Te ʼu Tagata Taupau ʼe Ko He ʼu Faʼifaʼitaki—Te Sikalaipe
1 ʼE maʼuhiga te gāue ʼa te sikalaipe ʼo te kokelekasio ke “fai ia meʼa fuli ʼi te fakapotopoto pea mo te fakatokatoka.” (1 Ko. 14:40) ʼI tana kau ʼi te Komite Gāue ʼo te kokelekasio, ʼe tokaga ki te ʼu felogoi ʼa te kokelekasio pea mo te Sosiete, ʼo feiā mo te ʼu tānaki ʼaē ʼe tonu ke fai. Logope la ʼe mole tou sio tuʼumaʼu ki te ʼu gāue ʼaē ʼe ina fai ohage ko tatatou sio ki te ʼu gāue ʼa te tahi ʼu tagata ʼāfea, kae ʼe tou leleiʼia te gāue ʼaē ʼe ina fai pea ʼe maʼuhiga kia tatou.
2 Ka momoli mai he ʼu tohi e te Sosiete peʼe ko ʼihi, pea ʼe vakaʼi te faʼahi ʼaia e te sikalaipe ʼo tali kiai mokā ʼe ʼaoga. ʼE ina vakaʼi peʼe kua lau e te ʼu tagata ʼāfea te ʼu tohi ʼaia, pea ʼe ina tuku ki he tosie moʼona fakaʼaogaʼi ki muli age. ʼE ina sinie te ʼu pepa fakaʼui ʼo te ʼu nusipepa pea mo te ʼu tohi pea mo ina momoli ki te Sosiete. ʼE ina takitaki ia nātou ʼaē ʼe gāue ʼi te falā ʼo te kokelekasio pea mo te ʼu apone, ʼo feiā pe mo te fai ʼo te ʼu fakatuʼutuʼu ʼaē ʼo ʼuhiga mo te ʼu fakatahi lalahi.
3 Mai tona ʼuhiga ʼaē ʼe tonu ke momoli e te sikalaipe te ʼu pepa tānaki gāue ʼo te kokelekasio ki te Sosiete ia māhina fuli ʼi muʼa ʼo te ʼaho 6, koia ʼe maʼuhiga ʼaupito kia tatou fuli ke tou foimo tohi tatatou pepa tānaki gāue ʼi te fakaʼosi māhina. ʼOsi ʼaia pea ʼe ina hiki te ʼu pepa tānaki gāue ʼaia ki te ʼu Kate ʼa te kau Fai Faka Mafola ʼo te kokelekasio. Ko te kau fai faka mafola fuli ʼe feala ke nātou kole ke nātou vakaʼi tonatou kate fai faka mafola takitokotahi.
4 Ka fetogi kokelekasio he kaugā fai faka mafola, pea ʼe kole e te sikalaipe peʼe ina momoli ki te kau tagata ʼāfea ʼo te tahi kokelekasio he tohi fakanounou ʼe fakapipiki kiai te ʼu kate ʼo te kaugā fai faka mafola ʼaia.—Notre ministère, pasina 105.
5 Ko te sikalaipe ʼe ina vakaʼi te gāue ʼa te kau pionie, ʼo ina fakahā ki te kau tagata ʼāfea, kae tāfito ki te tagata taupau ki te gāue, te ʼu fihifihia ʼaē ʼe lagi tau mo te kau pionie. Tahi ʼaē meʼa, ʼe ina fakahā ki te ʼu tēhina takitaki ʼo te ʼu ako tohi kapau ʼe ʼi ai he ʼu kaugā fai faka mafola ʼe nātou tōtō ʼi te gāue fai faka mafola. Ko te sikalaipe pea mo te tagata taupau ki te gāue, ʼe nā takitaki te fakatuʼutuʼu ʼaē neʼe fai moʼo tokoni kia nātou ʼaē ʼe mole kei nātou fai faka mafola.—Te Minisitelio ʼo Te Puleʼaga Fakafalani ʼo ʼAukusito 1988, ʼi te pasina 7.
6 ʼI tatatou kua mālama lelei age ki te ʼu gāue ʼaē ʼe fakahoko e te sikalaipe, ʼofa pe ke tou fai ia meʼa fuli ke faigafua age kia ia te fakahoko ʼo tana gāue.—1 Ko. 4:2.