Tou Agatonu Mokā Fakamavae He Tahi ʼi Totatou Famili
1. Koteā ʼaē ʼe feala ke faigataʼa ki he Kilisitiano agatonu?
1 ʼE feala ke mālohi te ʼu felogoi faka famili. Pea ʼe feala ke faigataʼa ki he Kilisitiano mokā fakamavae peʼe mavae ʼi te kokelekasio tona ʼohoana, hana fānau, he tāmai peʼe ko he faʼe, peʼe ko hona kāiga. (Mat. 10:37) Koteā te aga ʼe tonu ke fakahā e he Kilisitiano agatonu ʼi te ʼaluʼaga ʼaia? ʼE tonu koa ke kehe age tatatou aga mo kapau la ʼe maʼuli ʼi totatou loto fale? ʼUluaki, tou toe vakaʼi te manatu ʼa te Tohi-Tapu ki te faʼahi ʼaia, mo te ʼu pelesepeto ʼaē ʼe faka ʼuhiga tatau kia nātou ʼaē neʼe fakamavae pea mo nātou ʼaē neʼe mavae ʼi te kokelekasio.
2. ʼO mulimuli ki te Tohi-Tapu, ʼe tonu ke feafeaʼi te aga ʼa te kau Kilisitiano kia nātou ʼaē neʼe fakamavae ʼi te kokelekasio?
2 Tatatou Aga Kia Nātou ʼAē Neʼe Fakamavae: ʼE fakatotonu mai e te Folafola ʼa te ʼAtua ke ʼaua naʼa tou fakatahi peʼe tou kaumeʼa mo he tahi neʼe fakamavae ʼi te kokelekasio: “Aua te fakatahi mo he tahipe e ina mau te higoa ko ‘Tehina’, kapau e feauaki, pe manumanu, pe tauhi taulaʼatua, pe fasituu, pe konahia pe kaka, aua te fakatahi mo te faahiga tagata aia. . . . Koutou fakamavae maia koutou te tagata agakovi.” (1 Ko. 5:11, 13) ʼE toe faka ʼuhiga kiai te ʼu palalau neʼe fai e Sesu ia Mateo 18:17, MN: “Ke hage ia ia kia te koe [ia ia ʼaē neʼe fakamavae] ko he tagata ʼo te ʼu puleʼaga pea mo hage ko he tagata tānaki tukuhau.” Neʼe ʼiloʼi lelei e te hahaʼi ʼaē neʼe fagono kia Sesu, ʼi te temi ʼaia neʼe mole felogoi te kau Sutea mo te kau Senitile pea neʼe mole nātou fia fakatahi mo te kau tānaki tukuhau. Koia neʼe fakatotonu ai e Sesu ki tana kau tisipulo ke mole nātou fakatahi mo nātou ʼaē neʼe fakamavae.—Vakaʼi Te Tule Leʼo Fakafalani ʼo te ʼaho 15 ʼo Tesepeli 1981, pasina 17 ki te 19.
3, 4. E feafeaʼi tatatou ʼu felogoi mo he tahi neʼe fakamavae pe neʼe mavae ʼi te kokelekasio?
3 Ko tona faka ʼuhiga ko he Kilisitiano agatonu ʼe mole hana ʼu felogoi fakalaumālie mo he tahi neʼe fakamavae ʼi te kokelekasio. Kae ʼe ʼi ai te tahi ʼu ʼaluʼaga ʼe faka ʼuhiga kiai. ʼE ʼui e te Folafola ʼa te ʼAtua ʼe mole tonu ‘ke tou kai mo te tagata ʼaia.’ (1 Ko. 5:11) ʼO toe feiā mo tatou, ʼe mole tou fakatahi mo he tahi neʼe fakamavae. ʼE mole tou ʼolo anai mo ia ʼo mālōlō ʼi he koga meʼa, ki he lafeti, ki he aka fitipolo, peʼe tou ʼolo ʼo faifakatau mo ia peʼe tou ʼolo fakatahi ki he sinema, peʼe tou kai fakatahi mo ia ʼi totatou ʼapi peʼe ʼi te fale kai.
4 ʼE feala koa hatatou palalau mo he tahi neʼe fakamavae? Logola ʼe mole talanoa te Tohi-Tapu ki te ʼu ʼaluʼaga fuli, kae ʼe tokoni mai ia 2 Soane 10 ke tou maʼu te manatu ʼa Sehova: “Kapau e alu atu he tahi kia koutou, pea e mole ina avatu te akonaki, aua tautou tali iaʼia i toutou api, pea e au tala atu, aua tautou fakaʼalofa ki ai.” ʼO ʼuhiga mo te faʼahi ʼaia, ʼe ʼui fēnei e Te Tule Leʼo ʼo te ʼaho 15 ʼo Tesepeli 1981, ʼi te pasina 23: “Ko he ʼalofa ki he tahi ʼe feala ke kamata ai he fai palalau pea lagi iku ki he fakakaumeʼa. ʼE tou fia kamata kaumeʼa koa mo he tahi neʼe fakamavae?”
