Ko He Tokoni ʼi Tona Temi Totonu
1 ʼI te temi ʼaē neʼe tokagaʼi ai e te ʼapositolo ko Petelo ʼe maʼua ke ina fakaloto mālohiʼi tona ʼu tēhina, neʼe uga e tona loto tokaga ke ina foaki kia nātou ʼaki te ʼofa he ʼu fakamanatu pea mo he fakaloto mālohi. (2 Pet. 1:12, 13; 3:1) Neʼe ina uga ‘nātou ʼaē neʼe nātou tali te tui’ ke nātou haga fakatuputupu te ʼu kalitate fakalaumālie ke mole nātou liliu ai “ ʼo fakaʼaoga noa peʼe noa ʼo ʼuhiga mo te mālama totonu ʼo totatou ʼAliki ko Sesu Kilisito.” (2 Pet. 1:1, 5-8, MN ) Neʼe fakatuʼutuʼu e Petelo ke tokoni kia nātou ke nātou tui papau ki te pāui pea mo te fili ʼo nātou e Sehova, ke feala ai ke “mau mai [nātou], e [nātou] heʼe mele mo maʼa mo mauli i te tokalelei.” (2 Pet. 1:10, 11; 3:14) Maʼa te tokolahi ia nātou, neʼe liliu tana fakaloto mālohi ʼaia ko he tokoni ʼi tona temi totonu.
2 Ia ʼaho nei, ko te ʼu tagata taupau ʼe nātou toe tokakaga feiā ki te hahaʼi ʼa te ʼAtua. ʼI te ʼu “temi faigataa” ʼaenī, tokolahi te ʼu kaugana ʼa Sehova ʼe tonu ke nātou kātakiʼi te ʼu ʼaluʼaga faigataʼa. (2 Tim. 3:1) ʼUhi ko te hoko atu ʼo te ʼu fihifihia faka paʼaga, faka famili, pea mo totatou ʼu fihifihia takitokotahi, ʼe lagi hage ʼihi ko Tavite: “Neʼe ʼatakai ʼau e te ʼu tuʼutāmaki ʼo aʼu ki taku mole kei lava lau tonatou lahi. Neʼe lahi age taku ʼu hala ʼaē neʼe hoko mai kia te ʼau, ʼi taku ʼu hala ʼaē neʼe ʼau lava sio kiai; neʼe nātou lahi age ʼi te ʼu fuluʼi ʼulu ʼo toku ʼulu, pea neʼe mavae toku loto ia ʼau.” (Pes. 40:12) ʼE feala ke liliu te ʼu faigataʼa ʼaia ʼo lahi pea mole kei lagi tokagaʼi e ʼihi tonatou ʼu maʼua ʼi te faʼahi fakalaumālie pea mole kei nātou kau ki te minisitelio. Kae logola tonatou ʼu faigataʼaʼia, ‘neʼe mole galo kia nātou te ʼu fakatotonu ʼa Sehova.’ (Pes. 119:176) ʼE ko te temi lelei ʼaenī ki te kau tagata ʼāfea ke nātou foaki kia nātou ʼaia te tokoni ʼaē ʼe ʼaoga.—Isa. 32:1, 2.
3 Moʼo fakahoko te faʼahi ʼaia, neʼe fakaloto mālohiʼi te kau tagata ʼāfea ke nātou faiga tāfito ke nātou tokoni kia nātou ʼaē ʼe mole kei kau ʼi te temi nei ki te gāue fai faka mafola. Ko te faiga lahi moʼo fakahoko te faʼahi ʼaia ʼe lolotoga fai nei, pea ʼe toe lahi anai tona fai ʼi te māhina ʼo Malesio. ʼE kole ki te ʼu tēhina taupau ʼo te ʼu Ako Tohi ke nātou ʼaʼahi nātou ʼaē ʼe mole kei fai faka mafola, moʼo tokoni kia nātou ʼi te faʼahi fakalaumālie, ke feala hanatou toe kau ki te ʼu gāue ʼo te kokelekasio. Kapau ʼe ʼaoga, pea ʼe feala ke fakatuʼutuʼu ke fai he ako Tohi-Tapu ʼa he tahi kua vaivai fakalaumālie. ʼE feala ke kole ki ʼihi kaugā fagona ke nātou tokoni ʼo ʼuhiga mo te faʼahi ʼaia. Kapau ʼe kole atu ke koutou fai te faʼahi ʼaia, pea ʼe feala ke fua lelei takotou ʼu faiga, tāfito la mo kapau ʼe koutou foaki te fakaloto mālohi ʼaia ʼaki te agalelei pea mo te lotomahino.
4 Ko he tupuʼaga kia tatou ke tou fiafia mokā toe kau he tahi ki te ʼu gāue ʼo te kokelekasio. (Luka 15:6) Ko tatatou ʼu faiga ʼaē ke fakaloto mālohiʼi nātou ʼaē ʼe mole kei fai faka mafola, ʼe feala ke liliu moʼoni ko “he palalau ʼe fai ʼi tona lakaga totonu.”—Taag. 25:11.