Ko He Gāue ʼe Lagolago Kiai Te ʼAtua
1 ʼI te kau kaugana ʼa te ʼAtua ia ʼaho nei, ko te tokolahi neʼe mole lahi tanatou ako, ʼe mole lahi tonatou ʼu koloā, peʼe mole nātou ʼiloa ʼi te mālama ʼaenī. Ko te tupuʼaga ʼaia ʼo te meʼa noaʼi e ʼihi hahaʼi totatou minisitelio. (Isa. 53:3) Kae ko te ako faka Tohi-Tapu ʼaē ʼe tou fai, ʼe ina foaki he fakaloto fīmālie pea mo he ʼamanaki ki te ʼu lauʼi miliona hahaʼi ʼi te malamanei katoa. Koteā ʼaē ʼe tokoni ki te ʼu hahaʼi ʼaia ʼe mole ʼiloa, ke fua lelei tanatou gāue? ʼE ko te lagolago ʼa te ʼAtua. (Mat. 28:19, 20; Gaue 1:8) Neʼe fakamahino fēnei e te ʼapositolo ko Paulo: “Ko te ʼAtua neʼe ina filifili te ʼu meʼa vaivai ʼo te malamanei moʼo fakaufiufi te ʼu meʼa mālohi.”—1 Ko. 1:26-29, MN.
2 Ko te kau ʼapositolo pea mo te kau Kilisitiano ʼo te ʼuluaki sēkulō neʼe mole ‘ko he ʼu hahaʼi neʼe ʼolo ki te ʼu faleako lalahi, pea neʼe mole nātou ʼiloa’. (Gaue 4:13) Kae ʼaki he lototoʼa, neʼe nātou fakahoko tanatou gāue ʼaē ko te faka mafola ia te logo lelei, pea neʼe tapuakina e Sehova tanatou ʼu faiga. Logola te ʼu faigataʼaʼia pea mo te ʼu fakafeagai, ‘neʼe haga tuputupu te folafola ʼa Sehova ʼaki he mālohi ʼaupito.’ Neʼe mole he meʼa neʼe feala ke ina tāʼofi te gāue, he neʼe lagolago kiai te ʼAtua. (Gaue 5:38, 39; 19:20) ʼE toe hoko te faʼahi ʼaia ʼi totatou temi. Māʼia mo te fakafeagai mālohi ʼa te kau takitaki aga fefeka, neʼe mole feala ke ina tāʼofi te mālohi pea mo te tuputupu ʼo te logo lelei.—Isa. 54:17.
3 Ko Te ʼAtua ʼAē ʼe Tonu Ke Fakavikiviki: Ko te tali ʼo tatou ohage ko te kau minisi ʼa te ʼAtua, ʼe tonu koa ke tou laupisi ai kia tatou totonu? Kailoa. ʼI tana talanoa ʼo ʼuhiga mo te minisitelio faka Kilisitiano, neʼe tohi fēnei e Paulo: “Ko te koloā ʼaia, ʼe tou maʼu ʼi te ʼu ipu kele, koteʼuhi ko te mālohi ʼaē ʼe laka age ʼi te mālohi māhani, ʼe ko te mālohi ʼo te ʼAtua, kae mole ko te mālohi ʼaē ʼe haʼu mai ia tatou.” (2 Ko. 4:7, MN ) Neʼe mahino kia Paulo, neʼe ina lava fakahoko tana minisitelio, ʼuhi pe ko te mālohi ʼaē neʼe tuku age e te ʼAtua.—Ef. 6:19, 20; Filp. 4:13.
4 ʼO feiā mo tatou, ʼe tou ʼiloʼi ʼe tou lava fakahoko te gāue fai faka mafola, ʼuhi pe heʼe “tokoni mai te Atua” kia tatou. (Gaue 26:22) ʼI te fai faka mafola ʼaia ʼi te malamanei katoa, ʼe fakaʼaogaʼi mālohi tatou e Sehova moʼo fakatupu he gatutu ʼi te ʼu puleʼaga—ko he fakamelomelo ki te fakamāu fakamataku ʼaē kua vave hoko. (Asea 2:7) ʼI pilivilesio lahi hatatou ‘kaugā gāue mo te ʼAtua’ ʼi te taʼukai fakalaumālie fakaofoofo!—1 Ko. 3:6-9.