ʼE Koutou Lava ʼOlo Koa ʼo Gāue ʼi Te Potu ʼAē ʼe ʼAoga Tāfito Ai?

¹ Kua koutou fakakaukau koa la ke koutou ʼolo ʼo gāue ʼi he potu ʼe ʼaoga ai he tahi kau fai faka mafola ʼo te Puleʼaga? Kapau ʼe fakaafe atu koutou ke koutou “fakalaka [age] . . . o tokoni,” pea ʼe koutou tali anai koa ohage ko te ʼapositolo ko Paulo? (Gaue 16:9, 10) ʼE lahi te ʼu kokelekasio ʼe ʼaoga kiai he ʼu famili ʼe nātou mālolohi ʼi te faʼahi fakalaumālie, peʼe ko he ʼu pionie moʼo tokoni ki te gāueʼi ʼo te telituale, peʼe ko he ʼu tagata ʼāfea pea mo he ʼu tagata faifekau faka minisitelio moʼo tokoni ki te takitaki. Ko te telituale ʼe lagi ko he ʼu kiʼi kolo liliki ʼe mavetevete ʼi he potu fenua lahi peʼe ko he ʼu motu. ʼE lagi mamaʼo ʼaupito te Fale ʼo te Puleʼaga pea ʼe lagi faigataʼa te maʼu ʼo he gāue. Kae ʼe koutou tali anai koa te faʼahi ʼaia? ʼE lava fua lelei feafeaʼi?

² ʼE ʼAoga Te Tui Pea Mo Te Falala: ʼAki te fakatotonu ʼa te ʼAtua, neʼe mavae ia Apalamo ʼi tona fenua ko Ule, pea neʼe fagona ia kilometa e 1000 ki Halane mo tona ʼohoana, tona fakafotu, pea mo tana tāmai ko Tela, ʼaē neʼe kua matuʼa. (Sen. 11:31, 32; Neh. 9:7) ʼI te ʼosi mate ʼa Tela, neʼe fakatotonu e Sehova kia Apalamo, ʼi tona taʼu 75, ke mavae ʼi Halane mo tona famili, ʼo ʼolo ki te fenua ʼe fakahā age anai e te ʼAtua. Pea neʼe “mavae” ia Apalamo, mo Salai, pea mo Lote. (Sen. 12:1, 4, 5) ʼE mahino ia neʼe mole mavae ia Apalamo ke ʼalu ʼo gāue ʼi he fenua neʼe ʼaoga ʼaupito ai he kau minisi. Kae neʼe ʼi ai te faʼahi neʼe tonu ke ina maʼu ke feala hana mavae. Koteā?

³ Neʼe ʼaoga kia Apalamo ke tui pea mo falala moʼo fakahoko te fakatotonu ʼaia. Neʼe tonu ke ina fetogi tana manatu pea mo tona faʼahiga maʼuli. Neʼe tonu ke mavae mai te fīmālie ʼaē neʼe ina maʼu ʼi tana nofo mo tona ʼu kāiga. Kae neʼe falala ko Sehova ʼe ina puipui anai ia ia pea mo tona famili. Ko te tokolahi ia ʼaho nei ʼe nātou maʼu te taʼi falala ʼaia kia Sehova.

⁴ Ko He Gāue Faka Temi: Kua koutou ʼiloʼi koa te ʼu lelei lahi ʼaē ʼe kita maʼu mokā kita ʼalu ʼo gāue ʼi he ʼu telituale ʼe tuʼu mamaʼo? ʼI te taʼu ʼaenī kua ʼosi, ʼi ʼihi fenua ko te toko lauʼi afe kau fai faka mafola neʼe nātou tokoni ki te ʼu lauʼi teau kokelekasio moʼo fai te ʼu telituale ʼaē ʼe tahitahiga tona fai. Maʼa ʼihi, neʼe lagi tonu ke nātou ʼolo ki he ʼu koga meʼa mamaʼo. Neʼe ʼi ai koa hona ʼaoga kia nātou?

