Ko He Fakatuʼutuʼu Foʼou Ki Te ʼu Tānakiʼaga Tohi ʼo Te ʼu Fale ʼo Te Puleʼaga
Kua lauʼi taʼu nei te fua lelei ki te ʼu kokelekasio ʼi te malamanei katoa, te fakaʼaogaʼi ʼo tanatou ʼu tānakiʼaga tohi ʼi te Fale ʼo Te Puleʼaga, ʼaē neʼe higoa ʼāfea ko te tānakiʼaga tohi ʼo te Ako ʼo Te Minisitelio Faka Teokalatike. ʼI te temi muʼa, neʼe tonu ke tahi maʼu e te ʼu kokelekasio fuli tana tānakiʼaga tohi. Kae ʼuhi ʼaē heʼe tokolahi te ʼu kokelekasio ʼe nātou fakaʼaogaʼi te Fale ʼo Te Puleʼaga, ko ʼihi ʼe ko he ʼu kokelekasio ʼo te tahi lea, koia ʼe lelei age ke tahi maʼu e te lea tona tānakiʼaga tohi ʼe katoa ai te ʼu tohi fuli. ʼI te ʼu Fale ʼo Te Puleʼaga ʼaē ʼe lahi ai te ʼu fale fono, ʼe tonu ke maʼu e te ʼu fale fono takitahi tana tānakiʼaga tohi ʼi te lea ʼo nātou ʼaē ʼe fakatahitahi ai.
ʼE fakaʼamu, ʼaki te fakatuʼutuʼu ʼaia, ke mole lahi fau he ʼu tānakiʼaga tohi, pea ke mole lahi fau te ʼu tohi ʼaē ʼe totogi. Tahi ʼaē meʼa, ko te fakatahiʼi ʼo te ʼu tānakiʼaga tohi ʼo te ʼu kokelekasio e lua peʼe laka atu, ʼe maʼu ai anai he ʼu tānakiʼaga tohi ʼe katoa age. ʼI te fakatahiʼi ʼaia ʼe feala ke maʼu ai he ʼu tohi e lua ʼe nā tatau, pea ʼe feala ke fakaʼaogaʼi ki ʼamuli mokā laga anai he ʼu Fale foʼou ʼo Te Puleʼaga. Kapau ʼe maʼu he olotinatea ʼi te Fale ʼo Te Puleʼaga pea mo te CD-ROM ʼo te Sosiete, pea ʼe lagi ʼaoga lahi anai te meʼa gāue ʼaia ki ʼihi.
ʼE ko he tēhina ʼaē ka tokaga ki te tānakiʼaga tohi ʼo te Fale ʼo Te Puleʼaga, pea ʼe lelei age mokā ko he tahi ʼi te ʼu tagata taupau ki te Ako ʼo Te Minisitelio Faka Teokalatike. ʼE tonu ke ina hilifaki kiai te ʼu tohi foʼou, ʼo ina tohi fakalelei ke ʼiloʼi ʼe ko te tohi ʼo te tānakiʼaga tohi ʼo te Fale ʼo Te Puleʼaga. Tuʼa tahi ʼi te teitei taʼu fuli, ʼe tonu ke ina vakavakaʼi te tānakiʼaga tohi peʼe katoa ai te ʼu tohi pea mo ina vakaʼi peʼe kei lelei te ʼu tohi. Ko te ʼu tohi ʼo te ʼu tānakiʼaga tohi ʼaia ʼe mole tonu ke mavae ʼi te Fale ʼo Te Puleʼaga.
Ko te tānakiʼaga tohi ʼo te Fale ʼo Te Puleʼaga ʼe kei ʼaoga lahi kia nātou ʼaē ʼe kau ki te kokelekasio. ʼOfa pe ke tou fakahā ʼe maʼuhiga kia tatou te fakatuʼutuʼu ʼaia, ʼo tou tokakaga fakalelei kiai pea mo tou fakaʼaogaʼi moʼo kumi “te ʼatamai mālama ʼo ʼuhiga mo te ʼAtua.”—Taag. 2:5.