ʼE Gigila Te Kau Tūpulaga Ohage Ko He ʼu Mālama
1. ʼE fakahā feafeaʼi ʼi te Tohi-Tapu ʼe ʼiloga kehe anai te kau Kilisitiano, pea ʼe faka ʼuhiga feafeaʼi te ʼu palalau ʼaia ki te kau tūpulaga Kilisitiano iā ʼaho nei?
1 Neʼe ʼui fēnei e Sesu ki tana ʼu tisipulo: “Ko koutou te malama o te malamanei.” (Mat. 5:14, 16) ʼE ʼiloga kehe anai te ʼu tisipulo ʼa Sesu, ohage pe ko he kolo ʼe tuʼu ʼi he fuga moʼuga, pea ʼe tapa kiai te mālamagia ʼo te laʼā. Iā ʼaho nei, tokolahi te kau tūpulaga ʼe nātou “gigila ohage ko he ʼu mālama ʼi te malamanei” ʼuhi ko tanatou aga pea mo tanatou faʼafai ʼi te fai faka mafola.—Filp. 2:15, MN; Mala. 3:18.
2. Ko te ʼu ʼaluʼaga fea ʼaē ʼe feala ai ke koutou fakaʼaogaʼi moʼo fai faka mafola ki te kau faiako pea mo nātou ʼo te kalasi?
2 ʼI Te Faleako: ʼE lava feafeaʼi hakotou fai faka mafola ʼi te faleako mo kapau ʼe gafua te faʼahi ʼaia? Ko ʼihi kau tūpulaga neʼe nātou fakaʼaogaʼi lelei te ʼu fai palalau ʼi te kalasi ʼo ʼuhiga la mo te toloke, te ʼui ʼaē neʼe tou tutupu mai te ʼu geli, te matehi ʼa te kau Sutea e te kau Nasi, pea mo te tahi atu ʼu faʼahi. Ko te tuagaʼane neʼe tonu ke palalau ʼo ʼuhiga mo te agamālohi, pea neʼe ina fakaʼaogaʼi te faigamālie ʼaia mo palalau ʼo ʼuhiga mo te Puleʼaga ʼo te ʼAtua, ʼo ina ʼui ʼe ko te ʼamanaki moʼoni ʼaia maʼa te malamanei. Neʼe punamaʼuli ʼaupito te fafine faiako ʼi tana fai faka mafola ʼaia, pea neʼe ko he faigamālie ke toe fai hana tahi fai faka mafola.
3. ʼAki takotou aga, ʼe koutou lava fakagigila feafeaʼi takotou mālama ʼi te faleako?
3 Ko te tahi faʼahi ʼe feala ke koutou gigila ai ohage ko he ʼu mālama, ʼe ko takotou aga pea mo takotou faʼahiga teuteu pea mo takotou faʼahiga heluhelu ʼaē ʼe hā ai takotou aga fakapoipoi. (1 Ko. 4:9; 1 Tim. 2:9) Ka tokagaʼi e tokotou ʼu kaugā ako pea mo te kau faiako te kehe ʼo takotou aga, ʼe feala ke tali ai e ʼihi ia te moʼoni ʼuhi ko takotou aga ʼaē ʼe lelei, pea ʼe ko he faigamālie ʼaia ke koutou palalau ʼo ʼuhiga mo te ʼu moʼoni ʼo te Tohi-Tapu. (1 Pet. 2:12; 3:1, 2) ʼE mole lagi faigafua hakotou fakahā ʼi takotou aga, ʼe koutou tauhi ki te ʼAtua, kae ʼe tapuakina lahi anai koutou e Sehova. (1 Pet. 3:16, 17; 4:14) Moʼo fakatupu te fia logo ʼo tokotou ʼu kaugā ako ki te logo lelei, ʼe feala hakotou lau te ʼu tohi faka Tohi-Tapu ʼi te ʼu temi mālōlō, peʼe koutou tuku te ʼu tohi ʼi he faʼahi ʼe feala ke tokagaʼi e niʼihi.
4. Koteā he ʼu lelei ʼo hakotou fai faka mafola ʼi te faleako?
4 Kapau ʼe koutou fakagigila takotou mālama ʼi te faleako, pea ʼe mālohi anai takotou tui pea mo koutou fiafia ʼi takotou tauhi ʼaē kiā Sehova. (Sel. 9:24) Tahi ʼaē meʼa, ʼe ko he puipuiʼaga ʼaia kiā koutou. Neʼe ʼui fēnei e te tuagaʼane: “Ko te lelei ʼaē neʼe au maʼu ʼi taku palalau ʼo ʼuhiga mo taku tui, ko taku sio ʼaē ʼe mole faiga e te kau ako ke au fai he ʼu meʼa ʼe fakafeagai ki te Tohi-Tapu.”
5. (a) ʼE lava fakalahi feafeaʼi e te kau tūpulaga tanatou minisitelio? (b) Koteā takotou ʼu fakatuʼutuʼu ʼi te faʼahi fakalaumālie?
5 He Selevisi ʼe Lahi Age: Ko te tahi faʼahi ʼe feala ai ki te kau tūpulaga ke nātou fakagigila tanatou mālama, ʼe ko tanatou fakalahi tanatou minisitelio. ʼI te ʼosi ʼo tana ako, neʼe ʼi ai te tēhina neʼe ʼalu ʼo lagolago ki te gāue fai faka mafola ʼaē ʼe fai ʼi te potu ʼe tokosiʼi ai te kau fai faka mafola ʼo te Puleʼaga. Neʼe kau ki te kokelekasio neʼe ko tona tagata ʼāfea pe e tahi. Neʼe faitohi ki tona kaumeʼa ʼo ina ʼui fēnei: “ ʼE au fiafia ʼaupito ʼi henī. ʼE ko he meʼa fakafiafia ʼaupito ia te fai faka mafola! ʼE mātou fai palalau iā teitei minuta e 20 ʼi te ʼu muʼa matapā fuli, heʼe fia logo te hahaʼi ki te ʼu meʼa fuli ʼaē ʼe feala ke mātou fakamatala age kiā nātou.” Neʼe ina toe ʼui fēnei: “ ʼE au fakaʼamu ke fia fai e te kau tūpulaga ia te gāue ʼaenī pea ke nātou maʼu mo nātou te ʼu fiafia ʼaē ʼe au maʼu. ʼE mole he tahi age meʼa ʼe lelei age ʼi hata foaki kiā Sehova te ʼu meʼa fuli ʼaē ʼe tou maʼu moʼo lagolago ki tana tauhi.”
6. He koʼe ʼe koutou fiafia ʼo ʼuhiga mo te kau tūpulaga ʼo tokotou kokelekasio?
6 ʼE mātou fiafia ʼo ʼuhiga mo koutou kau tūpulaga ʼaē ʼe koutou gigila ohage ko he ʼu mālama ʼi te malamanei! (1 Tes. 2:20) Kapau ʼe koutou tauhi kiā Sehova ʼaki tokotou loto kātoa, mo tokotou nefesi kātoa, mo tokotou ʼatamai kātoa, pea mo tokotou mālohi kātoa, ʼe koutou utu anai “i te temi aeni o tuà teau . . . pea mo te mauli heegata i te malama kahau.”—Mko. 10:29, 30; 12:30.