ʼE Lava Feafeaʼi Ki He Famili Ke Felagolagoʼaki—Ke Nātou Kau Ki Te ʼu Fono
1 ʼE tonu ke fakalogo te ʼu famili Kilisitiano ki te fakatotonu ʼaē ke tou fakatahitahi ʼi te ʼu fono ʼo te kokelekasio. (Hep. 10:24, 25) Kapau ʼe nātou fetokoni leleiʼaki, pea ʼe feala kia nātou fuli ke nātou teuteuʼi te ʼu fono, mo nātou kau kiai, pea mo nātou fai ai hanatou ʼu tali. ʼE mole tatau fuli te ʼu famili, kae ʼe ʼi ai te ʼu meʼa ʼe feala ke fai e he tāmai Kilisitiano, pe ko he faʼe, peʼe ko he tahi ʼe ina taupau tokotahi tana fānau, ke feala ai ki te famili ke nātou lototahi ʼo ʼuhiga mo te ʼu meʼa fakalaumālie, tatau aipe peʼe tokolahi te fānau ʼi te ʼapi pea mo te kehekehe ʼo tanatou ʼu taʼu.—Taag. 1:8.
2 Koutou Teuteuʼi Te ʼu Fono: ʼE fetokoniʼaki te famili ke nātou ʼiloʼi pe neʼe nātou tahi teuteuʼi lelei tana fono. Ko te tokolahi ʼe nātou ako fakatahi te alatike ʼo Te Tule Leʼo ʼo te vāhaʼa. Ko ʼihi ʼe nātou teuteuʼi fakatahi te Ako Tohi ʼo te kokelekasio peʼe nātou fai faka famili te lautohi ʼo te koga ʼo te Tohi-Tapu ʼaē ʼe fakatuʼutuʼu ki te vāhaʼa. ʼE nātou fakatuʼutuʼu ai ke nātou ʼiloʼi fakatomuʼa te ʼu puani tāfito ʼaē ka talanoa kiai te fono. ʼAki tanatou fai te faʼahi ʼaia, ʼe lahi anai te ʼu fua lelei ʼaē ka nātou maʼu ʼi te ʼu akonaki, pea ʼe feala anai hanatou fai he ʼu tali mo kapau ʼe ʼaoga.—1 Tim. 4:15.
3 Koutou Fakatuʼutuʼu Ke Koutou Fai He ʼu Tali: Ko te famili katoa ʼe tonu ke nātou tahi fakatuʼutuʼu ke nātou fakahā tanatou ʼamanaki ʼo nātou fai he ʼu tali ʼi te ʼu fono. (Hep. 10:23) ʼE ʼaoga koa ki he tahi ʼi te famili ke fai age he tokoni ki ai ʼo ʼuhiga mo te faʼahi ʼaia? Koteā te tokoni ʼaē ʼe ʼaoga kia nātou takitokotahi ke nātou teuteuʼi hanatou kiʼi fai palalau ʼi te Ako ʼo te Minisitelio Faka Teokalatike? ʼE leleiʼia e te ʼu tuagaʼane Kilisitiano mokā tokoni age kia nātou tonatou ʼohoana, ʼo lagi ina fakahā he lea fakatā pe ko he manatu fakapotopoto ʼe feala ke ina fakaʼaogaʼi ʼi he fai palalau. ʼE mole maʼua ki te ʼu mātuʼa ke nātou teuteuʼi te ʼu fai palalau maʼa tanatou fānau. Kapau ʼe nātou fai te faʼahi ʼaia, pea ʼe feala ai leva ke faigataʼa ki te fānau hanatou teuteuʼi tokotahi tanatou ʼu kiʼi fai palalau. Kae ʼe feala ke tokoni te ʼu mātuʼa ki te fānau pea mo nātou fakalogo kia nātou mokā nātou akoako tanatou ʼu fai palalau.—Ef. 6:4.
4 Koutou Fakatuʼutuʼu Ke Koutou Kau ʼi Te ʼu Fono: ʼI tanatou kei veliveli, ʼe feala ke akoʼi ki te fānau Kilisitiano ke nātou teuteu fakavilivili pea mo fai tautonu ke feala hanatou ʼolo ki te fono ʼi te hola totonu. ʼE tonu ke fetokoniʼaki te famili moʼo fakahoko te ʼu gāue ʼo te ʼapi, ke ʼaua naʼa tauhala te famili.—Vakaʼi te ʼu tokoni ʼaē ʼe fai ʼi te tohi Le secret du bonheur familial, ʼi te pasina 112, pea mo te tohi Les jeunes sʼinterrogent, ʼi te pasina 316 ki te 317.
5 Ko te ʼu mātuʼa pea mo te fānau ʼe feala ke nātou fakakaukauʼi te ʼu palalau ʼaenī neʼe fai e Sosue: “Kae kia ʼau mo toku loto fale, ʼe mātou tauhi anai kia Sehova.” Koia, koutou fakatotonu ke koutou fetokoniʼaki moʼo lagolago katoa ki te ʼu fono ʼo te kokelekasio.—Sosue 24:15.