“He Palalau ʼe Fai ʼi Te Temi Totonu”
1 ʼE faigataʼa koa kia koutou te vaevae ʼo te logo ʼo te maʼuli ki te hahaʼi? ʼE koutou manatu koa ʼe tonu ke koutou fai he ʼu palalau faigataʼa ke tupu ai he fia logo ʼa te hahaʼi? ʼI te temi ʼaē neʼe fekauʼi ai e Sesu tana ʼu tisipulo, neʼe ina ʼui fēnei kia nātou: “Pea i tautou fagona koutou fakaha mo tala: kua fakaovi mai te Puleaga o Selo.” (Mat. 10:7) Ko te logo ʼaia neʼe mole faigataʼa pea neʼe faigafua pe tona vaevae. ʼE mole heʼeki fetogi ia ʼaho nei.
2 ʼI te agamāhani, ʼe tonu ke nounou te ʼu ʼuluaki palalau. ʼI te felāveʼi ʼaē ʼa Filipo mo te enuke Etiopea, neʼe ina fehuʼi fēnei age: “E ke mahino kia mea e ke lau?” (Gaue 8:30) Neʼe fua lelei ai te fai palalau, he neʼe hoko te ‘fai palalau ʼi tona temi totonu’!—Taag. 25:11.
3 ʼE feala ke koutou fai feiā ʼi tokotou minisitelio. ʼO feafeaʼi? ʼO koutou vakavakaʼi pea mo filifili he ʼu kupu ʼe ʼalutahi mo te ʼu meʼa ʼaē ʼe hoko. Koutou fai he fehuʼi, pea mo fakalogo ki te tali.
4 Ko He ʼu Fehuʼi Tāfito: Moʼo kamata he fai palalau, koutou ʼahiʼahiʼi te ʼu fehuʼi ʼaenī:
◼ “ ʼE koutou lau māhani koa te faikole ʼo te Tāmai ʼe ʼi Selo?” (Mat. 6:9, 10) Koutou laulau te faikole, pea koutou ʼui fēnei age: “Ko ʼihi ʼe nātou fia ʼiloʼi pe ‘Ko ai te huafa ʼo te ʼAtua ʼaē neʼe ʼui e Sesu ʼe tonu ke tāpuhā?’ Ko ʼihi ʼe nātou fia ʼiloʼi pe ‘Koteā te Puleʼaga ʼaē neʼe ʼui e Sesu ke tou faikole kiai?’ Neʼe kua koutou maʼu koa he ʼu tali ki te ʼu fehuʼi ʼaia?”
◼ “ ʼE mole koutou fia ʼiloʼi koa pe ‘koteā te faka ʼuhiga ʼo te maʼuli?’ ” Koutou fakahā age ʼe ʼi ai tona pikipikiga mo te ʼatamai mālama ʼo ʼuhiga mo te ʼAtua.—Tnk. 12:13; Soane 17:3.
◼ “ ʼE koutou manatu koa ʼe pulihi anai te mate?” Fakaʼaogaʼi ia Isaia 25:8 pea mo Apokalipesi 21:4 moʼo tali kiai.
◼ “ ʼE ʼi ai koa he puleʼaki faigafua ki te maveuveu ʼo te malamanei?” Fakahā age ʼe akoʼi mai e te ʼAtua ke kita “ ʼofa ki [tokita] kāiga.”—Mat. 22:39, MN.
◼ “ ʼE fakaʼauha anai koa ʼi he ʼaho totatou kele ʼaki he maveuveu ʼi te ʼatulaulau?” Fakahā age te fakapapau ʼa te Tohi-Tapu, ʼe tuʼu anai te kele ʼo talu ai.—Pes. 104:5.
5 Ke faigafua pea mo mātala lelei takotou fakahā te logo lelei, pea ke koutou agalelei ʼi takotou kamata fai palalau. ʼE tapuakina anai e Sehova takotou ʼu faiga ʼaē ke koutou vaevae ki te hahaʼi “he folafola” ʼo te moʼoni.