Koutou Fakaʼaogaʼi Te ʼu Kaupepa Moʼo Fakahā Takotou ʼAmanaki ʼo ʼUhiga Mo Te Puleʼaga
1 ʼI tatatou sio ʼaē ki te fakahoko ʼo te ʼu lea faka polofeta ʼo te Tohi-Tapu, kua tou fiafia ʼi tatatou ʼamanaki ʼo ʼuhiga mo te Puleʼaga, pea ʼe tou fia palalau ʼo ʼuhiga mo te Puleʼaga ʼaia ki te hahaʼi fuli pe ʼaē ʼe fia logo. (Luka 6:45; Loma 12:12) ʼI tatatou minisitelio ʼi Sanualio, kapau ʼe tou fakahā te ʼu kaupepa Fakaʼuvea ʼaē kua tou maʼu, pea ʼe tou fakahā ai anai ki te hahaʼi tatatou ʼamanaki ʼo ʼuhiga mo te Puleʼaga, ohage ko tona fakatotonu mai e Sesu.—Mateo 24:14. Ko te kiʼi fakamanatu ʼaē ʼe hoa mai ʼe tokoni mai anai kia tatou ke tou fai te faʼahi ʼaia.
2 Koʼeni te faʼifaʼitaki ʼe feala ke koutou fakaʼaogaʼi moʼo fakahā te kaupepa “ ʼE tokaga moʼoni koa te ʼAtua kia tatou?”: “ ʼE tui te tokolahi ia ʼaho nei, ko te ʼAtua ʼe mole tokaga moʼoni kia tatou ʼi te kele, pea ʼe mole ina fai he meʼa moʼo fakatokatoka totatou ʼu fihifihia. ʼE ke manatu feiā koa la mo koe? [Tuku ke fai hana tali.] ʼE ʼau fia lau atu te meʼa ʼaē ʼe tuʼu ʼi te kaupepa ʼaenī, ʼo ʼuhiga mo te meʼa ʼaē ʼe fakatuʼutuʼu e te ʼAtua maʼa te tagata pea mo te kele. [Lau te ʼu manatu ʼo te palakalafe 3 pea mo te ʼuluaki palakalafe ʼo te fahaʼi 2 ʼi te pasina 3.] ʼE mahino papau ia, ʼe ʼi ai te tupuʼaga tāfito ʼo te tuku ʼaē e te ʼAtua ke hoko te ʼu fihifihia ʼi te kele. Kapau ʼe ke lotolelei ke ke ʼiloʼi pe koteā tona tupuʼaga, pea ke lau te kaupepa ʼaenī, ʼaē ko tona kupu tāfito ʼE tokaga moʼoni koa te ʼAtua kia tatou?”
3 ʼE feala ke koutou ʼui fēnei moʼo fakahā te kaupepa “Mokā Mate He Tahi ʼe Tou ʼOfa Mamahi Ai”: “ ʼI tau manatu, ʼe ʼi ai anai koa he ʼaho ʼe mole toe mate anai he tahi ʼe tou ʼofa mamahi ai? [Tuku ke fai hana tali.] Ko te kaupepa lelei ʼaenī, kua ina fakafimālieʼi te tokolahi heʼe ina fakahā te fakapapau moʼoni ʼa te Tohi-Tapu ʼaē, kua ōvi mai te ʼaho ʼaia. [Fuli age te pasina 5, pea mo lau te palakalafe fā, ʼaē ʼe tuʼu ai te koga tohi ʼo 1 Kolonito 15:21, 22. ʼOsi ʼaia, pea fakahā age te paki ʼo te pasina 30.] ʼE hā lelei ʼi te paki ʼaenī te fiafia ʼaē ka tou maʼu ʼi te temi ʼaē ka fakatuʼuake anai ia nātou ʼaē kua mamate. Kae ʼe hoko anai ʼifea te meʼa fakafiafia ʼaia? ʼE ke maʼu anai tona tali faka Tohi-Tapu ʼi te kaupepa ʼaenī.” Kapau ʼe ina tali te kaupepa, pea ʼe feala ke koutou ʼui age: “ ʼE ʼau ʼamusia age ke ʼau toe liliu mai ke tā toe fai palalau ʼo ʼuhiga mo te faʼahi ʼaia.”
4 Ka koutou fakahā te kaupepa “Fakamaʼua,” ʼe feala ke koutou ʼui fēnei: “ ʼI tau manatu, neʼe ko te fakatuʼutuʼu koa ʼa te ʼAtua, ke tou maʼuʼuli mamahi ʼuhi ko te ʼu fihifihia ʼaē ʼe tau mo tatou ia ʼaho nei?” ʼI te ʼosi fai ʼo hana tali, ʼe feala ke koutou ʼui age: “Lagi kua ke mālama ki te faikole ʼaē neʼe akoʼi e Sesu ki tana kau tisipulo, ke nātou kole ke hoko mai te Puleʼaga ʼo te ʼAtua. Kua ke feʼekeʼaki la pe koteā te Puleʼaga ʼo te ʼAtua?” Fuli age te ako 6 ʼo te kaupepa Fakamaʼua, pea mo lau te ʼu fehuʼi ʼaē ʼe tohi ʼi te kamata ʼo te ako. Pea ʼi takotou lau te ʼuluaki palakalafe, koutou fakahā te tali ki te ʼuluaki fehuʼi. Koutou fakamahino age, ʼe toe nounou foki te tahi ʼu fehuʼi ʼo te ako. Koutou tuku te kaupepa ki te 50, pea koutou fakatuʼutuʼu ke koutou toe ʼaʼahi ia ia moʼo fakahā age te tahi ʼu manatu ʼo ʼuhiga mo te Puleʼaga.
5 ʼAki te tapuakina ʼa Sehova ia tatatou gāue fai faka mafola fakamalotoloto, tou fakaʼamu ke kaugamālie age te hahaʼi ʼaē ʼe ʼōmai ʼo fakafiafia fakatahi mo tatou ʼi tatatou ʼamanaki ʼo ʼuhiga mo te Puleʼaga!—Gāue 13:47, 48.