ʼE Koutou Fai Faka Mafola Tuʼumaʼu Koa?
1 Neʼe tou fiafia fuli ʼi tatatou ʼiloʼi ʼaē neʼe maʼu ʼi Niu-Kaletonia te tuputupu makehe ʼi ʼAukusito ʼo te taʼu 1997, ko te toko 1 688, pea ko Uvea mo Futuna ʼi ʼAukusito ʼo te taʼu 1999 neʼe ko te toko 46 kaugā fai faka mafola. ʼE hā ʼaki mai te fua ʼo he faiga fakatahi pea mo fakamalotoloto! Kae ʼi te ʼu māhina ʼaē neʼe hoa kiai, ko ʼihi fai faka mafola, tāfito ʼi Niu-Kaletonia, neʼe kua faigataʼa tanatou kau tuʼumaʼu ki te gāue fai faka mafola, ʼo fakafuafua ʼi te māhina fuli ko te toko 1 515 kau fai faka mafola pe. ʼE hā mai ai ko te toko 10 ʼi te teau kau fai faka mafola neʼe mole nātou faka mafola ʼi te māhina fuli. ʼE mātou faka tui ko te fakaloto mālohi ʼaenī ʼe ina lava foaki atu anai he puleʼaki moʼo fetogi te ʼaluʼaga ʼaia.
2 Tou Faka Maʼuhigaʼi Te Pilivilesio ʼAia: ʼE tonu ke loloto tatatou faka maʼuhigaʼi ia te pilivilesio ʼaē ko te fagonogono ʼo te logo lelei ʼo te Puleʼaga ki te hahaʼi fuli. Heʼe ko te gāue ʼaia ʼe ina fakafiafia te loto ʼo Sehova, pea ʼe ina toe faka fealagia ki te ʼu hahaʼi ʼaē ʼe fakamalotoloto ke nātou ako te ala ʼo te maʼuli. (Taag. 27:11; 1 Tim. 4:16) Ko te fai faka mafola tuʼumaʼu ʼe ina fakatuputupu tatatou poto ʼi te minisitelio, pea ʼe tou loto fiafia ai.
3 Tou Tohi Tatatou Gāue: Ko ʼihi kau fai faka mafola ʼe mole nātou ʼaumai tautonu tanatou kiʼi pepa tānaki. ʼAua naʼa tou ʼui ʼe mole hona ʼaoga ke tohi tatatou faiga. (Vakaʼi ia Maleko 12:41-44.) Ei, ʼe tonu ke tou tohi te gāue ʼaē neʼe tou fai! ʼE ʼaoga ke koutou fai hakotou fakatuʼutuʼu lelei ʼi fale, ohage la ke koutou fakaʼaogaʼi te kaletalio moʼo tohi ai takotou ʼu hola fai faka mafola, pea ʼe feala ai hakotou manatuʼi tuʼumaʼu ke koutou ʼaumai tautonu takotou kiʼi pepa tānaki ʼi te ʼu fakaʼosi māhina fuli, pea ke totonu te ʼu hola ʼaē ʼe koutou tohi ai.
4 Foaki Te Tokoni ʼAē ʼe ʼAoga: Neʼe fai e te kokelekasio te ʼu fakatuʼutuʼu moʼo lagolago ki te kau fai faka mafola ke nātou kau tuʼumaʼu ki te gāue faka mafola. Ko te sikalaipe ʼo te kokelekasio pea mo te ʼu tēhina ʼaē ʼe nātou takitaki te ʼu ako tohi, ʼe tonu ke nātou fai he ʼu fakatuʼutuʼu ke foaki he tokoni ʼaoga e te kau fai faka mafola faiva ʼi te minisitelio. Kapau ʼe ʼi ai hakotou fānau pe ko hakotou ʼu ako ʼe kua fai faka mafola, koutou fakamāhani nātou ke nātou ʼaumai ʼi te māhina fuli tanatou ʼu kiʼi pepa tānaki gāue.
5 Koutou manatuʼi te hisitolia ʼo te Tule Leʼo ʼo te ʼaho 1 ʼo ʼOketopeli 1997, “ ʼE ʼAu Loto Fakafetaʼi ʼi Taku Maʼuli Fualoa ʼo Fai Te Gāue ʼa Sehova.” Ko te tuagaʼane ko Ottilie Mydland ʼaē ʼe nofo ʼi Norvège, kua ina faka mafola tuʼumaʼu te logo lelei ʼi muʼa ʼo tana papitema ʼi te taʼu 1921. Hili kiai taʼu e 76, ʼi tona taʼu 99, neʼe ina ʼui fēnei: “ ʼE ʼau fiafia heʼe kei feala taku fai faka mafola.” ʼE ko he faʼifaʼitaki lelei ʼaia kia tatou fuli ʼaē ʼe tou tauhi kia Sehova, ke tou mulimuli kiai!