ʼE Makehe Te Gaue ʼi Te Mahina ʼo ʼAukusito

1. Kotea ia te tufa makehe ʼae ka fai anai ʼi te malamanei katoa ʼi te kua ovi mai ʼo te taʼu 100 ʼo te Puleʼaga ʼo te ʼAtua?

¹ ʼI te kua ovi mai ʼo te taʼu 100 ʼo te Puleʼaga ʼo te ʼAtua, ʼe tuha ke tou fakamaʼuhigaʼi ia Sehova ʼi tatatou kau ki he tufa makehe. ʼI te mahina ʼo ʼAukusito, ʼi te malamanei katoa, ʼe tou kau anai ki te tufa ʼo te kiʼi pepa lotu foʼou “ʼE Tou Maʼu ʼIfea Te ʼu Tali Ki Te ʼu Fehuʼi Maʼuhiga ʼo Te Maʼuli? ” ʼE fakalotomalohiʼi ʼi te kiʼi pepa lotu ʼaia ia te hahaʼi ke natou vakaʼi ʼi te Tohi-Tapu te ʼu tali pea ʼe fakamahino ai pe ʼe lava tokoni feafeaʼi kia natou ia tatatou tuʼasila ʼi te Neti jw.org.

2. ʼE tou lava lagolago feafeaʼi anai ki te kalagaʼi leʼo lahi ʼo he fakavikiviki kia Sehova lolotoga te mahina ʼo ʼAukusito?

² Tou Kalagaʼi Leʼo Lahi Ia He Fakavikiviki: Moʼo tokoni ki te ʼu tehina mo tuagaʼane ke lahi age tanatou lagolago ki te minisitelio, neʼe fai ia he fakatuʼutuʼu makehe kia natou ʼae ʼe fia pionie vaelua ʼi temi ʼi te mahina ʼo ʼAukusito. ʼE feala anai ke natou fai ni hola ʼe 30. Ko natou ʼae ʼe gaue peʼe kei ako, ʼe feala anai ke natou pionie vaelua ʼi temi ʼi te mahina ʼo ʼAukusito koteʼuhi ko ʼona Feliaono mo Moeaki pea mo ʼAhotapu ʼe nima. Pea kapau ʼe ʼi ai hakotou ako peʼe ko he fanau ʼe tuputupu lelei pea kua fia kaugā fagona, kotou foimo fakaha ki te kootinatea ʼo te kolesi ʼo te kau tagata ʼafeā. ʼE ko he fakalotomalohi anai ki te ʼu kaugā fagona foʼou ʼi tanatou faifakamafola fakatahi mo tatou ʼi te mahina maʼuhiga ʼaia! Logo la ʼi te mahina ʼo ʼAukusito, ʼe malolō ai te kau pionie katoa ʼae kua katoa ʼonatou hola, kaʼe ʼe feala anai ke natou fai ni fetogi ʼi tanatou polokalama ke lahi age tanatou kau ki te tufa makehe ʼaia. ʼO kamata atu ʼi te temi nei, ʼe lelei ke felogoʼi te ʼu famili pe ʼe feafeaʼi anai hanatou lagolago lelei ki te kalagaʼi leʼo lahi ʼo he fakavikiviki kia Sehova lolotoga te mahina ʼo ʼAukusito.—Eseta. 3:11; Taag. 15:22.

3. Kotea tatatou fakaʼamu ʼo ʼuhiga mo te tufa makehe ʼaia?

³ Logo la, neʼe kua tou kau ki he ʼu tufa feia ʼi muʼa atu, kaʼe ʼe tou fakaʼamu ke maʼuhiga age ia te tufa ʼae ka tou fai anai. ʼE feala koa ke laka age te ʼu hola, mo te lahi ʼo te kau faifakamafola pea mo te kau pionie vaelua ʼi temi ʼi te mahina ʼo ʼAukusito? ʼI te fakaʼosi ʼo te taʼu gaue 2014, ʼofa pe ke tapuakiʼi e Sehova ia te ʼu faiga ʼa tana hahaʼi ʼi te malamanei katoa ke liliu te mahina ʼo ʼAukusito ko he mahina ʼe tou fakahoko ai ia he toe gaue makehe!—Mat. 24:14.