Te Tali Ki ʼAkotou ʼu Fehuʼi

◼ ʼE tonu koa ke feafeaʼi tatatou teu pea mo te faʼu ʼo totatou ʼulu mokā tou ʼaʼahi te Petele pea mo te ʼu pilō ʼo te filiale?

Ka tou ʼolo ki te Petele, tatau aipe peʼe tou ʼolo ʼo mamata ki te ʼu fale peʼe ko te ʼaʼahi ʼo he tahi ʼo te famili ʼo te Petele, “ko tatatou faʼahiga teu, mo te faʼu ʼo totatou ʼulu, pea mo tatatou aga ʼe tonu ke tatau mo te ʼu temi ʼaē ʼe tou ʼolo ai ki te ʼu fono moʼo tauhi ʼi te Fale ʼo Te Puleʼaga.” (om pasina 131) Kae neʼe fakatokagaʼi, ka ʼaʼahi e ʼihi tēhina pea mo tuagaʼane te filiale, pea ʼe mole fakaʼapaʼapa tanatou ʼu teu. ʼE mole lelei te faʼahi ʼaia mokā nātou ʼaʼahi te ʼu pilō ʼo te filiale. Ko tatatou teu pea mo te faʼu ʼo totatou ʼulu ʼe tonu ke vikiʼi e te hahaʼi, mo lelei pea mo fakapoipoi, ke hā ai te maʼa pea mo te fakaʼapaʼapa ʼaē ʼe tonu ke fakahā e te ʼu kaugana ʼa Sehova ʼAtua.—1 Tim. 2:9, 10.

ʼE maʼuhiga te faʼahi ʼaia tāfito mokā tou ʼolo ʼo mamata te Petele pea mo te ʼu pilō ʼo te filiale, heʼe sioʼi tatou e te hahaʼi tokolahi ʼe mole ko he kau Fakamoʼoni. ʼE lagi fakatafito tanatou manatu ʼo ʼuhiga mo te hahaʼi ʼa te ʼAtua pea mo tana kautahi ki te ʼu meʼa ʼaē ʼe nātou sio kiai. ʼE lagi lelei ke koutou palalau mo te kau ako Tohi-Tapu pea mo ʼihi atu ka lagi nātou ʼolo ʼo ʼaʼahi, ke fakamanatuʼi age kia nātou ke tokaga ke lelei tanatou ʼu teu pea mo te faʼu ʼo tonatou ʼulu. ʼE fiafia anai te famili ʼo te Petele mokā koutou fai te faʼahi ʼaia.

ʼI totatou ʼuhiga kau minisi Kilisitiano, ʼe tonu ke tou tokakaga ke mole tūkia he tahi ʼuhi ko tatatou teu peʼe ko te faʼu ʼo totatou ʼulu. (2 Ko. 6:3, 4) Kae ʼaki tatatou teu pea mo te faʼu ʼo totatou ʼulu, ʼofa pe ke tou “fakamataleleiʼi [tuʼumaʼu] te akonaki ʼo totatou Fakamaʼuli, te ʼAtua, ia meʼa fuli pe.”—Tito 2:10, MN.