Koutou Haga ‘Fai Te Meʼa ʼAē ʼe Lelei’
1 ʼE ko he meʼa lelei ʼaē neʼe koutou fai, ʼi takotou liliu ko he kaugana ʼa Sehova ʼAtua. Kae ʼi te temi nei, ʼe ko he meʼa faigataʼa ʼi te ʼu temi fakakinakina ʼaenī te haga “fai ʼo te meʼa ʼaē ʼe lelei.” (Kal. 6:9, MN ) Logola tona faigataʼa, kae ʼe feala hakotou fai te faʼahi ʼaia. ʼO feafeaʼi?
2 Koutou Maʼu Te Faʼahiga Manatu ʼa Sesu: Ohage ko Sesu, ʼe feala hakotou kātakiʼi te ʼu faigataʼaʼia, mo kapau ʼe koutou haga manatuʼi te ʼamanaki ʼo te Puleʼaga. (Hep. 12:2, 3) Ke koutou ʼiloʼi papau ʼe ʼofa Sehova kia koutou, pea ʼe ina loto ke fua manuʼia tokotou maʼuli. (2 Pet. 3:9) Koutou falala katoa kia te ia, ʼo koutou faka tui ʼe tokoni atu anai. (1 Ko. 10:13) Koutou kātaki ʼi te faikole, ʼo koutou kole kia Sehova ke tokoni atu ke koutou faʼa kātaki. (Loma 12:12) Koutou fakafiafia heʼe ko takotou faʼa kātaki ʼe ina fakaliliu anai koutou ko he tahi ʼe ʼofainaʼi ia mata ʼo te ʼAtua. (Loma 5:3-5) Ko takotou agatonu ʼo taupau “te faʼahiga manatu ʼaē neʼe maʼu e Kilisito Sesu,” ʼe ina fakafiafia anai koutou pea mo fakafiafia te loto ʼo Sehova.—Loma 15:5, MN; Taag. 27:11.
3 Koutou Haga Fai Te ʼu Meʼa ʼAē ʼe Lelei: Koutou fakaʼaogaʼi katoa te ʼu fakatuʼutuʼu fuli ʼaē neʼe fai e Sehova maʼa tana hahaʼi, moʼo tokoni ki te hahaʼi ke nātou fai te meʼa ʼaē ʼe lelei. Koutou taupau tuʼumaʼu he polokalama lelei moʼo lau te Folafola ʼa te ʼAtua pea mo ako te ʼu tohi faka Tohi-Tapu ʼo te tagata kaugana agatonu mo poto. Koutou teuteuʼi lelei te ʼu fono fuli ʼo te kokelekasio, koutou ʼolo kiai pea mo fai ai hakotou ʼu tali. ʼI muʼa pea ʼi te fakaʼosi ʼo te ʼu fono faka Kilisitiano ʼaia, koutou fakatahi mo tokotou ʼu tēhina pea mo tuagaʼane fakalaumālie. Koutou fai hakotou ʼu fakatuʼutuʼu fakapotopoto ʼo ʼuhiga mo te minisitelio, ke feala hakotou kau katoa ki te faka mafola, pea mo hikihiki takotou ʼu fealagia moʼo tala te logo lelei ki te hahaʼi.
4 Kapau ʼe koutou fai feiā, pea ʼe koutou haga fai anai te meʼa ʼaē ʼe lelei, pea mo fiafia ʼaupito ai. ʼO ʼuhiga mo te faʼahi ʼaia, neʼe ʼui fēnei e te tēhina Italia: “ ʼE moʼoni, ka tō te afiafi, pea ka ʼau liliu ki fale ʼi taku ʼosi gāue kia Sehova lolotoga te ʼaho katoa, ʼe ʼau logo gaʼegaʼe. Kae ʼe ʼau fiafia pea ʼe ʼau fakamālo kia Sehova he neʼe ina foaki mai te fiafia ʼaē ʼe mole lava pulihi e he tahi.” Koia, koutou haga fai te meʼa ʼaē ʼe lelei, pea ʼe koutou fiafia lahi ai anai.