Tou Ako Te Tohi ʼo Te Lea Faka Polofeta ʼa Taniela
1 ʼI te ʼaho 6 ʼo Tesepeli, neʼe tou kamata ako te tohi Koutou Tokagaʼi Te Lea Faka Polofeta ʼa Taniela ! ʼi tatatou Ako Tohi ʼo te kokelekasio. Tokolahi kua nātou ʼosi lau te tohi lelei ʼaupito ʼaia, kae ʼi te temi nei, ʼe tou maʼu te faigamālie ke tou maʼu te ʼu lelei ʼo hatatou fai palalau ki te tohi ʼaia ʼi te ako tohi. ʼE fakaafe te kau fai faka mafola fuli, mo te hahaʼi ʼe fia logo, pea mo te fānau, ei, ʼe fakaloto mālohiʼi nātou ke nātou kau ʼi te vāhaʼa fuli ki te ako loloto ʼaia ʼo te tohi ʼo te Tohi-Tapu ʼo Taniela.—Teu. 31:12, 13.
2 Te Polokalama Ako Pea Mo Te ʼu Fakatotonu: Ko te polokalama kātoa ʼo te ako ʼo te tohi ʼo Te Lea Faka Polofeta ʼa Taniela ʼe tā ʼi te pepa ʼe alutahi mo Te Minisitelio ʼo Te Puleʼaga. Koutou tōkakaga ʼo taupau te pepa ʼaia ʼi takotou tohi ako. ʼE tuʼu ʼi te polokalama ʼaia te kapite pea mo te ʼu palakalafe ʼo te tohi pea mo te ʼu vaega ʼo te tohi ʼo Taniela ʼaē ka tou fai palalau anai kiai ʼi te vāhaʼa fuli. Ko te ʼu kiʼi nota ʼi te lalo pasina ʼi te pepa ʼo te polokalama ʼe fakamahino ai peʼe vakaʼi feafeaʼi anai ʼihi ʼu faʼahi ʼo te tohi ʼaia pea mo te temi ʼaē ka fai ai. ʼI te fakaʼosi ʼo te ʼu ako fuli ʼo te vāhaʼa, ʼe fakaloto mālohiʼi te tēhina ʼaē ʼe ina takitaki te ako ke ina fai mo te ako tohi he fakamanatu ʼo te ʼu vaega tāfito ʼo Taniela ʼaē ʼe tohi ʼi te polokalama ki te vāhaʼa ʼaia. Kapau ʼe feʼauga te temi, ʼe feala ke lau te ʼu vaega pea mo fai palalau kiai. ʼE ʼi ai te ʼu vaega ʼe tou vakaʼi anai lolotoga vāhaʼa e lua koteʼuhi ʼe fai hoholo te fakamahino ʼo te ʼu vaega ʼaia.
3 Tou Teuteuʼi Te Ako Loloto ʼAia: Neʼe faiga ke feʼauga te temi ʼi te vāhaʼa fuli ke vakaʼi māmālie te ʼu palakalafe ʼaē neʼe tuku mai ke vakaʼi. Ko kapite e fā ʼe nounou. Pea ʼi te fakaʼosi ʼo te ako ʼo te vāhaʼa ʼo te ʼaho 25 ʼo Sānualio, ʼe feala ke fai e te tēhina takitaki he fakamanatu ʼo Taniela 2:1-40. Ki te vāhaʼa ʼo te ʼaho 14 ʼo Fepualio, ʼe feala ke ina fai he fakamanatu ʼo Taniela 3:1-30. ʼI te vāhaʼa ʼo te ʼaho 25 ʼo ʼApelili, ʼe fai palalau anai ki te ʼu paki pea mo te ʼu vaega Tohi-Tapu ʼi te pasina 139. ʼE tonu ke fai palalau ki te paki ʼaē ʼe tuʼu ʼi te ʼu pasina 188 pea mo 189 ʼi te vāhaʼa ʼo te ʼaho 23 ʼo Maio.
4 Koutou teuteu lelei ki te ako ʼo te vāhaʼa fuli, pea mo koutou fiafia ʼi te fai hakotou ʼu tali. Koutou leleiʼia takotou pilivilesio ʼaē ke koutou kau ki te kautahi ʼa Sehova ʼi te kele, pea mo koutou maʼu te fakasiosio loloto pea mo te mahino ʼaē ʼe foaki mai e tana kau fakanofo agatonu. (Tan. 12:3, 4) Koutou fakaloto mālohi ʼaki he agalelei ia ʼihi ke nātou kau tuʼumaʼu ki te ako tohi. Tou tōkakaga fuli ki te folafola faka polofeta ʼa te ʼAtua ohage ko tona fakahā ʼi te tohi ʼa Taniela, ʼaē ʼe haʼu mai ia te ʼAtua.—Hep. 10:23-25; 2 Pet. 1:19.