Te ʼu Fehuʼi ʼa Te Kau Lautohi

Kapau ʼe tau fakaʼaogaʼi e te Tohi-Tapu “te tamasiʼi tagata ʼe mole hana tāmai,” ʼe faka ʼuhiga koa ʼe siʼisiʼi tana faka ʼuhiga te tamaliki fafine?

Kailoa.

ʼE fakaʼaogaʼi e te Tohi-Tapu Les Saintes Écritures—Traduction du monde nouveau te kupu “te tamasiʼi tagata ʼe mole hana tāmai” ʼi te ʼu tuʼuga vaega ʼaē ʼe fakahā ai te tokaga ʼa te ʼAtua ki te tamaliki ʼaē ʼe mole hanatou tāmai peʼe ko hanatou faʼe. Neʼe fakahā lelei e te ʼAtua te tokaga ʼaia ʼi te ʼu lao ʼaē neʼe ina foaki ki Iselaele.

Ohage la, neʼe tala fēnei e te ʼAtua: “ ʼAua naʼa ke fakamamahiʼi he vitua, peʼe ko he tamasiʼi tagata ʼe mole hana tāmai. Kapau ʼe ke fakamamahiʼi ia ia ʼi he faʼahiga ʼaluʼaga pe, kapau ʼe fetapā mai kia te ʼau, pea ʼe ʼau logo moʼoni ki tana kalaga, ʼe mū anai taku ʼita pea ʼe ʼau matehi moʼoni anai koutou ʼaki te heletā, pea ʼe tonu anai ke liliu ʼokotou ʼohoana ko he ʼu vitua pea ko ʼokotou ʼu foha ko he ʼu tamaliki ʼe tāmai mate.” (Ekesote 22:22-24) “Ko Sehova, tokotou ʼAtua, ʼe ko te ʼAtua ʼo te ʼu ʼatua pea mo te ʼAliki ʼo te ʼu ʼaliki, te ʼAtua mālohi pea mo fakamanavahe, ʼaē ʼe mole fakapulepule pea ʼe mole ina tali he aga heʼe faitotonu, ʼaē ʼe ina fakahoko te fakamāu maʼa te tamasiʼi tagata ʼaē ʼe mole hana tāmai pea mo te vitua.”—Teutalonome 10:17, 18; 14:29; 24:17; 27:19.

ʼE lahi te ʼu fakaliliu faka Tohi-Tapu ʼe nātou fakaliliu “te tamasiʼi ʼe mole hana tāmai” peʼe “ko he tamasiʼi kua mamate ʼana ʼu mātuʼa” ʼi te ʼu vaega ʼaia, ʼo fakapipiki mai kiai te tamaliki tagata mo te tamaliki fafine. Kae, ko te ʼu fakaliliu ʼaia ʼe nātou fakapōʼuli ki te faʼahi ʼo te kupu faka Hepeleo (yathohm) ʼe ū, ʼe faka ʼuhiga ki te tamaliki tagata. Koia, ʼe fakaʼaogaʼi e te Tohi-Tapu Les Saintes Écritures—Traduction du monde nouveau te fakaliliu tonu ʼaē ko te “tamasiʼi (tamaliki) tagata ʼe mole hana (hanatou) tāmai,” ohage ko te Pesalemo 68:5, ʼe tou lau fēnei: “Ko te ʼAtua ko he tāmai ʼo te tamaliki tagata ʼe mole hanatou tāmai pea ko he tuʼi fakamāu maʼa te kau vitua ʼi tona nofoʼaga maʼoniʼoni.” ʼAki te faka ʼuhiga pe ʼaia ki te faka Hepeleo ʼaē ʼe ū, ko te faka ʼuhiga ki te kau fafine ʼo he kupu ʼi te Pesalemo 68:11 ʼe ina fakamaʼua ke lau fēnei: “Ko nātou fafine ʼaē ʼe nātou fagonogono te logo lelei ko he foʼi kautau lahi.”a

