Te Lelei ʼAupito ʼo Te Poto Fakaʼatua
1 Ko ʼihi hahaʼi ʼe nātou ʼui, ʼe tonu ki te kau Fakamoʼoni ʼa Sehova ke nātou tokoni tāfito ki te fakatokatoka ʼo te ʼu fihifihia ʼaē ʼe tau mo te hahaʼi ia ʼaho nei. Ko te hahaʼi ʼaia ʼe mole nātou sio ki te lelei ʼaupito ʼo tatatou gāue, ʼaē ko te akoʼi ia te Tohi-Tapu ki te hahaʼi. ʼE hage ko te meʼa ʼaē neʼe tohi e te ʼapositolo ko Paulo: “Ko te palalau ʼaē ʼo ʼuhiga mo te pou fakamamahi, ʼe ko he meʼa fakavale kia nātou ʼaē ʼe mamate, kae kia tatou ʼaē ʼe lolotoga hāofaki, ʼe ko te mālohi ʼo te ʼAtua.” (1 Ko. 1:18, MN ) Ei, ʼe tou ʼiloʼi ko te minisitelio faka Kilisitiano ʼe ko te gāue maʼuhiga ʼaupito ʼaē ʼe fai ia ʼaho nei ʼi te kele.
2 He Maʼuli ʼe Lelei Age ʼi Te Temi Nei: Ko te ʼu faiga ʼa te tagata moʼo fakatokatoka te ʼu fihifihia ʼo te malamanei, neʼe mole lahi hona ʼu fua. Ko te ʼu lao ʼaē ʼe nātou tapuʼi te ʼu aga kovi, neʼe mole nātou tāʼofi te ʼāsili ʼa te ʼu fai fakapō. Ko te ʼu fuakava ki te tokalelei pea mo te ʼatu kautau ʼaē neʼe fakatuʼu moʼo taupau te faʼahi ʼaia, neʼe mole nātou fakagata te tau. Ko te ʼu tokoni faka sosiale neʼe mole nātou fakagata te maʼuli masiva ʼa te hahaʼi. (Pes. 146:3, 4; Sel. 8:9) Kae ko te logo ʼo te Puleʼaga, neʼe ina fetogi te maʼuli ʼa te toko lauʼi miliona hahaʼi, he neʼe tokoni kia nātou ke nātou maʼu te ʼulugaaga foʼou ʼaē ʼe tali e te ʼAtua. (Loma 12:2; Kol. 3:9, 10) ʼI tanatou fai ia te faʼahi ʼaia, kua lelei age tonatou maʼuli ʼi te temi nei.—1 Tim. 4:8.
3 He Ka Haʼu Taulekaleka: Ko te poto fakaʼatua ʼe mole gata ʼaki pe tana tokoni mai ke tou popoto ʼi te fai puleʼaki ki te ʼu fihifihia ʼo te maʼuli, kae ʼe toe tokoni mai foki ke tou fai he ʼu fakatuʼutuʼu lelei ki te ka haʼu. (Pes. 119:105) ʼE ina fakahā mai te vaʼiganoa ʼo tatatou faigaʼi ke tou fetogi te mālama ʼaenī. (Tnk. 1:15; Loma 8:20) ʼE tou loto fakafetaʼi ʼaupito, heʼe mole tou maumauʼi totatou maʼuli ʼo faigaʼi ki he ʼu fakatuʼutuʼu ʼe mole hoko moʼoni anai! Kae ʼe tou faiga tāfito ki te fakapapau moʼoni ʼa Sehova, ʼo ʼuhiga mo “he lagi foou mo he kele foou” ʼaē ʼe maʼu ai anai ia te faitotonu. Ka hoko mai anai te ʼaho fakamāu ʼa Sehova, ʼe hā lelei anai neʼe filifili lelei e te hahaʼi ʼaē neʼe falala ki te poto fakaʼatua.—2 Pet. 3:10-13; Pes. 37:34.
4 Ko te hahaʼi ʼaē ʼe nātou mulimuli ki te “poto o te malama aeni,” ʼe hage ʼe mole ʼaoga kia nātou te poto fakaʼatua, kae ʼi tona fakahagatonu, ʼe ko te poto pe ʼaia e tahi ʼe tonu ke tou mulimuli kiai. (1 Ko. 1:21; 2:6-8) Koia ʼe tou haga kalagaʼi ʼi te kele katoa, te logo ʼaē ʼe haʼu mai te ʼAtua, ʼaē ʼe “poto tokotahi.”—Loma 16:27, MN.