5. Ka fakamavae he tahi koteā ʼaē ʼe mole kei ina maʼu?
5 Koia, ʼe ʼalutahi mo te ʼui fēnei ʼi te pasina 29 ʼo Te Tule Leʼo pe ʼaia: “Ko te Kilisitiano ʼaē ʼe tō ki te agahala pea tonu ke fakamavae, ʼe lahi te ʼu meʼa ʼe mole kei ina toe maʼu: te ʼofa ʼo te ʼAtua kia ia, . . . tana fakatahi lelei mo te ʼu tēhina, pea tāfito tana ʼu felogoi mo tona ʼu famili ʼaē ʼe kau ʼi te moʼoni.”
6. ʼE fakamaʼua koa ki he Kilisitiano ke mole toe fakatahi mo he tahi ʼo te famili kua fakamavae kae ʼe nofo ʼi te loto fale? Koutou fakamahino.
6 Kapau ʼe Nofo ʼi Te Loto Fale: Ka nonofo tahi he ʼu Kilisitiano mo he tahi ʼo te famili neʼe fakamavae, pea ʼe faka ʼuhiga koa ʼe mole tonu ke nātou palalau kia ia, ke mole nātou kakai mo ia, pea mo nātou fai fakatahi mo ia te ʼu gāue? ʼE ʼui fēnei e Te Tule Leʼo Fakafalani ʼo te ʼaho 15 ʼo ʼApelili 1991, ʼi te kiʼi nota ʼi te lalo pasina 22: “Kapau ko he tahi neʼe fakamavae ʼe nofo ʼi te ʼapi Kilisitiano, pea ʼe kau anai ia ki te ʼu gāue māhani ʼo te loto fale.” ʼE vakaʼi pe anai e te famili he tonu, peʼe nātou kakai fakatahi anai peʼe nātou fai fakatahi anai te ʼu gāue ʼo te loto fale mo ia ʼaē kua fakamavae. Kae ʼe nātou tokakaga anai ke mole hage ki te ʼu tēhina ʼaē ʼe fakatahi mo nātou ʼe kei tatau pe tonatou maʼuli ohage ko te temi ʼi muʼa ʼo tana fakamavae.
7. Koteā te ʼu fetogi ʼi te faʼahi fakalaumālie ʼe hoko mokā kua fakamavae he tahi ʼo te famili?
7 Kae ʼi Te Tule Leʼo ʼo te ʼaho 15 ʼo Tesepeli 1981, ʼi te pasina 26, ʼe faka maʼuhigaʼi ai te manatu ʼo ʼuhiga mo ia neʼe fakamavae peʼe neʼe mavae: “ ʼE mole kei tou fai palalau mo ia ki te ʼu meʼa fakalaumālie ohage ko te temi muʼa. ʼE moʼoni te faʼahi ʼaia ʼo ʼuhiga mo hotatou kāiga, peʼe ko he tahi ʼi totatou famili . . . ʼE hoko anai he ʼu fetogi ʼi te loto fale ʼo ʼuhiga mo te ʼu felogoi ʼi te faʼahi fakalaumālie ʼaē neʼe maʼu ki muʼa atu. Ohage la, kapau kua fakamavae te tagata ʼohoana, pea ʼe nofo hoha anai te fafine ʼohoana mo te fānau mo kapau ʼe ina fai te ako peʼe ko te lau ʼo te Tohi-Tapu pea mo faikole. Kapau ʼe fia faikole, ohage la ʼi te temi kai, pea ʼe feala ke ina fai ʼi tona loto fale. Kae ʼe feala ke nātou fai fakalogologo hanatou kole ki te ʼAtua. (Taag. 28:9; Pes. 119:145, 146) E feafeaʼi mo kapau ʼi te loto fale ʼe ʼi ai he tahi kua fakamavae kae ʼe fia fakalogo ki te lautohi faka famili ʼo te Tohi-Tapu peʼe ki te ako Tohi-Tapu? ʼE feala ke tali e te famili ke fakalogo mo kapau ʼe mole ina faiga ke ina akoʼi nātou peʼe ina fakahā tana ʼu manatu faka lotu.”
