Te Tali Ki ʼAkotou ʼu Fehuʼi
◼ ʼE tonu koa ke fakakau te ako faka famili ki te pepa tānaki gāue ʼo te kokelekasio?
Kapau ko he tāmai peʼe ko he faʼe Kilisitiano ʼe ina fai he ako faka famili, pea ʼe kau ʼi te ako ʼaia he ʼu fānau ʼe mole heʼeki papitema, ʼe feala ke ina tohi ʼi tana pepa tānaki gāue he hola e tahi ʼi te vāhaʼa, he ʼaʼahi e tahi ʼi te vāhaʼa, pea ko he ako Tohi-Tapu e tahi ʼi te māhina. ʼE toe tatau aipe, mo kapau ko te ako ʼe fakalaka ʼi he hola katoa, peʼe fakalaka ʼi te tuʼa tahi ʼi te vāhaʼa, peʼe fai ʼaki te fānau takitokotahi.—Vakaʼi te tohi Notre ministère ʼi te pasina 104.
Kapau ko te famili katoa kua nātou papitema, pea ʼe mole tohi anai te temi pea mo te ako ʼi te kiʼi pepa tānaki gāue (gata pe mo kapau ko he tamasiʼi kua papitema, ʼe kei ina lolotoga ako te lua tohi). ʼE fai feiā koteʼuhi ko te pepa tānaki gāue ʼo te kokelekasio, ʼe tohi tāfito ai te ʼu gāue ʼaē ʼe fai ʼi te faka mafola ʼo te logo lelei, pea mo te akoʼi ʼo te moʼoni faka Tohi-Tapu kia nātou ʼaē heʼeki nātou foaki tonatou maʼuli ki te ʼAtua, pea mole heʼeki nātou liliu ko he ʼu kaugana kua papitema ʼa Sehova. (Mat. 24:14; 28:19, 20) Kae logola te faʼahi ʼaia, ʼe tonu ke fai tuʼumaʼu te ako faka famili.
ʼE ko te maʼua ʼo te ʼu mātuʼa ke nātou ako mo tanatou fānau. Ko nātou ʼaē ʼe nātou loto ki he tokoni moʼo fakatuʼutuʼu pea mo hikihiki tanatou ako faka famili, ʼe feala hanatou kumi tokoni ki te kau tagata ʼāfea. Kapau ʼaki te ʼu ʼaluʼaga, ʼe lelei age ki he tahi kaugā fai faka mafola ke ina fai te ako ʼa he tama peʼe ko he taʼahine ʼe mole heʼeki papitema ʼa he famili Kilisitiano ʼo te kokelekasio, pea ʼe tonu ke fakaʼui te faʼahi ʼaia ki te taupau pelesita peʼe ko te tagata taupau gāue. Kapau ʼe tali te ako ʼaia, ko ia ʼaē ka ina takitaki, ʼe ina fai anai hana pepa tānaki ʼo te ako Tohi-Tapu ʼaia.
Ko te akoʼi ʼo te fānau ke nātou mulimuli ki te ʼu ala ʼo Sehova, ʼe fakamaʼua kiai he temi lahi age pea mo he ʼu gāue, ʼe mole tohi ʼi te pepa tānaki gāue. (Teu. 6:6-9; Taag. 22:6) ʼE tonu ke fai he ʼu fakavikiviki ki te ʼu mātuʼa Kilisitiano, ʼuhi ko tanatou ʼamo te maʼua mamafa ʼaē ko te akoʼi ki tanatou fānau “te akonaki pea mo te manatu ʼa Sehova.”—Ef. 6:4, MN.