ʼE Hoko Moʼoni Anai Te ʼu Folafola Faka Polofeta Fuli ʼa Te ʼAtua!
1 Kua fualoa te fia ʼiloʼi e te kau Fakamoʼoni ʼa Sehova te ʼu lea faka polofeta ʼa te Tohi-Tapu. Koia neʼe tou fiafia ʼaupito ʼi tatatou ʼiloʼi te kupu tāfito ʼo te fakatahi faka tisitilike ʼo te taʼu ʼaenī ʼaē ko “Te ʼu Folafola Faka Polofeta ʼa Te Tohi-Tapu.” Neʼe tou fia ʼiloʼi pe koteā “te meakai” ʼaē neʼe teuteuʼi e Sehova “i tona temi” maʼa tatou. (Mat. 24:45) Pea neʼe tou fiafia ʼi te ʼu meʼa fuli ʼaē neʼe ina foaki mai.
2 Te ʼu Koga Maʼuhiga ʼo Te Fakatahi: Ko te akonaki tāfito ʼo te Feliaono, “Koutou Tokagaʼi Te ʼu Folafola Faka Polofeta ʼa Te Tohi-Tapu,” neʼe kau ai te ʼu fakamahino ʼo ʼuhiga mo te fetogi ʼo Sesu. (Mat. 17:1-9) Neʼe fakahā ai, ʼe tou nonofo ʼi he temi ʼe lelei ʼaupito, heʼe kua tou aʼu ki te temi ʼo te fakaʼosi, pea kua ōvi mai te mālama foʼou! ʼE tou tokagaʼi anai te Folafola ʼa te ʼAtua mo kapau ʼe tou lau tuʼumaʼu. ʼI te akonaki ʼaē neʼe koga tolu, “Koutou Fiafia ʼi Takotou Lau Te Folafola ʼa Te ʼAtua,” neʼe fai te ʼu tokoni ke ʼi ai he fua ʼo tatatou lau ia te Tohi-Tapu pea ke tou fiafia ai.
3 ʼI te Moeaki hili hoʼatā, neʼe tou vakaʼi he ʼu tupuʼaga ke tou tui papau ai, kua tou maʼuʼuli ʼi te ʼu ʼaho fakamuli. ʼE kei koutou manatuʼi koa te ʼu tupuʼaga fuli ʼaia? ʼI te ʼAhotapu uhu, neʼe ʼāsili tatatou fia lau te lea faka polofeta ʼa Apakuke ʼi tatatou ʼiloʼi ʼaē, ʼe tatau totatou temi pea mo tona temi, pea kua vave hoko he ʼu meʼa maʼuhiga mokā fakaʼauha anai e Sehova te kau agakovi kae ina hāofaki te kau agatonu. Neʼe koutou mahino koa ki te manatu tāfito ʼaē neʼe hā ʼi te kiʼi gaoʼi faka Tohi-Tapu ʼaē neʼe fai ʼo ʼuhiga mo Sakopo pea mo Esau? ʼE tonu ke tou faiga ke tou maʼu he ʼu tapuakina mai ia Sehova, ʼo tou tauʼi te pikoʼelo pea mo te lotonoa.
4 Ko He Tohi Foʼou: Neʼe tou fiafia ʼaupito ʼi tatatou maʼu te tohi foʼou, Prêtons attention à la prophétie de Daniel ! Lagi kua koutou lolotoga lau te tohi maʼuhiga ʼaia. Neʼe ʼui fēnei e te tēhina ʼaē neʼe ina fakahā te tohi: “ ʼE kei toe pe ʼihi meʼa, kae kua teitei hoko fuli te ʼu lea faka polofeta ʼo te tohi ʼa Taniela.” ʼE mole hā ai koa la te maʼuhiga ʼo totatou temi?
5 ʼAki te polokalama ʼo te fakatahi, neʼe fakamālohiʼi ai tatatou tui ʼaē, ʼe hoko moʼoni anai te ʼu fakapapau ʼa te ʼAtua ʼaē ʼe mole heʼeki hoko. ʼE uga ai tatou ke tou haga tala ki te hahaʼi te ʼu folafola faka polofeta ʼa te ʼAtua!