Tou Fakatahitahi Moʼo Fakavikiviki Kia Sehova
1. Koteā te kupu tāfito ʼo te fakatahi, pea he koʼe ʼe tāu mo Sehova ke tou fakavikiviki kia te ia?
1 Ko Sehova ʼe māfimāfi ʼi te mālohi, ʼe lahi ʼaupito tona poto, e haohaoa ʼi te faitotonu, pea ko ia ʼe ʼofa. ʼUhi ko ia te Tupuʼaga, ko Ia ʼaē neʼe ina foaki te maʼuli, pea ko ia te Tuʼi ʼo Te ʼAtulaulau, ko ia tokotahi pe ʼaē ʼe tāu ke tou tauhi kia te ia. (Pes. 36:9; Apk. 4:11; 15:3, 4) ʼI te Fakatahi Faka Tisitilike ʼaenī ko tona kupu tāfito “Koutou Faka Kolōlia Ki Te ʼAtua,” ʼe toe mālohi anai tatatou fakatotonu ʼaē ke tou fakavikiviki kia te ia ʼi tona ʼuhiga ʼAtua moʼoni tokotahi pe.—Pes. 86:8-10.
2, 3. ʼE lava fua lelei feafeaʼi kia tatou tatatou teuteu lelei?
2 Tou Teuteu Lelei: ʼE maʼuhiga ke tou teuteu lelei fakatomuʼa, ke tou lava maʼu te ʼu lelei fuli mai te meʼa kai fakalaumālie ʼaē ʼe foaki mai e Sehova maʼa tatou. (Ef. 5:15, 16) Kua koutou tohi koa he pepa ʼo ʼuhiga mo tokotou nofoʼaga, mo tokotou feʼāveʼaki pea mo tokotou ʼu ʼaho mālōlō? ʼAua naʼa koutou tuku ki he tahi temi te ʼu meʼa maʼuhiga ʼaia. Kapau ʼe koutou faka holomuli te kole ʼo hakotou ʼu ʼaho mālōlō, pea ʼe feala ke koutou hala ʼi he koga ʼo te temi fakafiafia ʼaia. ʼE tonu ke tou kau fuli ki te ʼu ʼaho fuli ʼo te fakatahi.
3 Koutou fakatuʼutuʼu ʼi te ʼaho fuli, ke koutou ʼōmai fakatomuʼa ki te fale ʼo te fakatahi. ʼE feala ai anai ke koutou heheka ʼi muʼa ʼo te hiva ʼo te ʼuluaki katiko, pea ʼe tokoni ai ke tokalelei takotou fakakaukau moʼo tali te ako ʼaē ka fai mai. ʼI te ʼu ʼaho fuli ʼe avahi anai te ʼu matapā ʼi te hola valu. Koutou tāʼofi pe he ʼu hekaʼaga maʼa tokotou famili pea mo nātou ʼe kaugā ʼōmai fakatahi mo koutou ʼi te motokā.
4. Koteā ʼaē ʼe fakamaʼua mai kia tatou fuli, pea koteā tona tupuʼaga?
4 ʼE kole mai ke tou mulimuli fuli ki te fakatuʼutuʼu ʼaē neʼe fai ʼo ʼuhiga mo te meʼa kai peʼe ke tou ʼaumai hatatou meʼa kai, kae mole tou mavae ʼi te fale ʼo te fakatahi ʼo tou ʼolo ʼo totogi mai he meʼa kai ʼi te temi kai. Ko takotou lagolago ki te fakatuʼutuʼu ʼaia ʼe tokoni anai ki te tokalelei pea ʼe feala ai ke tou fakatahi lahi mo totatou ʼu tēhina mo tuagaʼane ʼi te tui. (Pes. 133:1-3) Koutou manatuʼi ko te ʼu hina sioʼata pea mo te kava ʼe tapu ʼi te fale ʼo te fakatahi.
5. ʼE tou lava teuteuʼi feafeaʼi totatou loto ki te fakatahi?
5 Tou Fakalogo Pea Mo Ako: Neʼe teuteuʼi fakalelei e Esitalasi tona loto ke ina tali te folafola ʼa te ʼAtua. (Esita. 7:10) Neʼe ina tuku tona loto ki te ʼu akonaki ʼa Sehova. (Taag. 2:2) ʼE feala ke tou kamata teuteuʼi totatou loto ki te fakatahi ʼi muʼa ʼo tatatou mavae ʼi totatou loto fale, ʼo tou metitasio ki te kupu tāfito ʼo te fakatahi pea mo fai palalau kiai mo totatou famili.
6. Koteā ʼaē ka tokoni mai ke tou tokaga ki te polokalama? (Vakaʼi te talanoa.)
6 ʼI te kaugamālie ʼo te hahaʼi, ʼe feala ke fakaleluʼi tatou e te ʼu meʼa ʼe fai e ʼihi pea mo te logoaʼa. ʼUhi ko te ʼu meʼa ʼaia ʼe faigafua hatatou mole kei tokaga ʼo fakalogo ki te tagata akonaki. Ka hoko he meʼa feiā, pea ʼe feala ke mole kita logo ki te ʼu manatu maʼuhiga. Ko te ʼu tokoni ʼaē ʼe tuʼu ʼi te talanoa ʼe feala ke tokoni mai ke tou hikihiki tatatou fakalogo.
7, 8. ʼE tou lava fakahā feafeaʼi tatatou fakaʼapaʼapa ki te hahaʼi?
7 Tou Fakaʼapaʼapa Ki Te Hahaʼi: Ko te ʼu meʼa toho paki pea mo te ʼu kamela ʼe feala tona fakaʼaogaʼi lolotoga te polokalama, kae ke ʼaua naʼa tou fakalelu ki te hahaʼi, ʼe tonu ke tou nonofo ʼi totatou hekaʼaga. ʼE tonu ke vakaʼi ke mole fakalelu te hahaʼi ʼaki te ʼu telefoni pea mo te ʼu bipeurs. ʼE mole hunuki anai he ʼu meʼa ki te meʼa hunuki hila ʼo te fale ʼo te fakatahi.
8 ʼE tou fakaʼamu lahi ke tou fakatahitahi moʼo fakavikiviki kia Sehova! ʼOfa pe ke tou fakatotonu ke tou faka kolōlia kia te ia ʼo tou kau ki te ʼu ʼaho fuli, mo fakalogo fakalelei, pea mo maʼuliʼi te ʼu meʼa ʼe tou ako.—Teu. 31:12.
[Talanoa ʼo te pasina 3]
Koutou Fakalogo ʼi Te ʼu Fakatahi
▪ Koutou fakakaukauʼi te ʼu kupu tāfito ʼo te ʼu akonaki
▪ Koutou vakaʼi te ʼu vaega faka Tohi-Tapu
▪ Koutou toʼo he ʼu nota nounou
▪ Koutou tohi ʼi hona ʼaluʼaga makehe te ʼu puani ʼaē ʼe tonu ke koutou maʼuliʼi
▪ Koutou toe vakaʼi te ʼu meʼa ʼaē neʼe koutou ako