Koutou Fakalogo Lelei
1 ʼE tonu ke tou ako ia te fakalogo lelei. Tahi ʼaē meʼa, ʼe maʼua kia ia ʼaē ʼe fakalogo ke fia ako pea mo ina fia fakaʼaogaʼi te ʼu meʼa ʼaē ʼe logo kiai. Pea neʼe fakahā lelei mai e Sesu ʼe tonu ke tou ‘tokaga ki tatatou faʼahiga fagono.’—Lu. 8:18.
2 ʼE ʼaoga tāfito te faʼahi ʼaia mokā tou kau ki te ʼu fono ʼo te kokelekasio pea mo te ʼu fakatahi lalahi. ʼE ko te ʼu lakaga ʼaia ʼaē ʼe tonu ai ke tou fakalogo lelei. (Hep. 2:1) Koʼeni te ʼu tokoni ʼe ʼaoga anai kia koutou ke feala hakotou fakalogo lelei ʼi te ʼu fakatahi faka Kilisitiano ʼaia.
◼ Koutou fakaʼapaʼapa ki te maʼuhiga ʼo te ʼu fono. ʼE ko he faʼahi tāfito ʼaia ʼe ‘akoʼi ai tatou e Sehova’ ʼaki tana “tagata tauhi ʼapi agatonu.”—Isa. 54:13; Lu. 12:42, MN.
◼ Koutou teuteuʼi fakatomuʼa. Fakasiosio te ʼu akonaki ʼaē ka vakaʼi ʼi te ʼu fono, pea mo koutou tokakaga ʼo ʼaumai takotou Tohi-Tapu, pea mo te ʼu tohi ʼaē ka fakaʼaogaʼi.
◼ Lolotoga te ʼu fono, koutou faiga mālohi ke koutou fakalogo lelei. ʼAua naʼa koutou fai palalau mo nātou ʼaē ʼe koutou heheka fakatahi, peʼe koutou sioʼi te ʼu meʼa ʼaē ʼe fai e ʼihi ʼi te fono. ʼAua naʼa koutou manatu ki te ʼu meʼa ʼaē ka koutou fai anai ʼi te ʼosi fono, peʼe ki he ʼu meʼa ʼa koutou totonu.
◼ Koutou fakakaukauʼi te ʼu akonaki. Koutou fai te ʼu fehuʼi ʼaenī: ‘Koteā tona ʼaoga kia ʼau? Ko te temi fea ʼaē ʼe tonu ke ʼau fakaʼaogaʼi ai?’
◼ Koutou tohi fakanounou te ʼu puani tāfito pea mo te ʼu vaega Tohi-Tapu. ʼE tokoni atu anai ke koutou fakakaukauʼi te ʼu akonaki, pea mo koutou manatuʼi te ʼu puani tāfito, ke feala hakotou fakaʼaogaʼi ki ʼamuli.
3 Koutou Akoʼi Takotou Fānau Ke Nātou Fakalogo: ʼE ʼaoga te ako fakalaumālie ki te fānau. (Teu. 31:12) ʼI te ʼu temi muʼa, ʼi te hahaʼi ʼa te ʼAtua, “ko nātou fuli ʼaē neʼe kua popoto ʼi te fakalogo,” neʼe tonu ke nātou fakalogo lelei ki te lau age ʼa te Lao. (Neh. 8:1-3) Kapau ʼe fakalogo lelei te ʼu mātuʼa ʼi te ʼu fono, pea ʼe toe fai feiā anai e tanatou fānau. ʼE mole lelei te ʼaumai ʼo he ʼu kiʼi meʼa gaoʼi maʼa nātou liliki, pe ko he ʼu tohi pena paki. Tahi ʼaē meʼa, ʼaua naʼa koutou hoko feʼoloʼaki ki te fale vao, heʼe mole anai nātou fakalogo lelei. “ ʼE nonoʼo te agavale ʼi te loto ʼo te tama,” koia ʼe tonu ai ki te ʼu mātuʼa ke nātou vakavakaʼi lelei ke heheka maʼu tanatou ʼu fānau, ke feala hanatou fakalogo ʼi te ʼu fono.—Taag. 22:15.
4 Kapau ʼe tou fakalogo lelei, pea ʼe tou fakahā ai ʼe tou agapoto moʼoni pea ʼe ‘lahi te ʼu meʼa ʼaē ʼe tou fia ako.’—Taag. 1:5.