ʼE Feala Ke Kotou Koloaʼia!
1. He koʼē ʼe tonu ke tou fakakaukauʼi ʼo ʼuhiga mo te selevisi pioniē kātoa?
1 ʼE kotou fia maʼu koa ia he toe fiafia lahi age ʼi tokotou maʼuli pea mo hakotou ʼu fakatuʼutuʼu ke kotou fakahoko? ʼE kotou maʼu koa ia te fiafia pea mo te tokalelei ʼi takotou tokoni ki niʼihi? ʼE kotou fia fakatuputupu koa ia takotou gāue ʼaē kiā Sehova? Kapau ʼe kotou tali ʼeī ki te ʼu fehuʼi ʼaenī, pea kua tonu ke kotou fakakaukauʼi ʼo ʼuhiga mo te selevisi pioniē kātoa. ʼE mahino ia, ʼe lagi ko he ʼu maʼua fakafāmili pea mo ʼihi age maʼua Fakatohi-tapu, ʼo fēia mo te mahaki pea mo te vaivai matuʼa, ʼe ko he ʼu faʼahi ʼe tau mo ʼihi.
2. Fakahā he ʼu koloa fakalaumālie ʼe maʼu e te kau pioniē kātoa?
2 ʼAki te takitaki ʼa te ʼAtua neʼe fakapipiki e Salomone ia te tapuakina ʼa Sehova pea mo te ʼu koloa fakamālama. (Taag. 10:22) Iā ʼaho nei, ʼe maʼu tāfito ia te tapuakina ʼa Sehova ʼi te ʼu koloa fakalaumālie. Pea ko te ʼu taʼi koloa ʼaia ʼe maʼu lahi e te kau pioniē kātoa. Ohagē lā, ʼe natou maʼu ia he toe fiafia lahi mokā nātou ‘fakaʼaogaʼi tāfito ia tonatou temi’ moʼo tokoni ki niʼihi ʼi hanatou fakaʼaogaʼi maʼa nātou totonu. (Kol. 4:5; Gāue 20:35) Pea ʼe tokagaʼi e Sehova ia tanatou ʼu gāue ʼofa ʼaia. Ko te ʼu ‘koloa ʼaia ʼi selō’ ʼe maʼuhiga pē ia ʼi te temi fuli. (Mat. 6:20; Hep. 6:10) Pea tahi, ʼi te ‘fakafaigafua’ ʼaē e te kau pioniē ia tonatou maʼuli pea mo natou falala kiā Sehova ʼe feala ke ina foaki age ia te ʼu meʼa ʼaē ʼe ʼaoga kiā nātou, ke mālohi age ia tanatou felōgoi ʼaē mo Sehova.—Mat. 6:22, 25, 32; Hep. 13:5, 6.
3. Koteā ʼaē ʼe kehekehe ai ʼi tata kumi ia te ʼu koloa fakalaumālie pea mo tata kumi ia te ʼu koloa fakamālama?
3 Ko te kumi ʼo te ʼu koloa fakamālama ʼe taki tuʼumaʼu ki “te ʼu holi fakavale lahi pea mo fakatupu kovi.” (1 Tim. 6:9, 10; Sake 5:1-3) ʼE mole fēia ʼo ʼuhiga mo te ʼu tapuakina ʼa Sehova. Ko te fakaʼaogaʼi e te kau pioniē kātoa ia he toe temi ki te fai fakamafola ʼe tokoni kiā nātou ke natou maʼu ia he fakasiosio poto pea mo lelei ki te ʼu meʼa ʼaē ʼe maʼuhiga tāfito. (Filp. 1:10) Ko te tehina neʼe ʼāseniolo neʼe ina tuku tana gāue ʼaia, he neʼe lahi fau tona temi ʼaē neʼe ina fakaʼaogaʼi kiai, kae neʼe ina toʼo te selevisi pioniē kātoa. Neʼe ina ʼui fēnei: “Neʼe au lotohoha ʼaupitō ʼi taku gāue fakamālama, kae ʼe mole au lotohoha ʼi taku selevisi pioniē. ʼI te temi nei ʼe au tokoni ki te hahaʼi pea mo au akoʼi age kiā nātou ia te moʼoni. Ko he selevisi ʼe au fiafia ai pea mo au leleiʼia ʼi taku tokoni ki te hahaʼi ke natou tali ia te moʼoni.”
4. ʼE tapuakina feafeaʼi ia te kau pioniē kātoa ʼi tanatou ʼave te ʼu tapuakina ki ʼihi?
4 ʼE Natou Liliu Ko He Tapuakina Ki ʼIhi: Iā ʼaho nei, tokolahi ʼe natou felāveʼi mo “te ʼu temi maʼuhiga ʼaupitō mo faigataʼa.” (2 Tim. 3:1) Ko te hahaʼi ʼi te potu fuli pē ʼe ʼaoga ʼaupitō ke ʼi ai hanatou ʼamanaki. ʼE maʼu e te kau fai fakamafola ʼo te Puleʼaga ia he fiafia lahi mokā natou tokoni ki te hahaʼi ʼaē ʼe mole hanatou ʼamanaki ke natou ako pea mo tali ia te logo lelei. ʼE ko he toe fiafia ʼe maʼu e te kau pioniē kātoa, ʼaē ʼe natou fakaʼaogaʼi ia hola e 800 tupu ʼi te taʼu fuli ki te gāue ʼe haofaki ai te hahaʼi!—1 Tim. 4:16.
5, 6. Koteā ʼaē kā ina fakafealagia atu ke kotou liliu ko he pioniē kātoa?
5 Kua kotou fakakaukauʼi fakamālotoloto koa ke kotou kau ki te selevisi pioniē kātoa? ʼE lagi tonu anai ke kotou ‘totogi he temi faigamālie’ mai te temi ʼaē ʼe kotou fakaʼaogaʼi ki he ʼu meʼa ʼe mole faʼa maʼuhiga. (Efe. 5:15, 16) Tokolahi neʼe natou fai ia te faʼahi ʼaia pea neʼe natou fakafaigafua ia tonatou maʼuli, ʼo feala ai kiā nātou ke natou fakasiʼisiʼi tonatou temi gāue kae ke natou fakaʼaogaʼi lahi ia honatou temi ki te ʼu gāue ʼo te Puleʼaga. ʼE feala koa ke kotou fakatuʼutuʼu takotou gāue ke feala ai hakotou fakaʼaogaʼi hokotou temi ki te selevisi?
6 Kotou kole kiā Sehova ia tona poto ke kotou fai hakotou polokalama lelei. (Sake 1:5) Koteā te ʼu tapuakina ʼaē ʼe feala ke kotou ʼamanaki kiai? ʼE kotou mahu anai ʼi te ʼu koloa fakalaumālie! ʼE toe tapuakina foki koutou e Sehova, ʼo ina foaki atu ia te ʼu meʼa ʼaē ʼe ʼaoga kiā koutou ʼi te faʼahi fakasino. (Mat. 6:33) Ko nātou ʼaē ʼe natou ʼahiʼahiʼi ia Sehova ʼo ʼuhiga mo te faʼahi ʼaia ʼe natou maʼu anai ia “he tapuakina ʼo aʼu ki te mole toe ʼi ai ʼo he hoge.”—Mala. 3:10.