ʼAua Naʼa Tou Fakatātāʼofi!
1 Ka tou tokalelei ki te fai faka mafola ʼi te ʼu ʼapi, ko te meʼa ʼaē ʼe lagi faigataʼa tāfito ʼe ko tatou totonu. Ko tatatou manatu ʼaē ʼe mole tou lavaʼi te faʼahi ʼaia, ʼe ina tāʼofi anai tatou ke mole tou ʼolo ʼo tala te moʼoni ki “te tagata fuape.” (1 Tim. 2:4) Kae ʼe mole tonu ke tou lotolotolua moʼo faka mafola te logo lelei. Koteā tona tupuʼaga?
2 Ko Te Logo ʼa Sehova: ʼE tala e Sehova tana logo ʼaki te Tohi-Tapu. Ka tou ʼave te logo ʼaia ki te hahaʼi, pea ʼe tou tala tana ʼu manatu, ka mole ʼa tatou. (Loma 10:13-15) Ka fakafisi te hahaʼi ki te logo ʼo te Puleʼaga, ʼi tona fakahagatonu ʼe nātou fakafisi kia Sehova. Kae ʼe mole tou lotovaivai ai. ʼE tou falala ko te logo ʼaia, ʼe malave anai ki te ʼu loto ʼo te hahaʼi ʼaē ʼe nātou loto ke fetogi te ʼu ʼaluʼaga ʼo te malamanei, pea mo nātou ʼiloʼi ʼe maʼuhiga kia nātou te ʼu meʼa fakalaumālie.—Esk. 9:4; Mat. 5:3, 6.
3 ʼE Taki Mai Te Hahaʼi e Sehova: Ki muʼa atu neʼe ʼi ai te ʼu hahaʼi neʼe nātou fakafisi mai, pea ʼi te temi nei kua lagi nātou fakalogo, heʼe kua fetogi tonatou ʼu ʼaluʼaga, pea kua mālū tonatou loto. ʼI te temi nei kua lagi fakahā e Sehova tona finegaloʼofa kia nātou ʼaia, pea kua ‘ina taki mai nātou.’ (Soa. 6:44, 65) Ka hoko te faʼahi ʼaia, pea ʼe tou fia tali ke fakaʼaogaʼi tatou e Sehova pea mo mulimuli ki te takitaki ʼa te kau ʼaselo moʼo maʼu te ʼu hahaʼi ʼaia.—Apk. 14:6.
4 ʼE Tuku Mai e Te ʼAtua Tona Laumālie: Ko te laumālie maʼoniʼoni ʼe ina faka fealagia kia tatou ke tou palalau “ ʼaki he lototoʼa ʼi te mālohi ʼo Sehova.” (Gaue 14:1-3, MN ) Kapau ʼe tou manatuʼi ʼe lagolago te mālohi ʼaia ki tatatou minisitelio, pea ʼe mole tou tuʼania anai ʼi te palalau ʼo ʼuhiga mo te moʼoni, ki totatou ʼu vāhaʼa fale, totatou ʼu kaugā gāue, totatou kaugā ako, totatou ʼu famili, pea mo te hahaʼi popoto pea mo maʼu koloā.
5 Neʼe Akoʼi Mai e Sesu Tona Faʼahiga Fai: Neʼe fakaʼaogaʼi e Sesu te ʼu fehuʼi neʼe ina uga te hahaʼi ke nātou fakakaukau te ʼu lea fakatātā neʼe ʼaoga moʼoni kia nātou, pea mo fakaʼaogaʼi te ʼu vaega ke nātou fakakaukauʼi. Neʼe ina fakamahino te moʼoni, ʼi hona ʼaluʼaga faigafua, mo taulekaleka, neʼe haʼu mai tona loto. ʼE kei ʼaoga ke tou mulimuli ki te ʼu faʼahiga fai ʼaia ia ʼaho nei. (1 Ko. 4:17) ʼE lagi kehekehe te ʼu ʼaluʼaga ʼaē ʼe tou faka mafola ai, kae ʼe mole fetogi te logo mālohi ʼo te Puleʼaga.
6 ʼE tou maʼu te pilivilesio ʼaē ke fakaʼaogaʼi tatou e Sehova moʼo tokoni ki te hahaʼi ʼi he ʼaluʼaga makehe, ke hāofaki nātou. ʼAua naʼa tou fakatātāʼofi! Tou lototoʼa pea mo tuku kia Sehova “ke ina fakaāva maʼa tatou he matapā ki te folafola,” ke feala hatatou tala te logo lelei ki te hahaʼi.—Kol. 4:2-4, MN.