Tou Fakafeauga Mo Te ʼu Meʼa ʼe Tou Maʼu
1 ʼE fakatotonu mai e te Tohi-Tapu ke tou foaki te ʼu meʼa fakasino ʼaē ʼe ʼaoga ki totatou famili, kae ʼe mole tonu ke liliu ko te meʼa tāfito ʼaē ʼe tou tokaga kiai ʼi totatou maʼuli. ʼE tonu ke tou fakamuʼamuʼa te ʼu meʼa fakalaumālie. (Mat. 6:33; 1 Tim. 5:8) ʼE faigataʼa te fakafuafua lelei ʼo te ʼu meʼa ʼi “te ʼu temi maʼuhiga ʼaupito mo faigataʼa” ʼaenī. (2 Tim. 3:1, MN ) Koteā ʼaē ka tokoni mai anai kia tatou?
2 Tou Maʼu Te Manatu ʼa Te Tohi-Tapu: ʼE fakatokagaʼi mai kia tatou e te Folafola ʼa te ʼAtua ko te kumi ʼo te ʼu koloā ʼe feala ke fua kovi kia tatou ʼi te faʼahi fakalaumālie. (Tnk. 5:10; Mat. 13:22; 1 Tim. 6:9, 10) ʼI te ʼu temi maʼuhiga ʼaenī, ʼe fua kovi anai kia tatou mokā tou tokakaga fau ki te gāue peʼe ki te falā, ʼo tou tuku kehe ʼi totatou maʼuli te ʼu gāue fakalaumālie—te ʼu fono, te ako, pea mo te fai faka mafola—ʼo mole kei tou fakamuʼamuʼa te ʼu faʼahi ʼaia. (Luka 21:34-36) Kae ʼe foaki mai e te Tohi-Tapu te tokoni ʼaenī: “Kapau e tou mau meakai mo mutui mea, e tou feauga i te u mea aia.”—1 Tim. 6:7, 8.
3 ʼE mole faka ʼuhiga ʼe tonu ki te kau Kilisitiano ke nātou maʼuli masiva. Kae ʼe tokoni mai ke tou ʼiloʼi pe koteā te ʼu meʼa ʼaē ʼe ʼaoga moʼoni kia tatou—te meʼa kai, te mutuʼi meʼa, pea mo he ʼapi ʼe lelei ke tou maʼuʼuli ai. Kapau ʼe tou maʼu te ʼu meʼa ʼaē ʼe ʼaoga ʼo te maʼuli, pea ʼe mole tonu ke tou faiga ki he ʼu tuʼuga koloā. Ka tou fakakaukau ke tou toʼo he meʼa peʼe tou fili he tahi gāue, pea ʼe tonu ke tou fehuʼi kia tatou, ‘ ʼE ʼaoga moʼoni koa te faʼahi ʼaia?’ Ko te fai ʼo te fehuʼi ʼaia ʼe tokoni mai anai kia tatou ke tou manatuʼi te tokoni ʼaenī mai te ʼAtua: “Ke puli ʼi tokotou faʼahiga maʼuli te manako ʼaē ki te paʼaga, koutou fakafeauga pe ki te meʼa ʼaē ʼe maʼu.”—Hep. 13:5, MN.
4 Kapau ʼe tou falala kia Sehova, pea ʼe ina tapuakina anai tatou. (Taag. 3:5, 6) Logola ʼe tonu ke tou gāue kinakina ʼi te ʼaho fuli ke tou maʼu te ʼu meʼa ʼaē ʼe ʼaoga kia tatou, kae ʼaua naʼa lahi fau tatatou tokakaga ki te ʼu meʼa ʼaia. Peʼe veliveli peʼe lahi te ʼu meʼa ʼaē ʼe tou maʼu, kae tou falala ʼe foaki mai anai e Sehova te ʼu meʼa ʼe ʼaoga kia tatou. (Filp. 4:11-13) ʼE tou maʼu ai te fakafeauga fakaʼatua pea mo te tahi ʼu tapuakina ʼe lahi.
5 Tou Faʼifaʼitakiʼi Te Tui ʼa ʼIhi: Ko te faʼe neʼe ina taupau tokotahi tana taʼahine ʼi te moʼoni, pea māmālie pe neʼe ina faka faigafua tona maʼuli. Logola neʼe ʼi ai tona ʼapi matalelei, kae neʼe ʼalu ʼo maʼuli ʼi te kiʼi ʼapi veliveli pea ki muli age ʼi he kogafale. Neʼe feala ai ke ina fakasiʼisiʼi tana ʼu hola gāue ke lahi age tona temi ki te minisitelio. ʼI te kua lahi pea mo ʼohoana ʼo tana taʼahine, neʼe letelete tautonu te fafine ʼaia, logola neʼe veliveli ai tana kiʼi totogi. Kua taʼu fitu nei te pionie katoa ʼo totatou tuagaʼane pea ʼe mole fakahemala ki te ʼu sakilifisio ʼaē neʼe ina fai moʼo fakamuʼamuʼa te ʼu gāue ʼo te Puleʼaga ʼi tona maʼuli.
6 Ko te tagata ʼāfea pea mo tona ʼohoana neʼe nā pionie lolotoga ni ʼu taʼu pea mo nā taupau tanā ʼu toe e toko tolu. ʼI tonatou famili, neʼe nātou ako te fakafeauga, ʼo nātou toʼo te ʼu meʼa ʼaē ʼe ʼaoga kia nātou kae mole ko te ʼu meʼa ʼaē ʼe nātou loto kiai. ʼE ʼui fēnei e te tēhina: “Neʼe tonu ke faigafua tomatou faʼahiga maʼuli. Logola neʼe ʼi ai te ʼu temi neʼe faigataʼa ai kia mātou, kae neʼe foaki tuʼumaʼu mai e Sehova te ʼu meʼa ʼaē neʼe ʼaoga kia mātou. . . . Ka ʼau sio ki toku famili ʼe nātou fakamuʼamuʼa te ʼu meʼa fakalaumālie, pea ʼe ʼau manatu ko meʼa fuli ʼe tonu ke feiā, pea ʼe hage kia ʼau kua ʼau fakahoko he meʼa.” ʼE toe ʼui fēnei e tona ʼohoana: “Ka ʼau sio ki [toku ʼohoana] ʼe maʼumaʼua ʼi te ʼu gāue fakalaumālie, pea ʼe ʼau fiafia lahi.” ʼE toe fiafia mo te fānau ʼi te tonu ʼaē neʼe fai e tanatou ʼu mātuʼa, ʼaē ke nā tauhi temi katoa kia Sehova.
7 Kia nātou fuli ʼaia ʼaē ʼe nātou fili ke nātou tauhi ki te ʼAtua kae mole nātou kumi te ʼu koloā, ʼe fakapapau age e te Tohi-Tapu he ʼu tapuakina lahi ʼi te temi nei pea ʼi te maʼuli ka haʼu.—1 Tim. 4:8.