Ko Te Faka Mafola ʼo Te Puleʼaga ʼe Tokoni Ki Te Hāofaki ʼo Te Hahaʼi!
1 ʼE lolotoga fai nei ʼi te malamanei katoa, te gāue maʼuhiga ʼaupito ʼaia. ʼE vakavakaʼi te gāue ʼaia e Sehova ʼAtua, mo Sesu Kilisito pea mo te lauʼi miliate kau ʼaselo. Koteā te gāue ʼaia, pea he koʼe ʼe maʼuhiga? ʼE ko te faka mafola ʼo te Puleʼaga, pea ʼe tokoni ki te hāofaki ʼo te hahaʼi.—Loma 1:16; 10:13, 14.
2 ʼE lagi manatu e ʼihi hahaʼi ʼe ʼaoga lahi anai tatatou fia tokoni ki te hahaʼi, mo kapau ʼe tou faiga ke fetogi te ʼu ʼaluʼaga ʼo te malamanei. Tokolahi ʼe nātou faiga tāfito ke nātou fakatuʼu te tokalelei, peʼe nātou faitoʼo te ʼu mahaki, peʼe nātou hikihiki te ʼaluʼaga faka ekonomika. Kae koteā ʼaē ka tokoni lahi anai ki te hahaʼi?
3 Ko He Gāue ʼe Maʼuhiga ʼAupito: ʼE gata pe ki te logo ʼo te Puleʼaga ʼe ina fakamahino te ʼuhiga ʼo te maʼuli, te tupuʼaga ʼo te mamahi ʼa te tagata, pea mo te ʼamanaki pe e tahi ʼe feala ke tou falala kiai ʼo ʼuhiga mo te ka haʼu. ʼAki te logo lelei, ʼe feala ki te hahaʼi ke nātou liliu ʼo kaumeʼa mo Sehova pea mo nātou maʼu ai “te tokalelei o te Atua aia e fakalaka i te atamai fuape.” (Filp. 4:7) ʼE gata pe ki te logo ʼo te Puleʼaga ʼe ina foaki he takitaki ʼaoga moʼo tokoni ki te hahaʼi ke nātou tauʼi te ʼu fihifihia ʼo te maʼuli ʼi te temi nei, pea mo fakamahino peʼe nātou lava hāo feafeaʼi ʼi te temi ʼaē ka fakaʼauha ai te mālama agakovi ʼi te ka haʼu. (1 Soa. 2:17) Koia ʼe mole tonu ai koa la ke tou faiga mālohi ke tou faka mafola te Puleʼaga?
4 Koʼeni te faʼifaʼitaki: Koteā anai te gāue ʼaē ʼe lelei ke fai moʼo tokoni ki he kolo ʼe lolotoga momoe te hahaʼi, kae ʼe ʼamanaki holo te kaupā ʼaē ʼe ina tāʼofi te vai? ʼE tonu koa ke ʼohu ki tuʼa te vai ʼaē ʼe tāʼofi e te ʼu kaupā ʼaē kua vave maumau? ʼE tonu koa ke fakamālohiʼi te kolo ʼaē ka ʼamanaki tuʼutāmaki? Kailoa ia! ʼE tonu ke fakaʼala te hahaʼi, ke fakatokagaʼi age kia nātou te tuʼutāmaki, pea mo tokoni kia nātou ke nātou feholaki! Ko nātou ʼaē ʼe momoe ʼi te faʼahi fakalaumālie ia ʼaho nei ʼe nātou tuʼutāmakiʼia ʼaupito. (Luka 21:34-36) Mai tona ʼaluʼaga ʼaē kua vave pulihi te tuʼu ʼaenī, koia tou faiga ke tou faka mafola lahi ki te hahaʼi fuli!—2 Tim. 4:2; 2 Pet. 3:11, 12.
5 Tou Hoko Atu Te Fai ʼo Te Gāue: Tou kumi he ʼu ʼaluʼaga ke logo te hahaʼi ʼaē ʼe loto moʼoni ki te logo lelei—ʼi tonatou ʼapi, ʼi te ala, ʼi te telefoni pea ʼi te fagonogono faigamālie. Ko te gāue ʼaē neʼe foaki mai e Sehova ke tou fai ʼe ko te gāue maʼuhiga ʼaupito ʼaē ʼe feala ke tou fai. Kapau ʼe tou faʼafai ʼo fakahoko te gāue ʼaia, ʼe tou ‘hāofaki anai tatou pea mo nātou ʼe fakalogo kia tatou.’—1 Tim. 4:16.