⁵ Neʼe tohi fēnei e te tēhina: “Neʼe ʼau lotolotolua, ʼi te ʼuluaki ʼui mai ʼaē ke ʼau ʼalu mo he ʼu tēhina mo tuagaʼane ki he telituale ʼe tahitahiga tona fai. Kae neʼe ʼau tali te fakatuʼutuʼu ʼaia. ʼE mole ʼau fakahemala ki te faʼahi ʼaia, pea tahi neʼe ina fetogi toku maʼuli. ʼE ʼau fakamālo kia Sehova ʼi te ʼaho fuli, ki te pilivilesio ʼaē ke ʼau kau ki te kau gāue ʼaia.” Neʼe ʼui e te tahi tēhina, ʼi tona ʼu taʼu e 20 ʼi te moʼoni, ʼe kau te gāue ʼaia ki te ʼu meʼa ʼaē ʼe mole galo anai kia ia! Neʼe ʼui fēnei e te talavou: “ ʼI toku maʼuli, ʼe mole he tahi meʼa ʼe lelei age ʼi te gāue ʼaia!” ʼE lahi te kau fai faka mafola ʼe nātou tali, ko te faʼahiga gāue ʼaia ʼi te ʼu koga meʼa ʼaē ʼe ʼaoga lahi ai, tatau aipe peʼe faka temi, kae neʼe fakaʼāsili loloto ai tanatou leleiʼia te minisitelio. Koutou fai palalau mo nātou ʼaē neʼe nātou fai te faʼahi ʼaia. ʼE koutou fakatokagaʼi anai, neʼe hikihiki ai tonatou maʼuli fakalaumālie, pea ʼe nātou toe tali anai te gāue ʼaia mo kapau ʼe tuku age te fealagia ʼaia.

⁶ ʼE ʼi ai te tahi ʼaoga, mo kapau ʼe tou tali ke tou ʼolo ʼo gāue faka temi ʼi te ʼu koga meʼa ʼaē ʼe ʼaoga lahi ai he kau gāue. Ko nātou ʼaē ʼe nātou fai te faʼahi ʼaia, ʼe nātou lava ʼiloʼi ai “te paʼaga ka puli anai kiai” mo kapau ʼe nātou toe ʼolo ki he tahi koga meʼa.—Lu. 14:28, MN.

⁷ ʼE loto e Sehova ke tala te logo lelei “ki te kelekele katoa” ʼi muʼa ʼo te fakaʼosi. (Mat. 24:14) ʼI takotou ʼiloʼi te faʼahi ʼaia, ʼe koutou tali anai koa ke koutou ʼolo ki te potu ʼaē ʼe ʼaoga lahi ai he kau gāue? ʼE lahi te ʼu koga meʼa ʼaē ʼe ʼaoga ai he kau gāue. ʼE lava fakahā atu e te taupau faka silikosikilipisio pe kofea ʼaē ʼe koutou lava ʼolo ʼo tokoni ai.

⁸ Koutou ʼOlo Ki Te Potu ʼAē ʼe ʼAoga Tāfito Ai: Kua koutou letelete koa? ʼE lī koa hokotou totogi ʼi te māhina fuli? Kapau mole koia ʼaia, pea ʼe feala koa ke ʼi ai hakotou kiʼi matani gāue? ʼE koutou lava gāue koa ʼi he potu pe ʼe koutou ʼi ai, mo kapau ʼe koutou fakaʼaogaʼi te telefoni peʼe ko te olotinatea? Kapau ʼe mole koutou lava ʼolo ki he tahi koga meʼa, ʼe koutou lava tokoni koa ki he tahi ʼo tokotou famili ke ʼalu ʼo gāue ai?

⁹ Kapau ʼi takotou ʼosi faikole ʼe koutou sio ʼe koutou lava ʼolo ki he potu ʼe ʼaoga lahi ai he kau gāue, pea koutou palalau ki te faʼahi ʼaia mo tokotou famili pea mo te kau tagata ʼāfea ʼo tokotou kokelekasio. ʼOsi ʼaia, pea koutou fai hakotou tohi ʼo ʼavage ki te kau tagata ʼāfea ke feala hanatou tohi tanatou manatu, pea mo tanatou tali ia te faʼahi ʼaia.

¹⁰ Koteā ʼaē ʼe tonu ke koutou fakatuʼu ʼi takotou tohi ʼaia? Tokotou taʼu, te ʼaho ʼaē neʼe koutou papitema ai, takotou ʼu gāue ʼi te kokelekasio, peʼe kua koutou ʼohoana, pea kapau ʼe ʼi ai hakotou ʼu fānau ʼe kei liliki. Koutou fakahā te koga meʼa ʼaē ʼe koutou fia ʼolo ʼo gāue ai, ʼo mulimuli ki te ʼu meʼa ʼaē ʼe ʼaoga kia koutou.

¹¹ ʼE koutou gāue mālohi koa pea mo fai hakotou ʼu fakatuʼutuʼu? ʼE koutou lava ʼolo koa ʼo gāue ʼi he koga meʼa ʼe ʼaoga lahi ai he kau gāue? Kapau ʼe feala pea koutou tokagaʼi te ʼu tapuakina lahi ʼaē ʼe foaki tuʼumaʼu e Sehova kia nātou ʼaē ʼe falala kia te ia, ʼo nātou maʼuli faka sakilifisio!—Pes. 34:8; Mlk. 3:10.