age ko he pionie temi katoa!
4 Neʼe fetogi te manatu ʼa te tūpulaga ʼi tana sio ʼaē ki te agalelei ʼa te finemui Fakamoʼoni ʼa Sehova ʼo tana faleako. Neʼe kehe moʼoni tana aga—neʼe agalelei, neʼe ako fakalelei, pea neʼe fakaʼapaʼapa tuʼumaʼu tana faʼahiga teuteu; tahi ʼaē meʼa, neʼe mole fakatahi mo te kau talavou ohage ko tona fai e te tahi ʼu finemui. Neʼe mahino kia ia, neʼe maʼuliʼi e te finemui ʼaia he ʼu pelesepeto faka Tohi-Tapu. Ko te talavou neʼe ina fai kia ia he ʼu fehuʼi ʼo ʼuhiga mo tana lotu pea neʼe ōfo ʼi te ʼu meʼa ʼaē neʼe ina fakahā age ki ai. Neʼe ina kamata ako ai te Tohi-Tapu, mole tuai pea neʼe papitema, pea ʼaki te temi neʼe kau ki te selevisi pionie pea mo te selevisi ʼi te Petele.
5 Kapau ko koutou ko he kau tūpulaga ʼe koutou fia fakahā he faʼifaʼitaki lelei ki ʼihi, pea koutou tokaga tuʼumaʼu ki takotou aga ʼi te ʼu ʼaluʼaga fuli pe. ʼAua naʼa koutou tuku takotou nofo tokaga ʼi takotou tali te ʼu aga, mo te ʼu manatu, pea mo te faʼahiga maʼuli ʼo te mālama ʼaenī. Koutou faiga ke lelei tuʼumaʼu takotou ʼu palalau, mo takotou faʼahiga teu, pea mo te gaohi ʼo tokotou ʼulu, pea ʼaua naʼa koutou fai pe ʼi te temi ʼaē ʼe koutou kau ai ki te minisitelio pea mo te ʼu fono ʼo te kokelekasio, kae koutou toe fai foki te faʼahi ʼaia mokā koutou ʼolo ki te faleako peʼe ʼi takotou ʼu temi fakafiafia. (1 Tim. 4:12) ʼE koutou fiafia moʼoni anai mokā fia ʼiloʼi anai e he tahi ia te moʼoni, he neʼe koutou faiga ke ‘mū tokotou mālama’ ʼaki takotou aga ʼaē ʼe lelei.—Mateo 5:16.