Ko He Kau Fai Faka Mafola e Toko 1 650!

ʼE ko te kaugamālie ʼaia ʼo te kau fai faka mafola ʼaē ʼe tou fakaʼamu ke maʼu ʼi Niu-Kaletonia ʼi te māhina ʼo ʼAukusito 1998. ʼE feala koa ke tou aʼu ki te kaugamālie ʼaia? Ei! ʼI tatatou lau te kau fai faka mafola ʼo te ʼu kokelekasio katoa, ʼe tānaki ko te toko 1 662. Kae, ʼo aʼu ki te temi nei, neʼe ko te māhina pe ʼo ʼOketopeli 1997, ʼaē neʼe maʼu ai te tupu foʼou ʼo ʼuhiga mo te kau fai faka mafola, ko te toko 1 607. ʼE feala ke tou fakalaka ʼi te lau ʼaia, mo kapau ʼe fakatuʼutuʼu fakalelei e te kau fai faka mafola takitokotahi ke nātou kau ki te minisitelio lolotoga te māhina ʼo ʼAukusito pea mo nātou foaki tautonu tanatou pepa tānaki gāue. Mai tona ʼaluʼaga ʼaē ko te ʼu ʼuluaki ʼaho ʼo te māhina ʼe ko te Moeaki pea mo te ʼAhotapu, ʼe koʼe ʼe mole fakatuʼutuʼu ke kamata faka mafola ʼi te fakaʼosi vāhaʼa ʼaia? Kapau ʼe koutou kau anai ki he fakatahi, ʼe lagi feala ke koutou fai te fagonogono faigamālie ʼi te kolo ʼaē ka fai ai te fakatahi pea mo koutou kau ki te fai faka mafola mo te kokelekasio ʼi te vāhaʼa ka hoa kiai. Kapau ʼe tou kamata fakatomuʼa ʼi te māhina, pea ʼe tou fakaʼaogaʼi katoa anai te māhina ʼo ʼAukusito ki te gāue fai faka mafola. Kapau ʼe tou faiga fakatahi, pea ʼe tou sio anai ki te tupu foʼou ʼo te kau fai faka mafola, ʼe fakalaka anai ʼi te toko 1 650. ʼE ko he toe fakavikiviki leʼolahi ʼaē ka fakahoko anai kia Sehova!​—Pes. 47:⁠1.