Te Tali Ki ʼAkotou ʼu Fehuʼi
◼ ʼE lava lagolago feafeaʼi te ʼu tēhina tali kāiga ki te ʼu mātuʼa moʼo tokoni ki tanatou fānau ke nonofo lelei ʼi te ʼu fono?
ʼI te agamāhani ko te fānau ʼe mole nātou fia nonofo maʼu, ʼe mole nātou māhani ʼi te heheka fualoa. Koia ka ʼosi fono, pea ʼe nātou feleleʼi pea mo tuli te tahi ʼu tamaliki ʼi te Fale ʼo te Puleʼaga, peʼe ko te tahi koga meʼa ʼaē ʼe fai ai te fono, ʼi te taulaga motokā, peʼe ʼi te ala. Kae ʼe moʼoni te ʼui ʼa te tāʼaga lea: ‘Ko he tamasiʼi ʼe tuku ke faʼitaliha ʼe ina fakaufiufiʼi anai tana ʼu mātuʼa.’—Taag. 29:15.
Meʼa kovi foki, he ko ʼihi ʼi totatou ʼu tēhina mo tuagaʼane matutuʼa neʼe lāvevea kovi he neʼe ʼi ai te ʼu fānau neʼe nātou humuki nātou peʼe nātou fakatoka nātou. Neʼe mamahi lahi ai te ʼu hahaʼi matutuʼa, pea neʼe ʼi ai te ʼu meʼa neʼe tonu ke totogi te ʼu mātuʼa pea mo te kokelekasio. Moʼo puipui nātou pea mo te hahaʼi, ʼe mole tonu ke tuku te fānau ke feleleʼi pea mo gaoʼi ʼi te loto Fale ʼo te Puleʼaga pea mo tuʼa.
ʼE ʼui e te Tohi-Tapu, ʼe ko he maʼua ʼa te ʼu mātuʼa ke nātou akoʼi ki tanatou fānau te fakaʼapaʼapa ki te ʼu koga meʼa ʼaē ʼe fai ai tatatou tauhi. (Tnk. 5:1a) ʼI tatatou ʼu fono faka Kilisitiano pea mo te ʼu fakatahi, kua hinoʼi te ʼu tēhina tali kāiga ke nātou vakavakaʼi peʼe “fai ia meafuape i te fakapotopoto” pea ke maʼu te “tokalelei.” (1 Ko. 14:40; Kol. 2:5) ʼE tonu ke nātou nofo tokaga ʼi muʼa ʼo te fono, ʼi tona lolotoga fai, pea ʼi te hili ʼo te fono ʼaia, ʼi te loto kokelekasio pea mo tuʼa. Kapau ʼe lele he tamasiʼi peʼe pago, pea ʼe feala ki he tēhina tali kāiga ʼaki he agalelei, ke ina tāʼofi te tamasiʼi, pea ke ina fakamahino ki ai pe koʼe ʼe kovi tana aga ʼaia. Pea ʼaki he agalelei, ʼe tonu ke ina fakahā ki te ʼu mātuʼa ʼo te tamasiʼi ʼaia te fihifihia, pea mo te ʼaoga ʼaē ke nā leʼoleʼo tanā tamasiʼi. ʼE tonu ke tali lelei e te ʼu mātuʼa te tokoni ʼaia.
ʼE tou ʼiloʼi ʼi ʼihi temi, ʼe lava fetāgihi he ʼu kiʼi toe kei meamea peʼe kei liliki, peʼe lagi nātou fakalelu ʼi te ʼu fono. Ko te ʼu tēhina tali kāiga ʼaē ʼe lagi ʼōmai ia minuta e 20 ʼi muʼa ʼo te kamata ʼo te polokalama, ʼe feala ke nātou tāʼofi te ʼu ʼatu muli e lua peʼe tolu ʼo te fale fono maʼa te ʼu mātuʼa ʼaē ka fia heheka ai mo tanatou ʼu tamaliki. ʼE tonu ke tou lagolago ki te fakatuʼutuʼu ʼaia ʼo tou tuku ava te ʼu hekaʼaga ʼaia kia nātou.
Kapau ʼe fakalelu he tamasiʼi ki te polokalama, pea ʼe tonu ke foimo vakaʼi e te ʼu mātuʼa he puleʼaki ki te faʼahi ʼaia. Kapau ʼe logoaʼa te tamasiʼi ʼi te fono ka mole fai e te ʼu mātuʼa he meʼa, pea ʼe fakalelu ki te fono, pea ʼe tonu ki he tēhina tali kāiga ke ina kole fakalelei ki te ʼu mātuʼa peʼe feala ke nā ʼave te tamasiʼi ki tuʼa. Ka tou fakaafe he ʼu hahaʼi foʼou mo tanatou ʼu fānau ki te ʼu fono, pea ʼe tonu ke tou heheka tahi mo nātou pea mo tou tokoni kia nātou mokā fetāgihi peʼe fakalelu tanatou fānau ki te polokalama.
ʼE tou fiafia mokā tou sio ki he ʼu fānau taʼu kehekehe ʼi te Fale ʼo te Puleʼaga, pea mokā tou tokagaʼi te lelei ʼo tanatou aga ʼi te ʼapi ʼo te ʼAtua. (1 Tim. 3:15) Kapau ʼe nātou fakaʼapaʼapa ki te fakatuʼutuʼu ʼa Sehova ʼo ʼuhiga mo te tauhi, pea ʼe nātou fakaʼapaʼapa ai kia te ia pea ʼe leleiʼia ai nātou e te kokelekasio katoa.