Logope ko te kupu “tamasiʼi tagata ʼe mole hana tāmai” ʼe ko he fakaliliu tāfito ʼaia ʼo te kupu yathohm, ʼe mole tonu ke faka ʼuhiga ʼe mole ʼi ai he tokaga ki te tamaliki fafine ʼaē ʼe mole hanatou tāmai peʼe mole ʼi ai hanatou faʼe. Ko te ʼu vaega ʼaē ʼe tuʼu ʼo feiā mo ʼihi ʼatu ʼe nātou fakahā neʼe fakaloto mālohiʼi te hahaʼi ʼa te ʼAtua ke nātou tokakaga ki te hahaʼi fafine, pea mo te kau vitua. (Pesalemo 146:9; Isaia 1:17; Selemia 22:3; Sakalia 7:9, 10; Malakia 3:5) ʼI te Lao, neʼe ʼai foki e te ʼAtua te fakamatala ʼo ʼuhiga mo te faifakamāu moʼo fakamoʼoni ʼaki he tofiʼa ki te ʼu taʼahine ʼo Selofehate. Ko te tonu ʼaia neʼe liliu ai leva ko he lekula moʼo fakaʼaluʼalu ʼo te ʼu ʼaluʼaga ʼaē ʼe tatau, ʼo lagolago ai ki te ʼu fealagia ʼo te ʼu taʼahine ʼaē ʼe mole hanatou tāmai.—Faka au 27:1-8.

Neʼe mole fakakeheʼi e Sesu ia nātou tagata mo nātou ʼaē fafine ʼi tana agalelei ʼaē ki te tamaliki. Kailoa ia, ʼe tou lau fēnei: “Pea neʼe ʼaumai kia te ia te ʼu kiʼi tamaliki ke ina hilifaki ʼona nima kia nātou; kae neʼe ʼitagiʼi nātou e te kau tisipulo. ʼI te sio ʼaē ʼa Sesu ki te faʼahi ʼaia, neʼe ʼita ai ia pea mo ʼui maʼana kia nātou: ‘Koutou tukunoaʼi te ʼu kiʼi tamaliki pea ʼaua naʼa koutou tāʼofi tanatou ʼōmai kia te ʼau, heʼe ko te puleʼaga ʼo te ʼAtua ʼe ʼa nātou ʼaē ʼe tatau mo nātou ʼaenī. ʼE ʼau tala moʼoni atu kia koutou, ko ʼaē ʼe mole ina tali te puleʼaga ʼo te ʼAtua ohage ko he kiʼi tamasiʼi, ʼe mole hū anai kiai.’ Pea neʼe ina toʼo te ʼu tamaliki ʼi ʼona nima pea ina tapuakina ia nātou, ʼo ina hilifaki ʼona nima kia nātou.”—Maleko 10:13-16.

Ko te kupu faka Keleka ʼaē neʼe fakaliliu ʼaki ʼi henī ki te kupu “kiʼi tamaliki” ʼe faka ʼuhiga kia nātou tatau. ʼE ʼui e te tikisionalio faka Keleka ʼiloa ko te kupu ʼaenī ʼe “fakaʼaogaʼi ki te tamaliki tagata mo te tamaliki fafine.” Neʼe fakahā e Sesu he tokaga ki te tamaliki, ohage ko tana fai e Sehova. Ko te tokaga ʼaia ʼe fai ki te tamaliki fuli, ʼaē tagata mo ʼaē fafine. (Hepeleo 1:3; vakaʼi ia Teutalonome 16:14; Maleko 5:35, 38-42.) ʼE tonu ke ʼiloʼi ko te tokoni ʼi te ʼu Tohi faka Hepeleo ʼo ʼuhiga mo te tokaga ʼaē ki “te tamaliki tagata ʼe mole hanatou tāmai” ʼe kau ʼi te tokoni ʼo ʼuhiga mo te maʼua ʼo tatou ke tou tokakaga ki te tamaliki fuli ʼe mole hanatou tāmai peʼe ko hanatou faʼe peʼe ko nāua tokolua.

[Nota ʼi te lalo pasina]