Koutou Fai He Fagonogono Lelei
1 Neʼe ʼui e Sesu “ ʼofa ki tou kāiga ohage pe ko koe totonu.” (Mat. 22:39, MN ) ʼE moʼoni ʼe koutou “fai ia te lelei” ki totatou ʼu kaugā fagona Kilisitiano, kae ʼe feala koa ke koutou fakalahi tokotou ʼofa ki ʼokotou ʼu vāhaʼa fale? (Kal. 6:10) ʼO feafeaʼi?
2 ʼO Koutou Fakahā Takotou Lotu: ʼE ʼiloʼi koa e tokotou ʼu vāhaʼa fale ko koutou ko te Fakamoʼoni? Kapau ʼe mole heʼeki nātou ʼiloʼi, pea he koʼe ʼe mole koutou ʼaʼahi nātou ʼi te fai faka mafola? ʼE lagi koutou punamaʼuli anai ki tanatou faʼahiga tali! Peʼe kapau ʼe faigafua age maʼa koutou, koutou ʼahiʼahi ia te fagonogono faigamālie. ʼE lagi ko te ʼu ʼaho ʼaē ʼe koutou sio ai ʼe nātou gāue ʼi tonatou malaʼe, peʼe nātou haʼele ʼi te ala. Koutou ʼolo atu kia nātou ʼaki he malimali. Koutou faiga ke koutou palalau age ki te ʼu meʼa ʼaē ʼe koutou tui kiai, mo te koga meʼa ʼaē ʼe tuʼu ai te Fale ʼo te Puleʼaga, te ʼu meʼa ʼaē ʼe fai ai, pea mo koutou fakahā age pe ko ai te tahi ʼu hahaʼi ʼo tokotou kolo ʼe ʼolo ki te fale fono ʼaia, pea mo koutou fakaafe nātou ki te ʼu fono. Koutou faiga ke koutou faka mafola te logo lelei ki te hahaʼi fuli ʼaē ʼe koutou ʼiloʼi.—Gaue 10:42; 28:23.
3 ʼO Koutou Fai He Aga ʼe Lelei: ʼE feala ke tokagaʼi e te hahaʼi takotou agalelei pea mo tupu ai he fealagia ke koutou fai he fagonogono faigamālie. Tahi ʼaē meʼa ko takotou aga ʼe ina ‘fakaʼaliʼaliki te akonaki ʼa te ʼAtua.’ (Tito 2:7, 10) Koutou fakahā ʼe koutou fia tokoni moʼoni ki tokotou ʼu vāhaʼa fale. Koutou agalelei pea mo lotomahino. Koutou fakaʼapaʼapa ki tonatou maʼuli ʼi tonatou loto fale, pea ʼaua naʼa koutou logoaʼa. Kapau ʼe ʼi ai he tahi ia nātou ʼe mahaki, koutou aga faka kāiga kia ia, pea mo koutou tokoni age ki ai. Kapau ʼe koutou sio ki he famili foʼou ʼi tokotou kolo, pea koutou fakamālo age kia nātou. Kapau ʼe koutou fai he ʼu aga lelei feiā, pea ʼe malave ki te hahaʼi, pea ʼe leleiʼia e Sehova.—Hep. 13:16.
4 ʼO Koutou Aga Maʼa: Ko he vāhaʼa fale lelei ʼe tonu ke tokaga ke maʼa tona ʼapi. ʼE ko he faʼifaʼitaki lelei mo kapau ʼe maʼa tokotou ʼapi pea mo tokotou malaʼe. Kae ʼe valokiʼi anai te logo ʼo te Puleʼaga, mo kapau ʼe ʼuli tokotou ʼapi pea mo leta haʼele te ʼotaʼota ʼi te malaʼe. Koia ʼe maʼuhiga ʼaupito ke maʼa tokotou ʼapi, tokotou malaʼe, pea mo takotou motokā.
5 Kapau ʼe koutou fakahā he loto tokaga ki te hahaʼi ʼaē ʼe mole kau ki te kokelekasio faka Kilisitiano, pea ʼe koutou fakahā ai ʼe koutou ʼoʼofa ki tokotou kāiga. Koteā anai tona fua? Ko ʼihi ʼi “tanatou sio mata ki takotou ʼu gāue lelei” e lagi nātou “faka kolōliaʼi [anai] te ʼAtua.”—1 Pet. 2:12, MN.