8. Koteā te maʼua ʼa te ʼu mātuʼa Kilisitiano ʼo ʼuhiga mo he fānau kua fakamavae kae kei maʼuli ʼi te loto fale?
8 Kapau ko he tamasiʼi kua fakamavae ʼe maʼuli ʼi te loto fale, pea ʼe kei maʼua ki te ʼu mātuʼa ke nā taupau ia ia. ʼE ʼui fēnei e Te Tule Leʼo Fakafalani ʼo te ʼaho 15 ʼo Novepeli 1988, ʼi te pasina 20: “Ohage pe ko hanatou haga foaki kia ia hana meʼa kai, hana ʼu mutuʼi meʼa pea mo hona ʼapi, ʼe nātou toe akoʼi ia ia ʼo mulimuli ki te Folafola ʼa te ʼAtua. (Taag. 6:20-22; 29:17) Ko te ʼu mātuʼa ʼofa ʼe lagi nā fakatuʼutuʼu anai ke fai hana ako Tohi-Tapu, tatau aipe peʼe kua fakamavae. Lagi fua lelei anai kia ia te ako ʼaia ʼaē ʼe nā fai tokotahi mo ia. Peʼe lagi tali anai e te ʼu mātuʼa ke kau ʼi te ako faka famili.”—Vakaʼi mo Te Tule Leʼo ʼo te ʼaho 1 ʼo ʼOketopeli 2001, ʼi te pasina 16 mo te 17.
9. ʼE tonu ke feafeaʼi te ʼu felogoi ʼa he Kilisitiano mo he kāiga kua fakamavae pea mole maʼuli ʼi te loto fale?
9 Ko He ʼu Kāiga ʼe Mole Maʼuli ʼi Te Loto Fale: ʼE ʼui fēnei e Te Tule Leʼo ʼo te ʼaho 15 ʼo ʼApelili 1988, ʼi te pasina 28: “ ʼE kehe te ʼaluʼaga ʼaia mo kapau ko ia ʼaē neʼe fakamavae peʼe neʼe mavae ʼe ko he kāiga ʼe mole maʼuli fakatahi mo te famili ʼi te loto fale. ʼE lagi feala anai ke mole tou felogoi mo ia. Tatau aipe peʼe tonu ke tou fakatahi ʼi he ʼu gaohi meʼa faka famili, kae ʼe tou fai tahitahiga anai te faʼahi ʼaia,” ʼo mulimuli ki te fakatotonu ʼa te ʼAtua ke “aua te fakatahi mo he tahipe” neʼe agahala pea mole fakahemala. (1 Ko. 5:11) Ko te kau Kilisitiano agatonu ʼe nātou faiga anai ke mole nātou fakatahi mo ia mo kapau ʼe mole hona ʼaoga, pea ʼe mole tonu ke tou fakatahi tuʼumaʼu mo ia ʼi te gāue.—Vakaʼi mo Te Tule Leʼo ʼo te ʼaho 15 ʼo Tesepeli 1981, ʼi te pasina 28 ki te 30.
10, 11. Koteā ʼaē ʼe tonu anai ke vakaʼi e he Kilisitiano ʼi muʼa ʼo tana tali ke toe liliu age ki fale he tahi kua fakamavae?
10 ʼE talanoa Te Tule Leʼo ki he tahi ʼaluʼaga ʼe feala ke hoko: “E feafeaʼi leva mo kapau ko he tahi ʼi te famili, he foha peʼe ko he tāmai peʼe ko he faʼe, neʼe mole maʼuli ʼi te loto fale, kua fakamavae pea fia liliu ʼo maʼuli mo tona famili? ʼE tokagaʼi anai ia ia e te famili mokā nātou fai he tonu. Ohage la, ko he tāmai peʼe ko he faʼe kua fakamavae, kae ʼe lagi mahaki peʼe mole kei feʼauga tana falā peʼe mole kei mālohi ke feala hana tokaga kia ia. ʼE fakamaʼua e te Tohi-Tapu ki te ʼu fānau Kilisitiano ke nātou fai he tokoni ʼi te faʼahi ʼaia, pea ʼe ko he aga ʼe tau mo feʼauga ke nātou fai. (1 Tim. 5:8) . . . Ko te aga ʼaē ka fai ʼe mulimuli anai ki te ʼu faʼahi ohage la ko te ʼu meʼa ʼaē ʼe ʼaoga moʼoni kia ia ʼaia, tana aga pea mo te manatu ʼa te pule famili ki te ʼaluʼaga fakalaumālie ʼo tona famili.”—Te Tule Leʼo ʼo te ʼaho 15 ʼo Tesepeli 1981, ʼi te pasina 27.
