Tou ʼOfa Ki “Te ʼu Tama ʼAē ʼe Hala Mo Tāmai”
1 Ko Sehova ʼe ko “te tāmai ʼo te ʼu tama ʼaē ʼe hala mo tāmai.” (Pes. 68:5) ʼE hā lelei tana tuʼania ki te maʼuli ʼo te ʼu fānau ʼaia, ʼi te fakatotonu ʼaē neʼe ina foaki age ki te puleʼaga ʼāfea ʼo Iselaele: “ ʼAua naʼa koutou gaohi koviʼi he fafine vitua, peʼe ko he tama ʼe hala mo tāmai. Kapau ʼe ke gaohi koviʼi ia ia, pea kapau ʼe kalaga mai kia te ʼau, ʼe ʼau logo moʼoni anai ki tana kalaga.” (Ek. 22:22, 23) Neʼe ʼi ai mo te ʼu fakatuʼutuʼu ʼi te Lao ʼa te ʼAtua moʼo tokoni kia nātou ʼaia, ʼi te faʼahi fakasino. (Teu. 24:19-21) ʼI te fakatuʼutuʼu faka Kilisitiano, ʼe fai te tokoni ʼaenī ki te kau atolasio moʼoni ke nātou “taupau . . . te ʼu fānau ʼaē ʼe hala mo tāmai pea mo faʼe, pea mo te ʼu fafine vitua ʼi tonatou ʼu mamahi.” (Skp. 1:27, MN ) ʼE tou lava faʼifaʼitaki feafeaʼi ia te ʼofa ʼo Sehova ki te ʼu fānau ʼaē ʼe taupau tokotahi e tanatou faʼe peʼe ko tanatou tāmai, peʼe ko te ʼu fānau ʼaē ʼe mole lotu tahi mo tanatou ʼu mātuʼa?
2 Te Ako Fakalaumālie: Kapau ʼe koutou taupau tokotahi takotou fānau, peʼe mole kau tokotou ʼohoana ʼi te moʼoni, pea ʼe lagi faigataʼa hakotou fai te ako Tohi-Tapu ʼo takotou fānau. Kae ko he ako Tohi-Tapu ʼe fai tuʼumaʼu pea mo fai ʼo mulimuli ki te ʼu faʼahi ʼaē ʼe ʼaoga ki te fānau, ʼe maʼuhiga ke feala hanatou lalahi ake ʼo liliu ko he ʼu hahaʼi lalahi ʼe fakakaukau poto pea mo aga fakapotopoto. (Taag. 22:6) ʼE toe maʼuhiga foki ke koutou fai palalau mo nātou ʼi te ʼaho fuli ʼo ʼuhiga mo te ʼu faʼahi fakalaumālie. (Teu. 6:6-9) ʼI ʼihi temi, ʼe lagi koutou lotovaivai anai, kae ʼaua naʼa koutou fiu. Koutou kole kia Sehova ke ina tuku atu he mālohi, pea mo ina takitaki koutou ʼi takotou “akoʼi age [ki takotou fānau] te akonaki pea mo te manatu ʼa Sehova.”—Ef. 6:4, MN.
3 Kapau ʼe koutou loto ki he lagolago moʼo fakahoko tokotou ʼu maʼua faka Tohi-Tapu, koutou fakahā te ʼu faʼahi ʼaia ki te kau tagata ʼāfea. ʼE lagi feala anai ke nātou tuku atu he ʼu tokoni lelei, peʼe nātou tokoni atu ke koutou fai he ʼu fakatuʼutuʼu fakalaumālie ʼe koutou mulimuli anai kiai ʼi tokotou loto fale.
4 Te ʼu Faʼahiga Tokoni ʼAē ʼe Lava Fai e ʼIhi: ʼI te ʼuluaki sēkulō, neʼe liliu ia Timoteo ko he tagata kaugana neʼe gāue mālohi kia Sehova, logola neʼe lahilahi ake ʼi he loto fale neʼe mole lotu tahi tana ʼu mātuʼa. ʼE mahino ia, neʼe lava tāfito te faʼahi ʼaia, ʼuhi ko te gāue kinakina ʼo tana faʼe pea mo tana kui fafine, moʼo akoʼi age kia ia te ʼu tohi taputapu ʼi tana kei veliveli. (Gaue 16:1, 2; 2 Tim. 1:5; 3:15) Kae neʼe toe ʼaoga foki tana fakakaugā mo te tahi kau Kilisitiano, ohage ko te ʼapositolo ko Paulo, ʼaē neʼe ina ʼui ko Timoteo ʼe ko tana “fanau ofaina mo agatonu i te Aliki.”—1 Ko. 4:17.
5 ʼO toe feiā ia ʼaho nei, ʼi te kokelekasio ʼe ko he meʼa lelei ki te ʼu fānau ʼaē ʼe hala mo tāmai mokā tokakaga age kia nātou he ʼu tēhina mo tuagaʼane ʼe fakapotopoto ʼi te faʼahi fakalaumālie! ʼE koutou ʼiloʼi koa tonatou ʼu higoa? ʼE koutou fai palalau koa mo nātou ʼi te ʼu fono pea mo te tahi ʼu lakaga? Koutou kole age ke nātou kaugā fai faka mafola mo koutou. ʼI ʼihi temi, ʼe lagi feala ke koutou fakaafe nātou, mo tanatou faʼe peʼe ko tanatou tāmai ʼaē ʼe ina taupau tokotahi nātou, peʼe ko tanatou tāmai peʼe ko tanatou faʼe ʼaē ʼe tokotahi ʼi te moʼoni, ke nātou ʼōmai ki takotou ako faka famili peʼe ko he ʼu kiʼi fakafiafia. Kapau ʼe kaumeʼa lelei te ʼu fānau ʼaia mo koutou, pea ʼe faigafua anai hanatou mulimuli ki takotou faʼifaʼitaki, pea mo tali takotou ʼu fakaloto mālohi.—Filp. 2:4.
6 ʼE tokaga ʼaupito ia Sehova ki te ʼu fānau ʼaē ʼe hala mo tāmai, pea ʼe ina tapuakinaʼi tatatou ʼu faiga ʼi te ʼofa, moʼo tokoni kia nātou ke nātou fia mulimuli ki te moʼoni. Ko te tokolahi ʼaē neʼe taupau tokotahi e tanatou tāmai peʼe ko tanatou faʼe, peʼe mole lotu tahi tanatou ʼu mātuʼa, neʼe foaki age te ʼu fakaloto mālohi ʼaia, pea ʼi te temi nei ʼe nātou tauhi agatonu ko he kau pionie, he kau tagata faifekau faka minisitelio, he kau tagata ʼāfea, he kau tagata taupau feʼoloʼaki, he kau misionea, peʼe nātou kau ki te famili ʼo te Petele. ʼO mulimuli ki te faʼifaʼitaki ʼo tatatou Tāmai ʼaē ʼi selo, ʼofa pe kia tatou fuli ke tou fai he ʼu puleʼaki moʼo “faka fālahi” totatou ʼofa kia nātou ʼaē ʼe hala mo tāmai.—2 Ko. 6:11-13, MN.