ʼE Koutou Maʼu Koa Te Manatu Faka Sakilifisio?
1 Ko tatatou fakafetaʼi ki te ʼofa ʼaē neʼe fakahā e Sesu Kilisito maʼa te malamanei, ʼe tonu ke ina uga ia tatou fuli ke tou fakaʼaogaʼi totatou ʼu fealagia pea mo totatou mālohi ʼaki he loto faka sakilifisio. ʼE kole mai e te Tohi-Tapu: “Momoli outou sino ko he sakilifisio mauli mo maonioni pea mo taau ki te Atua, ko tautou tauhi fakapotopoto aia.” (Loma 12:1) Ko te sivi tuʼumaʼu ʼo tatou takitokotahi ʼe tokoni mai anai ke tou ʼiloʼi peʼe tou maʼuliʼi katoa te taʼi loto faka sakilifisio ʼaia ʼo mulimuli ki tatatou ʼu fealagia.
2 Moʼo Kumi Te ʼAtamai Mālama ʼo Te Tohi-Tapu: Kua koutou fakatuʼutuʼu koa he temi ke koutou lau tuʼumaʼu ai te Tohi-Tapu pea mo akoʼi? ʼE koutou mulimuli koa ki te polokalama ʼaia? Ko he agamāhani koa kia koutou te teuteuʼi lelei te ʼu fono ʼo te kokelekasio? ʼI tou ʼuhiga pule famili, ʼe ke fai tuʼumaʼu koa te ako faka famili ʼo tou loto fale? Moʼo fakahoko te ʼu faʼahi ʼaia, ʼe maʼua anai ke kita sakilifisioʼi te temi ʼaē ʼe kita fakaʼaogaʼi moʼo sioʼi te televisio peʼe ko te temi ʼaē ʼe kita fakaʼaogaʼi ki te olotinatea peʼe ʼi te tahi ʼu meʼa. Kae ʼe mole faigataʼa te sakilifisio ʼaia, heʼe tou ʼiloʼi ko te temi ʼaē ʼe tou fakaʼaogaʼi ki te Folafola ʼa te ʼAtua, ʼe ina taki anai tatou ki te maʼuli heʼegata!—Soa. 17:3.
3 Moʼo Akoʼi Takotou Kiʼi Fānau: ʼE lelei ki te fānau, ke nātou kamata ako te maʼuli faka sakilifisio ʼi tanatou kei liliki. Koutou akoʼi age kia nātou, ʼe ʼi ai he temi ki te gaoʼi, kae ʼe ʼi ai foki mo he temi ki te ʼu gāue ʼo te loto fale pea mo he temi ki te ʼu gāue faka teokalatike. (Ef. 6:4) Koutou tuku age kia nātou he ʼu kiʼi gāue ke nātou fai ʼi fale. Koutou fai he polokalama ke koutou fai faka mafola tuʼumaʼu ai mo nātou. Pea koutou tuku he faʼifaʼitaki lelei moʼo lagolago ki te ako ʼaia.
4 ʼI Te ʼu Gāue ʼo Te Kokelekasio: ʼE tapuakina he kokelekasio mo kapau ko nātou ʼo te kokelekasio, ʼe nātou fai he ʼu sakilifisio moʼo fakahoko he ʼu gāue ke fua manuʼia ai te kokelekasio. (Hep. 13:16) ʼE feala koa ke fakalahi te temi ʼaē ʼe koutou fakaʼaogaʼi ki te fai faka mafola pea mo te fai ʼo he ʼu tisipulo? ʼE koutou lagolago koa kia nātou ʼaē ʼe mahahaki peʼe kua matutuʼa, ʼo lagi koutou tokoni ki tonatou ʼaumai ki te ʼu fono?
5 ʼI muʼa ʼo tana foaki te sakilifisio fakaʼosi ʼo tona maʼuli, neʼe fakaloto mālohiʼi e Sesu tana ʼu tisipulo ke nātou fakamuʼamuʼa te ʼu gāue ʼo te Puleʼaga, kae nātou tuku ki muli ia meʼa fuli. (Mat. 6:33) Ko te taupau ʼo te faʼahiga maʼuli faka sakilifisio ʼaia, ʼe ina foaki mai anai he fiafia lahi ke tou haga tauhi fakafiafia kia Sehova.