“Te Folafola a Te Atua . . . e Gaue”
1 Neʼe tohi fēnei e te ʼapositolo ko Paulo: “E mauli te folafola a te Atua, pea e gaue.” (Hep. 4:12) Koteā te faka ʼuhiga ʼo tana ʼu palalau ʼaia? Ko tona faka ʼuhiga, ko te folafola peʼe ko te logo ʼa te ʼAtua ʼaē ʼe tuʼu ʼi te Tohi-Tapu, ʼe feala ke ina fai he ʼu fetogi lahi ʼi te hahaʼi. Ko te poto faka Tohi-Tapu, ʼe ina maʼu te mālohi moʼo fetogi te maʼuli ʼo he tahi ke lelei age. Ko te fakaloto fīmālie pea mo te ʼamanaki ʼaē ʼe maʼu ai, ʼe ina taki mai te hahaʼi kia Sehova ʼAtua, te Matapuna ʼo te Maʼuli. Ko te logo ʼaē ʼe maʼu ai, ʼe ina lava ʼaumai te hahaʼi agatonu ki te ala ʼaē ʼe ina taki ki te maʼuli heʼegata. Kae ke feala hatatou sio ki te ʼu fua ʼaia, ʼe tonu ke tou fakaʼaogaʼi te Tohi-Tapu mokā tou faka mafola ki te hahaʼi.
2 Koutou Lau He Vaega ʼi Te ʼu Temi Faigamālie Fuli: ʼE hā mai ʼe lahi te ʼu kaugā fagona kua tahitahiga tanatou fakaʼaogaʼi ia te Tohi-Tapu mokā nātou faka mafola. ʼE koutou feiā koa mo koutou? Mai tona ʼuhiga ʼaē kua lahi te hahaʼi ʼe hage ʼe mole maʼu honatou temi moʼo fai palalau fualoa mo tatou, koia lagi kua koutou māhani ʼi te foaki ʼo he tohi, peʼe koutou fakamatala fakanounou age he vaega. Kae ʼe fakaloto mālohiʼi te kau fai faka mafola fuli, ke nātou faiga mālohi mokā nātou tala te logo lelei, ke nātou lau he vaega Tohi-Tapu e tahi ki te hahaʼi, ke feala hanatou sio ko tatatou logo ʼe tuʼu ʼi te Folafola ʼa te ʼAtua.
3 ʼE kei fakaʼapaʼapaʼi te Tohi-Tapu, tatau aipe peʼe kua tokosiʼi te hahaʼi ʼaē ʼe nātou lau. Māʼia mo te hahaʼi ʼaē ʼe maʼumaʼua, ʼi te agamāhani ʼe nātou fakaʼaogaʼi anai he ʼu kiʼi minuta moʼo fakalogo ki te logo ʼaē ʼe lau fakahagatonu age ʼi te Folafola ʼo te ʼAtua. Kapau ʼe filifili lelei he vaega, ʼo lau ʼaki he agamālū pea mo fakamahino fakanounou, pea ʼe feala ki te mālohi ʼo te folafola ʼa Sehova ke fua lelei kia ia ʼaē ʼe fakalogo kiai. Kae ʼe lava feafeaʼi hakotou lau age he vaega faka Tohi-Tapu ʼi takotou ʼosi fai takotou ʼu ʼuluaki palalau?
4 Koutou ʼAhiʼahi Te Faʼahi ʼAia ʼi Te Tufa ʼo Te ʼu Nusipepa: ʼE ʼi ai te tagata taupau feʼaluʼaki ʼe ina fakaʼaogaʼi fakalelei te ʼu vaega mokā ina tufa te ʼu nusipepa. ʼE ina ʼave he kiʼi Tohi-Tapu veliveli ʼi tona tagaʼi kofu. ʼI tana ʼosi fakahā te ʼu nusipepa, pea mo fakahāhā fakanounou he alatike, ʼe ina avahi te Tohi-Tapu pea mo ina lau he vaega ʼe ʼalutahi mo te alatike. ʼE feala hakotou fai te fehuʼi ʼaenī, “Koteā tau manatu ki te fakapapau fakaloto mālohi ʼaenī?,” ʼosi ʼaia pea koutou lau age he vaega.
5 Koutou fakatuʼutuʼu ke koutou lau ki te hahaʼi he vaega Tohi-Tapu e tahi peʼe lua. Ko tona mālohi ʼe feala ke ina faka fealagia ki te tokolahi ʼaupito ke nātou fia ʼiloʼi te ʼAtua.—Soa. 6:44.