Tou Faiga Ke Maʼuhiga ʼAupito Te Māhina ʼo ʼAukusito
1 Ko te taʼu 1963 neʼe ko he tau maʼuhiga ʼaupito ki te hahaʼi ʼa Sehova. Koteā tona tupuʼaga? ʼI te taʼu ʼaia, neʼe maʼu te tahi miliona kau fai faka mafola ʼi te malamanei katoa. Kapau neʼe koutou kau ki te moʼoni ʼi te temi ʼaia, ʼe lagi koutou manatuʼi tatatou fiafia ʼi te kua lahi ʼo te kau fai faka mafola ʼo te Puleʼaga! ʼI te temi nei, kua lahi te kau fai faka mafola ʼi Amelika. Kae ʼi te māhina fuli, ʼe tokolahi te kau fai faka mafola ʼi te malamanei katoa ʼe mole nātou foaki tanatou pepa tānaki gāue. Kaeā ia tatou? Ko te toko 120 ʼi Niu-Kaletonia pea mo te toko 3 ʼi Uvea, ʼe mole nātou kau tuʼumaʼu ki te minisitelio.
2 Koutou Lagolago Ki Te Fakatuʼutuʼu ʼo Te Māhina ʼAia: ʼI te māhina ʼo ʼAukusito, ʼe tou fakaʼamu ke tou kaku ki te toko 1 650 kau fai faka mafola ʼi Niu-Kaletonia. Kapau ʼe tou lavaʼi te faʼahi ʼaia, pea ʼe mahino papau ia, ʼe maʼuhiga ʼaupito anai te māhina ʼo ʼAukusito! ʼE feala ke tou fakahoko te fakatuʼutuʼu ʼaia mo kapau ʼe tou kau fuli kiai.
3 Kapau ʼe koutou ʼolo ʼo mālōlō, pea ʼe feala ke koutou fakaʼaogaʼi he kiʼi temi ki te fai faka mafola ʼi muʼa ʼo takotou ʼolo. Koutou ʼave mo koutou he ʼu kiʼi pepa lotu, mo he ʼu kaupepa lalahi, peʼe ko he ʼu nusipepa ke feala hakotou faka mafola kia nātou ʼaē ʼe koutou felāveʼi mo nātou ʼi takotou ʼolo ʼaia ʼo mālōlō. Tahi ʼaē meʼa, ʼi te koga meʼa ʼaē ka koutou ʼolo ʼo mālōlō ai, pea ʼe feala anai ke koutou kau ki te minisitelio mo te ʼu tēhina mo tuagaʼane ʼo te kokelekasio ʼaia.
4 Kapau ʼe koutou mahamahaki, pea ʼe ʼi ai pe te tahi faʼahiga fai ʼo takotou minisitelio. ʼE lagi feala anai ke koutou fai faka mafola ki te kau tōketā, mo te ʼu afilimie, pea mo te ʼu hahaʼi ʼaē ka nātou ʼaʼahi ia koutou. ʼE lagi feala ke koutou faitohi peʼe koutou fai telefoni moʼo fai faka mafola.
5 ʼE mahino papau ia, ko ʼihi ʼe nātou fiafia anai mo kapau ʼe tokoni age kia nātou ke nātou kau ki te minisitelio ʼi ʼAukusito. Ko te kau tagata ʼāfea, mo te kau faifekau faka minisitelio, pea mo te ʼu tēhina ʼaē ʼe nātou takitaki te ʼu ako tohi, ʼe tonu ke nātou fai he ʼu fakatuʼutuʼu ke feala hanatou tokoni kia nātou ʼaia. Ko te meʼa ʼaē ʼe maʼuhiga tāfito, ke ʼaua naʼa galo ke koutou foaki takotou pepa tānaki gāue ʼi te fakaʼosi ʼo te māhina, ke feala hakotou kau ki te tānaki ʼo te kau fai faka mafola ʼo ʼAukusito.
6 Koutou Leleiʼia Takotou Pilivilesio: Ko te minisitelio ʼe ko he “koloā taulekaleka.” (2 Tim. 1:14) ʼE tou leleiʼia te pilivilesio ʼaē neʼe foaki mai kia tatou ke tou faka mafola te logo lelei. (1 Tes. 2:4) Ka tou fakasiosio te ʼu meʼa fuli ʼaē neʼe fai e Sehova maʼa tatou, pea ʼe tonu ke uga ai tatou ke tou kau tuʼumaʼu ki te gāue maʼuhiga ʼaia ʼi te taʼu katoa. ʼE mole tonu ke tou tuku he meʼa ke ina tāʼofi tatatou fai faka mafola tuʼumaʼu. Tou faiga ke liliu te māhina ʼo ʼAukusito ko he māhina ʼe maʼuhiga ʼaupito ʼi tatatou tauhi kia Sehova, pea mo tou fakatuʼutuʼu mālohi ke tou fakavikiviki kia te ia ʼi te māhina fuli pe!—Pes. 34:1.