Te Tali Fakafiafia!
1 ʼI te potu fuli pe, neʼe fakahā e te ʼu famili Kilisitiano fuli, ʼe nātou leleiʼia ia te foʼi fime viteo Les jeunes sʼinterrogent... Comment se faire de vrais amis ? Neʼe ʼui fēnei e te tāmai ʼi Amelika, ko tona ʼu foha ʼi tanatou ʼosi sioʼi lelei te foʼi fime ʼaia—neʼe nātou mahino pea mo fakamoʼoni ki te ʼu meʼa fuli ʼaē neʼe nātou sio ʼi te ʼata ʼaia! ʼE ʼui fēnei e te tohi mai Malawi, ko te ʼu tēhina tūpulaga pea mo tuagaʼane finemui ʼo te fenua ʼaia neʼe nātou leleiʼia mo nātou te foʼi fime ʼaia, koteʼuhi neʼe nātou felāveʼi mo te ʼu ʼahiʼahi ʼaia ʼi te faleako. Ko te tāmai ʼi Siamani neʼe ina ʼui fēnei ʼo ʼuhiga mo te foʼi fime ʼaia: “ ʼE ko he tali ʼaia ki taku ʼu faikole.” Neʼe ʼui fēnei e te finemui: “ ʼE ʼau fakamālo atu ki takotou fakamanatuʼi mai ʼe tokaga Sehova kia ʼau.” Neʼe ʼui fēnei e te tagata ʼāfea ʼi Niusila: “Ko te foʼi fime ʼaia neʼe tokoni ki te finemui ʼo tomatou kokelekasio ke toe liliu mai ki te ala ʼo te maʼuli.” Neʼe sioʼi te foʼi fime ʼaia e te fafine ʼohoana pea ina ʼui fēnei: “ ʼE ʼau fakaʼamu ke sioʼi te foʼi fime ʼaia e te kau tūpulaga fuli ʼo te moʼoni, pea ke nātou maʼuliʼi te moʼoni!” ʼU famili, ʼe lelei ke koutou sioʼi te foʼi fime ʼaia. ʼOsi ʼaia, pea koutou fai palalau ki te ʼu fehuʼi ʼaenī.
2 Te ʼu ʼUluaki Palalau: Koteā he kaumeʼa moʼoni?—Taag. 18:24.
3 Te ʼu Faigataʼaʼia Moʼo Maʼu ʼo He ʼu Kaumeʼa: Koteā ʼaē ʼe koutou lava fai ke ʼaua naʼa koutou manatu ʼe līʼakina koutou? (Filp. 2:4) He koʼe ʼe tonu ke koutou faigaʼi ke lelei tokotou ʼulugaaga, pea ko ai ʼaē ʼe lava tokoni atu ke koutou fai te faʼahi ʼaia? Koteā ʼaē ʼe ka ina faka fealagia anai ke koutou maʼu hakotou ʼu kaumeʼa, pea kofea ʼaē ʼe koutou lava maʼu ai nātou? —2 Ko. 6: 13.
4 Koutou Kaumeʼa Mo Te ʼAtua: ʼE koutou lava fakatuputupu feafeaʼi he felogoi mo Sehova, pea he koʼe ʼe lelei hakotou faiga ʼo ʼuhiga mo te faʼahi ʼaia? (Pes. 34:8) Ko ai ʼaē ʼe lelei ʼaupito moʼo tokoni kia koutou ke koutou kaumeʼa mo te ʼAtua?
5 Te ʼu Kaumeʼa Kovi: Ko ai te ʼu fakakaugā kovi? (1 Ko. 15:33) Koteā ʼaē ʼe lava fai e takotou ʼu kaumeʼa kovi ke koutou tuʼutāmaki ʼi te faʼahi fakalaumālie? Koteā te ako ʼaē ʼe koutou tāʼofi ʼi te hisitolia faka Tohi-Tapu ʼo ʼuhiga mo Tina?—Sen. 34: 1, 2, 7, 19.
6 Ko He ʼAluʼaga ʼe Hoko ʼi Totatou Temi: Neʼe logo feafeaʼi ia Tara ʼi tana nofo tokotahi? Neʼe ina fakamahino feafeaʼi tana fakakaugā mo te kau tūpulaga pea mo finemui ʼo te mālama? Koteā te ʼu faʼahi fakatupu tuʼutāmaki ʼaē neʼe nātou ʼave ia ia ki ai? He koʼe neʼe mole tokagaʼi e tana ʼu mātuʼa te tuʼutāmaki ʼaē neʼe hoko kia ia, kae koteā ʼaē neʼe nā fai moʼo tokoni kia ia ke toe lelei ʼi te faʼahi fakalaumālie? Koteā ʼaē neʼe fai e te tuagaʼane pionie ke liliu ko he kaumeʼa moʼoni ʼa Tara? He koʼe ʼe tonu ki te kau Kilisitiano ke nātou tokagaʼi ia Tāʼaga Lea 13:20 pea mo Selemia 17:9? Koteā te ako maʼuhiga ʼaē neʼe tāʼofi e Tara?
7 Manatu Fakaʼosi: Koteā te ʼu ako neʼe koutou tāʼofi ʼi te foʼi fime ʼaia? ʼE feafeaʼi anai hakotou fakaʼaogaʼi moʼo tokoni ki ʼihi?—Pes. 71:17.