Ko He ʼAʼahi ʼe Feala Ke Koutou Maʼu Ai He Tapuakina
1 Neʼe fiafia ia Sakeo ʼi te haʼu ʼa Sesu ki tona loto fale. Pea neʼe liliu te ʼaʼahi ʼaia ko he tapuakina lahi!—Luka 19:2-9.
2 Ia ʼaho nei, ʼi tona ʼuhiga Pule ʼo te kokelekasio, ʼe takitaki e Sesu Kilisito te kau tagata ʼāfea ke nātou “fafaga te faga ōvi ʼa te ʼAtua.” (1 Pet. 5:2, 3; Soane 21:15-17) ʼO hilifaki ki tanatou faiakonaki ʼi te ʼu fono pea mo tanatou takitaki te fai faka mafola, ko te kau tagata taupau ʼo te kokelekasio ʼe nātou foaki he tokoni ʼofa kia nātou takitokotahi ʼo te kokelekasio. Koia ʼi ʼihi temi, ʼe lagi koutou fakaʼamu ke koutou palalau mo te kau tagata ʼāfea ʼi tokotou ʼapi, ʼi te Fale ʼo te Puleʼaga, lolotoga te fai faka mafola, peʼe ʼi he tahi age lakaga. ʼE tonu koa ke tou tuʼania ʼo ʼuhiga mo te ʼu ʼaʼahi ʼaia ʼa te kau tagata ʼāfea? Kailoa. Ko tanatou ʼaʼahi koutou ʼe mole faka ʼuhiga leva neʼe koutou fai he meʼa ʼe kovi. Kae he koʼe koa ʼe fai te ʼu ʼaʼahi faka tauhi ōvi?
3 Neʼe ʼui e Paulo neʼe ina fia ʼaʼahi te ʼu tēhina ‘ke ina ʼiloʼi peʼe nātou feafeaʼi.’ (Gāue 15:36) Ei, ʼi tonatou ʼuhiga tauhi ōvi lotoʼofa, ʼe fia ʼiloʼi moʼoni e te kau tagata ʼāfea peʼe koutou feafeaʼi. ʼE nātou fia foaki atu he tokoni fakalaumālie ʼe ʼaoga anai pea mo ina fakatuputupu anai koutou. ʼE ko te tokaga ʼaia ʼaē ʼe loto e totatou Tagata Tauhi Ōvi ko Sehova ke tou maʼu.—Esk. 34:11.
4 Koutou Tali Lelei Te ʼu ʼAʼahi ʼa Te Kau Tagata ʼĀfea: Neʼe ʼaʼahi e Paulo tona ʼu tēhina he neʼe ina fia ‘foaki age kia nātou he ʼu meʼa ʼofa fakalaumālie moʼo fakaloto mālohiʼi ʼo nātou, pea ke nātou fefoakiʼaki he ʼu fakaloto mālohi.’ (Loma 1:11, 12) ʼI te ʼu ʼaho fakamuli faigataʼa ʼaenī, ʼe ʼaoga ke fakaloto mālohiʼi ia tatou fuli ʼi te faʼahi fakalaumālie, pea ʼe ʼaoga kia tatou he tokoni ke tou haga nofo mālohi ʼi te tui. ʼE mahino papau ia, ʼi takotou tali lelei te ʼaʼahi faka tauhi ōvi ʼe hoko ai anai he fefakaloto mālohiʼaki lelei.
5 Koutou fakafetaʼi ʼo ʼuhiga mo te ʼatu ʼu tapuakina ʼaē ʼe tou maʼu mai te gāue tauhi ōvi ʼa te kau tagata ʼāfea. Kapau ʼe ʼi ai he faʼahi pe ko he fehuʼi ʼe koutou fia ʼiloʼi, koutou manatuʼi ʼe ʼi ai te ʼu tagata ʼāfea ʼi te ʼu kokelekasio moʼo tokoni atu kia koutou. Koutou palalau mo nātou ki te ʼu meʼa fuli ʼaē ʼe malave kia koutou ʼi te faʼahi fakalaumālie. Koutou leleiʼia te fakatuʼutuʼu ʼofa ʼaia ʼa Sehova, pea mo koutou fiafia ʼi te ʼu tapuakina ʼaē ʼe feala ke koutou maʼu ʼaki te ʼu ʼaʼahi ʼaia.