ʼE ʼi Ai Te ʼu Maʼuli ʼe Tonu Ke Hāofaki!
1 ʼE fakamahino lelei mai e te Tohi-Tapu ko te finegalo ʼo Sehova “ke fakamauli te tagata fuape.” Kae ʼe fakalogo tāfito te maʼuli ʼo te lauʼi miliona hahaʼi ki tanatou tali ia Sehova ʼAtua pea mo tona Puleʼaga ʼaē ʼe takitaki e Sesu Kilisito. Ke feala hanatou tali te faʼahi ʼaia, ʼe maʼua ke nātou maʼu te ‘ ʼatamai mālama ʼo te moʼoni.’ (1 Tim. 2:3, 4) ʼE tou ʼiloʼi kua vave pulihi ʼi te kele ia te meʼa kovi fuli pe, pea mo fetogi anai ʼaki te mālama foʼou faitotonu ʼa te ʼAtua, kae neʼe toe fekauʼi foki tatou ke tou fai te gāue maʼuhiga moʼo hāofaki te hahaʼi.—Mat. 24:14; 28:19, 20; Loma 10:13-15.
2 He Koʼe ʼe Tonu Ke Tou Fakavilivili? Neʼe fai e Sesu te fakatokaga ʼo ʼuhiga mo te “mamahi lahi, nee heeki mo hoko he mea feia talu mai te kamataʼaga o te malama-nei.” (Mat. 24:21) ʼE iku anai te mamahi lahi ʼaia ki Halamaketone. (Apk. 16:16) ʼE lahi anai te hahaʼi ʼaē ka fakaʼauha, ʼo kau ai totatou ʼu kāiga, totatou ʼu vāhaʼa fale, totatou ʼu kaugā gāue, totatou ʼu kaugā ako pea mo totatou ʼu feʼilo, mo kapau ʼe mole nātou tali te logo lelei. Kae ohage ko te ʼAtua, ʼe tou fia maʼu te “tagata fuape,” he ko te ʼAtua neʼe ina fakahā tona ʼofa ki te malamanei katoa ʼi tana foaki mai tona ʼAlo ko Sesu Kilisito, ko he totogi maʼa tatou fuli. (Soane 3:16) ʼE tonu ke tou faʼafai ʼo fakaafe te hahaʼi fuli ke nātou feholaki mai ki te hāofakiʼaga ʼo te ʼAtua. Kapau ʼe tou fakahoko katoa te gāue fai faka mafola, pea ʼe feala anai ke tou maʼa mai te ligi toto.—Esk. 33:1-7; 1 Ko. 9:16.
3 Koteā Tatatou Fakatuʼutuʼu? ʼE fakahā mai ʼi te Folafola ʼa te ʼAtua te maʼuhiga ʼo te gāue fai faka mafola. Ohage ko tona ʼui e te ʼapositolo ko Paulo: “E pulei [tatou] e te ofa o Kilisito” ke tou maʼuli ʼo mulimuli ʼi te ʼu ala ʼo te ʼAtua. (2 Ko. 5:14) Pea tahi ʼaē meʼa, ʼe faka maʼuhigaʼi tuʼumaʼu e Te Tule Leʼo totatou maʼua ʼaē ke tou fai faka mafola. ʼE foaki tuʼumaʼu mai e Te Minisitelio ʼo Te Puleʼaga he ʼu tokoni moʼo fai te gāue fai faka mafola. Ko te kau tagata ʼāfea ʼe nātou fakatuʼutuʼu te gāue pea mo nātou fakaloto mālohiʼi tatou ke tou kau kiai. ʼE fakaafe atu koutou e tokotou ʼu kaugā fai faka mafola ke koutou kau mo nātou ki te minisitelio. ʼE tou logo tuʼumaʼu ki te ʼui ʼaē ke tou teuteuʼi te ʼu tohi ʼaē ka tou tufa, ke tou tufa te ʼu nusipepa pea mo te ʼu tohi, mo toe ʼaʼahi te hahaʼi, mo fai he ʼu ako Tohi-Tapu, pea mo fai te fagonogono faigamālie. ʼE tokoni mai te ʼu fakatuʼutuʼu fuli ʼaia ke tou fakahoko totatou maʼua ʼaē ko te hāofaki ia te maʼuli ʼo te hahaʼi.—1 Ko. 9:22, 23; Ef. 1:13.