Koutou Loto Fakafetaʼi
1 Logola tatatou maʼuʼuli ʼi “he u temi faigataa,” kae ʼe lahi te ʼu tupuʼaga ke tou loto fakafetaʼi ai kia Sehova. (2 Tim. 3:1) ʼE tou loto fakafetaʼi tāfito ʼuhi ko tona ʼofa ʼo foaki mai tona ʼAlo moʼo hāofaki ʼo tatou. (Soa. 3:16) Tahi ʼaē meʼa, ʼe tou mahu ʼi te meʼa kai fakalaumālie kae pakupapaku fakalaumālie te hahaʼi ʼo te lotu hala. (Isa. 65:13) ʼE tou kau ʼi te fale tautēhina ʼi te malamanei katoa, pea mo tou maʼu te pilivilesio ʼaē ke tou kau ki te faka mafola lahi ʼo te tauhi moʼoni. (Isa. 2:3, 4; 60:4-10, 22) ʼE tou lava fakahā feafeaʼi tatatou loto fakafetaʼi kia Sehova ʼo ʼuhiga mo te ʼu tapuakina lahi ʼaē ʼe ina foaki mai kia tatou?—Kol. 3:15, 17.
2 Ko He Selevisi ʼAki Te Fiafia Pea Mo Te Loto Katoa: ʼI tana talanoa ʼo ʼuhiga mo te foaki ʼo he ʼu koloā, neʼe tohi fēnei e te ʼapositolo ko Paulo: “E ofa te Atua kia ia ae e ina foaki fakafiafia.” (2 Ko. 9:7) ʼE toe faka ʼuhiga te pelesepeto ʼaia ki tatatou selevisi ki te ʼAtua. ʼE hā tatatou loto fakafetaʼi ʼi tatatou fiafia ʼi te moʼoni, mo tatatou fiafia ʼi te ʼu fono, tatatou faʼafai ʼi te fai faka mafola, pea mo tatatou fiafia ʼi te fai ʼo te finegalo ʼo te ʼAtua.—Pes. 107:21, 22; 119:14; 122:1; Loma 12:8, 11.
3 ʼI te Lao ʼo te Iselaele ʼāfea neʼe ʼi ai te ʼu meʼa ʼofa neʼe mole fakatuʼutuʼu peʼe tonu ke lahi feafeaʼi te ʼu meʼa ʼofa ʼaia. Neʼe feala ki te kau atolasio takitokotahi ke nātou fakahā tonatou loto fakafetaʼi ʼo nātou foaki “ ʼo mulimuli ki te tapuakina ʼa Sehova” ʼaē neʼe nātou maʼu. (Teu. 16:16, 17) ʼO toe feiā ia ʼaho nei, ko he loto fakafetaʼi ʼe ina uga anai tatou ke tou faiga lahi ʼi te gāue ʼaē ko te faka mafola ʼo te Puleʼaga, pea mo te fai ʼo he ʼu tisipulo, ʼo mulimuli ki totatou ʼu ʼaluʼaga takitokotahi. ʼI te agamāhani, ʼe ko he ʼu fealagia ʼaia moʼo fakahā tatatou loto fakafetaʼi. Ko ʼihi ʼe nātou fakaʼaogaʼi te ʼu temi ʼaē ʼe mole nātou gāue ai peʼe mole ako ai, pea mo te ʼu māhina momoko moʼo fakalahi tonatou temi fai faka mafola, pea ko ʼihi ʼe nātou pionie vaeluaʼi temi. ʼE feala koa ke fakalahi age takotou gāue ʼi te minisitelio?
4 Tou Mahu ʼi Te Fakafetaʼi: Ko te ʼaluʼaga maʼuhiga moʼo fakahā ai totatou loto fakafetaʼi kia Sehova ʼe ko te faikole. (1 Tes. 5:17, 18) ʼE fakaloto mālohiʼi tatou e te Folafola ʼa te ʼAtua ke “tou mahu ʼi te tui ʼi te loto fakafetaʼi.” (Kol. 2:7, MN ) Tatau aipe peʼe tou maʼumaʼua lahi peʼe tou lotohoha, kae ʼe tonu ke tou loto fakafetaʼi tuʼumaʼu ʼi tatatou ʼu faikole ʼaē ʼe tou fai ʼi te ʼaho fuli. (Filp. 4:6) Koia, ʼaki tatatou minisitelio pea mo tatatou ʼu faikole, ʼofa pe ke ‘lahi age ai tatatou ʼu fakafetaʼi ki te ʼAtua.’—2 Ko. 9:12.