ʼE Lelei Age Tona Faka Faigafua
1 He koʼe ʼe tokagaʼi e te hahaʼi te ʼu tamaliki ʼaē ʼe nātou faka mafola age te logo ʼo te Puleʼaga? Koteʼuhi ʼe faigafua tanatou ʼu palalau. Ko ʼihi kaugā faka mafola ʼe lagi nātou manatu ʼe tonu ke nātou faiva ʼaupito ʼi te palalau ke ʼi ai he fua ʼo tanatou faka mafola. Kae kua faka tokagaʼi, ʼe lelei age mo kapau ʼe faigafua pea mo matala lelei takita ʼu palalau mokā kita faka mafola.
2 Ko Sesu neʼe faigafua pea mo mahino lelei tana faka mafola ia te Puleʼaga ʼo te ʼAtua, pea neʼe ina akoʼi ki tana ʼu tisipulo ke nātou fai feiā. (Mat. 4:17; 10:5-7; Lu. 10:1, 9) Neʼe faigafua tana ʼu ʼuluaki palalau, tana ʼu fehuʼi, pea mo tana ʼu lea fakatātā moʼo uga te hahaʼi ke nātou fagono kia te ia, pea ke malave ki tonatou loto. (Soa. 4:7-14) ʼE lelei ke tou mulimuli ki tana faʼifaʼitaki pea mo tou fai he ʼu palalau ʼe mahino gafua.
3 ʼE tonu ke tou faka mafola te ‘logo lelei ʼo te puleʼaga.’ (Mat. 24:14) ʼE faigafua anai takotou ʼu palalau, mo kapau ʼe koutou fakatafito ki te Puleʼaga. Koutou palalau ki te ʼu meʼa ʼaē ʼe tuʼaniaʼi e te hahaʼi ʼaē ʼe koutou faka mafola ki ai. ʼI te agamāhani, ko te hahaʼi fafine ʼe nātou fia palalau ki te maʼuli faka famili, kae mole nātou fia palalau ki te ʼu faʼahi faka politike. Ka koutou palalau mo he tāmai, ʼe tuʼania tāfito ki te gāue, peʼe ko te puipui ʼo tona famili. ʼE fia palalau te kau tūpulaga ki tonatou ka haʼu, te hahaʼi vaivavai ki te pulihi ʼo tonatou ʼu mahaki pea mo tonatou maʼuli fīmālie. ʼI te agamāhani ʼe tuʼania tāfito te hahaʼi ki te ʼu meʼa ʼaē ʼe hoko ʼi tonatou fenua, ka mole nātou tuʼania ki te ʼu meʼa ʼaē ʼe hoko ʼi te ʼu fenua tai. ʼI takotou ʼosi fai palalau ki te ʼu meʼa ʼaē neʼe nātou fia logo kiai, koutou fakahā age kia nātou te ʼu tapuakina ʼaē ka maʼu e te hahaʼi fakalogo ʼi te takitaki ʼo te Puleʼaga ʼo te ʼAtua. Ko he ʼu palalau faigafua neʼe koutou filifili lelei, ʼe fakapipiki kiai he vaega Tohi-Tapu, ʼe lelei ʼaupito anai moʼo fakatupu te fia logo ʼo ia ʼaē ʼe koutou faka mafola ki ai.
4 ʼE koutou lava kamata fēnei he fai palalau:
◼ “Kua ke fakatokagaʼi ʼe lahi te ʼu mahaki ʼe maʼu e te hahaʼi, kae ʼe mole ʼi ai hona ʼu faitoʼo. Kae ʼe ke ʼiloʼi koa la neʼe fakapapau mai e te ʼAtua, kua ina vave molehi te ʼu mahaki kehekehe, pea mo te mate?” Koutou tuku ke ina tali atu, pea koutou lau ia Apk. 21:3, 4.
5 ʼAki he ʼu palalau ʼe matala lelei pea mo faigafua, koutou faiga ke malave ki te ʼu fakakaukau pea mo te loto ʼo he tokolahi ʼo tokotou telituale, ʼo koutou tokoni age ke nātou ako pe ko ai ia Sehova, pea mo nātou maʼu te ʼamanaki ʼo te maʼuli heʼegata.—Soa. 17:3.