“Koutou Mū Ohage Ko He ʼu Mālama”
1 ʼI te tuʼu ʼaenī ʼaē ʼe fakapōʼuli ʼi te faʼahi fakalaumālie pea mo heʼeʼaoga, ko te toko ono miliona kau atolasio ʼo te ʼAtua moʼoni, ʼe nātou “mū ohage ko he ʼu mālama” ia fenua e 234 ʼi te malamanei katoa. (Filp. 2:15, MN ) ʼE ʼiloʼi tatou e te hahaʼi ʼuhi ko te faʼahi ʼaia. ʼE tou lava fakagigila feafeaʼi te mālama maʼuhiga ʼo te moʼoni ʼaē ʼe haʼu mai ia Sehova?—2 Ko. 3:18.
2 ʼI Tatatou Aga: ʼE mole pulipuli ki te hahaʼi tatatou aga. (1 Pet. 2:12) Neʼe tokagaʼi e te fafine, ko te tagata Fakamoʼoni neʼe nā kaugā gāue neʼe agalelei pea mo tokoni ki te hahaʼi, pea neʼe mole tauvele pea neʼe mole kata ia ʼi te ʼu fakahuahua heʼeʼaoga. Neʼe fia ʼahiʼahiʼi ia ia e ʼihi ʼo nātou tauvele ke logo kiai, kae neʼe mole ina tokagaʼi pea neʼe haga tapiki maʼu ki te faitotonu. Neʼe malave feafeaʼi tana aga ʼaia ki te fafine? ʼE manatuʼi fēnei e te fafine ʼaia: “Neʼe ʼau ōfo ʼaupito ʼi tana aga ʼaia ʼo ʼau kamata fai he ʼu fehuʼi ʼo ʼuhiga mo te Tohi-Tapu. Neʼe ʼau kamata ako te Folafola ʼa te ʼAtua pea neʼe ʼau papitema ki muli age.” ʼE ina toe ʼui fēnei: “ ʼAki tana aga ʼaia, neʼe ʼau fia ʼiloʼi ai te ʼu meʼa ʼaē ʼe tui kiai te kau Fakamoʼoni ʼa Sehova.”
3 Ko tatatou aga ki te ʼu hahaʼi takitaki, mo tatatou manatu ki te ʼu aga ʼo te mālama, pea mo tatatou ʼu palalau lelei, ʼe tupu ai te ʼui ʼa te hahaʼi ko te kau Fakamoʼoni ʼa Sehova ʼe ko he ʼu hahaʼi ʼe nātou mulimuli ki te ʼu lekula māʼoluga ʼa te Tohi-Tapu. Ko te ʼu gāue lelei ʼaia ʼe nātou faka kolōliaʼi ia Sehova pea mo uga ai te hahaʼi ke nātou fia tauhi kia te ia.
4 ʼI Tatatou ʼu Palalau: ʼE mahino ia, ko nātou ʼaē ʼe nātou sisio ki te lelei ʼo tatatou aga ʼe lagi mole nātou ʼiloʼi peʼe koteā tatatou kehekehe mo nātou, ʼo aʼu ki te temi ʼaē ʼe tou palalau ai kia nātou ʼo ʼuhiga mo tatatou tui. ʼE ʼiloʼi koa ʼe takotou ʼu kaugā gāue peʼe ko takotou ʼu kaugā ako, ko koutou ko te Fakamoʼoni ʼa Sehova? ʼE koutou kumi koa he ʼu faigamālie ke koutou fai faka mafola ki he tahi mokā koutou fai palalau mo ia? ʼE koutou loto koa ke “mū . . . tokotou mālama ʼi muʼa ʼo te hahaʼi” ʼi te ʼu lakaga fuli pe?—Mat. 5:14-16, MN.
5 Ke feala hatatou fakahoko tatatou fekau ʼaē ko te fakamū ʼo te mālama, ʼe tonu ke tou maʼu he manatu faka sakilifisio. Ko tatatou gāue ʼaki tatatou nefesi katoa ʼe ina uga anai tatou ke mole lahi fau tatatou tokaga ki te ʼu meʼa ʼaē ʼe mole faʼa maʼuhiga, kae ke tou fakaʼaogaʼi tāfito totatou temi ʼi te gāue ʼaē ka ina hāofaki anai te hahaʼi, te gāue fai faka mafola pea mo te fai ʼo he ʼu tisipulo.—2 Ko. 12:15.
6 ʼAki tatatou aga pea mo tatatou ʼu palalau, ʼofa pe ke tou mū tuʼumaʼu ohage ko he ʼu mālama. Kapau ʼe tou fai feiā, pea ʼe lagi fakatahi anai te tahi hahaʼi mo tatou moʼo faka kolōlia kia Sehova.