Te ʼu Fehuʼi ʼa Te Kau Lautohi

ʼI te ʼu fono ʼo te kokelekasio, ʼe feala koa ke heheka tahi te ʼu matuʼā Kilisitiano mo hanatou fanau kua fakamavae, kaʼe heʼeki taʼu 18?

Neʼe fakatuʼutuʼu ia te ʼu nusipepa fenei moʼo fakalotomalohiʼi te ʼu matuʼā Kilisitiano, mo kapau ʼe feala, ke natou tokoni ʼi te faʼahi fakalaumalie ki tanatou fanau ʼae heʼeki taʼu 18, ʼae neʼe fakamavae mai te kokelekasio, kaʼe ʼe kei maʼuli ʼi tonatou loto fale. Ohage pe ko tona tohi ʼi Te Tule Leʼo ʼo te ʼaho 1 ʼo Oketopeli 2001, ʼi te pasina 16 ki te 18, ʼe feala ki te ʼu matuʼā ke natou haga fai te ako Tohi-Tapu ʼo tanatou fanau ʼae kua fakamavae, mo kapau ʼe kei maʼuli mo naua. ʼE natou fai ia te faʼahi ʼaia ʼaki ia te fakaʼamu ʼae ke fetogi tana aga.

Kapau leva neʼe fakatuʼutuʼu e he kokelekasio ke fakaʼateaina he ʼu hekaʼaga ʼi te Fale Fono maʼa natou ʼae kua fakamavae, ʼe lagi lelei ke heka fakalogologo ia te fanau ʼae neʼe fakamavae mo ʼana matuʼā. Mai tona aluʼaga ʼae ʼe mole fakamaʼua ke heka he tahi neʼe fakamavae ʼi te ʼu hekaʼaga ʼae ʼe ʼi muli, ʼe feala pe ki te fanau ʼae neʼe fakamavae ke heka tahi mo ʼana matuʼā, ʼi he faʼahi pe ʼo te Fale Fono. Ko te maʼua ʼa te ʼu matuʼā ke natou tokakaga ki tanatou fanau ʼi te faʼahi fakalaumalie, koia ʼe natou tokakaga anai ki ai ke fakalogo lelei ki te ʼu akonaki. ʼE lelei age tana heka tahi mo ʼana matuʼā ʼi te tuku ʼae ke heka tokotahi kaʼe ʼe mole he tahi ke tokaga ki ai.

Kaʼe ʼe feafeaʼi leva mo kapau, ʼe mole maʼuli ia te fanau ʼae kua fakamavae mo ʼana matuʼā? ʼE ʼi ai koa hona kehekehe? Neʼe kua fakamahino lelei ʼi te tahi ʼu nusipepa fenei pe kotea ʼae ʼe tonu ke fai e he Kilisitiano ʼo ʼuhiga mo te ʼu felogoʼi mo he tahi ʼo tona famili ʼae kua fakamavae mai te kokelekasio pea ʼe mole kei maʼuli ʼi tonatou ʼapi.a Kaʼe ka heka he tahi neʼe fakamavae mai te kokelekasio mo tona famili, ʼe mole leva fakaʼuhiga ʼe ina faigaʼi ke ina maʼu he ʼu felogoʼi mo natou. Kapau ʼe maʼu e he Kilisitiano te manatu ʼae ʼe totonu ʼo ʼuhiga mo he tahi ʼo tona famili neʼe fakamavae, pea mo faiga malohi ke ina maʼuliʼi ia te tokoni Fakatohi-tapu ʼo ʼuhiga mo te ʼu felogoʼi mo natou ʼaia, ʼe mole ʼaoga ke tou tuʼania ki te faʼahi ʼaia.—1 Ko. 5:11, 13; 2 Soa. 11.

Kapau ʼe heka he tahi neʼe fakamavae mo he tahi ʼo tona famili peʼe ko he tahi pe ʼo te kokelekasio, ʼe mole feala ke hoko ai he ʼu fihifihia mo kapau ʼe aga fakaʼapaʼapa. Kapau ʼe tou fakaʼapaʼapa fuli ki te ʼu pelesepeto Fakatohi-tapu ʼo ʼuhiga mo natou ʼae neʼe fakamavae, pea kapau ko te faʼahi ʼae ʼe heheka ai ia natou ʼae neʼe fakamavae ʼe mole ko he aluʼaga ʼe fakatupu tukia ki he tahi ʼo te kokelekasio, ʼe mole ʼaoga anai ke fai he fakatuʼutuʼu ʼo ʼuhiga mo natou ʼaia ʼae ʼe ʼomai ki te ʼu fono.