11 ʼO ʼuhiga mo he tamasiʼi, ʼe hoko atu fēnei e te alatike: “ ʼI ʼihi temi, ko te ʼu mātuʼa Kilisitiano ʼe tonu ke nā tali te toe liliu mai ki te loto fale ʼa he tamasiʼi kua fakamavae, heʼe mahaki peʼe hoha tona loto. Kae ʼi te ʼu ʼaluʼaga ʼaia, ʼe tonu ke nā vakavakaʼi lelei te ʼu ʼaluʼaga ʼo te tamasiʼi ʼaia. Ko te tamasiʼi ʼaia kua fakamavae neʼe maʼuli tokotahi koa pea ʼi te temi nei ʼe mole kei ina lavaʼi te faʼahi ʼaia? Peʼe toe fia liliu mai koa ki fale heʼe ina kumi te maʼuli fīmālie? E feafeaʼi ki tana ʼu aga? ʼE ina ʼaumai anai koa he ‘meʼa fakatupu’ ki fale?”—Kal. 5:9.
12. Koteā te ʼu fua lelei ʼo te fakatuʼutuʼu ʼaē ke fakamavae he tahi ʼi te kokelekasio?
12 Te ʼu Lelei ʼo Te Agatonu Kia Sehova: ʼE fua lelei te lagolago ki te fakatuʼutuʼu faka Tohi-Tapu ʼaē ko te fakamavae ʼo he tahi ʼi te kokelekasio, pea mo te mole fakatahi mo te kau agahala ʼaē ʼe mole fakahemala. ʼE maʼa ai te kokelekasio pea mo fakahā ai ʼe tou lagolago ki te ʼu lekula māʼoluga ʼa te Tohi-Tapu, ʼo ʼuhiga mo te aga ʼaē ʼe tonu ke fai. (1 Pet. 1:14-16) ʼE puipui tatou mai te ʼu aga ʼaē ʼe kovi. (Kal. 5:7-9) ʼE toe foaki kia ia neʼe agahala te fealagia ke fua lelei kia ia tona fakatonutonuʼi, pea ʼe tokoni kia ia ke ina fakatupu “te fua ʼo te tokalelei, ʼaē ko te faitotonu.”—Hep. 12:11.
13. Koteā te ʼu fetogi neʼe tonu ke fai e te famili, pea neʼe koteā tona ikuʼaga?
13 ʼI tanā ʼosi logo ki te akonaki ʼi te fakatahi faka silikosikilipisio, ko te tēhina mo tona mahaga fafine, neʼe nā mahino neʼe tonu ke nā fai he ʼu fetogi ʼo ʼuhiga mo tanā ʼu felogoi mo tanā faʼe, ʼaē neʼe mole maʼuli tahi mo nāua pea neʼe fakamavae kua hili kiai taʼu e ono. ʼI te ʼosi pe ʼo te fakatahi, neʼe telefoni te tēhina ki tana faʼe, pea ʼi tana ʼosi fakahā age tona ʼofa kia ia, neʼe ina fakamahino age ʼe mole nā toe fai palalau anai mo ia gata pe mo kapau ʼe ʼi ai he ʼu gaohi meʼa faka famili maʼuhiga ʼe tonu ke nātou fakatahi ai. Mole tuai, neʼe kamata kau tana faʼe ki te ʼu fono, pea neʼe toe fakahū ki te kokelekasio. Pea ko tona ʼohoana ʼaē neʼe mole ʼi te moʼoni, neʼe kamata ako pea neʼe papitema.
14. He koʼe ʼe tonu ke tou agatonu ʼo lagolago ki te fakatuʼutuʼu ʼaē ko te fakamavae ʼo he tahi ʼi te kokelekasio?
14 Ko tatatou lagolago agatonu ki te fakatuʼutuʼu ʼaē ʼe tuʼu ʼi te Tohi-Tapu, ke fakamavae he tahi, ʼe ko he fakahā ʼaia ʼe tou ʼofa kia Sehova pea mo tou tali kia ia ʼaē ʼe fakafeagai kia te Ia. (Taag. 27:11) ʼE feala ke tou falala ʼe tapuakina anai tatou e Sehova. Neʼe tohi fēnei e te Hau ko Tavite ʼo ʼuhiga mo Sehova: “ ʼO ʼuhiga mo tana ʼu fakatotonu ʼe mole ʼau mamaʼo anai mai ai. ʼAki ia ia ʼaē ʼe agatonu ʼe ke agatonu anai kia ia.”—2 Sam. 22:23, 26.