Tou Loto Fakafetaʼi Ki Te ʼu Meʼa ʼAē ʼe Tou Maʼu
1 “Ko te ʼAtua ʼe ina fakahā totonu mai kia tatou tona ʼofa ʼi te faʼahi ʼaenī, ko Kilisito neʼe mate maʼa tatou ka kei tou agahala.” (Lom. 5:8) ʼE tonu ke tou loto fakafetaʼi fuli ia tatou ki te sakilifisio maʼuhiga ʼaē neʼe fai maʼa tatou e Sehova ʼAtua pea mo tona ʼAlo! ʼAki te taʼataʼa ʼa Kilisito ʼaē neʼe liligi, ʼe foaki mai kia tatou te fealagia ʼaē ke tou maʼu te maʼuli heʼegata, ʼaia ko he meʼa ʼe mole feala ke foaki mai e he tagata kia tatou.
2 ʼE tou lava fakahā feafeaʼi tatatou loto fakafetaʼi? Tokolahi te hahaʼi ʼe nātou fia ʼiʼinu ki te ʼatamai mālama moʼoni, ʼaē ʼe lava maʼu pe ʼi te Folafola Taputapu ʼa te ʼAtua. Ko te loto ʼa Sehova ke tou mālama ki te moʼoni. (1 Tim. 2:4) ʼE tou fakahā tatatou loto fakafetaʼi ki te moʼoni ʼaki tatatou ‘faka mafola te logo lelei ʼo te Puleʼaga ʼo te ʼAtua.’ (Luka 4:43) ʼE fakahā e tatatou kau fakamalotoloto ki te gāue ʼaia, ʼe tou loto fakafetaʼi ʼi te ʼaluʼaga ʼo te mate ʼa Sesu maʼa tatou pea ʼe tou fia faʼifaʼitaki ki ai ʼo tou fakalogo agatonu ki tana fakatotonu ʼaē ke tou fai ni ʼu tisipulo.—Mat. 28:19, 20.
3 Koteā te ʼu agaaga ʼo te fai faka mafola ʼe feala ke tou kau kiai? ʼE feala koa hatatou pionie vaeluaʼi temi ʼi ʼihi lakaga? ʼI tanatou ʼosi faka au te totogi, e lagi feala ki niʼihi ke nātou pionie katoa. ʼAki tatatou taupau te ʼu faigamālie ʼaia, ʼe feala hatatou fakatuputupu he toe temi lahi ke tou fakaʼaogaʼi ki te faka mafola ʼo te logo lelei ʼo te Puleʼaga. ʼI te ʼu temi kua hili neʼe lagi koutou fakatuʼutuʼu ke koutou pionie, kae neʼe ʼi ai te ʼu faigataʼaʼia. Lagi kua fetogi ʼakotou ʼu ʼaluʼaga. Kapau koia ʼaia, kua koutou fakakaukauʼi lelei koa ke koutou liliu ʼo pionie katoa peʼe koutou pionie vaeluaʼi temi?
4 ʼE tuputupu tatatou loto fakafetaʼi mokā tou sisio ki te meʼa ʼaē ʼe hoko ʼi ʼotatou tafa. ʼE ʼi ai te agamālohi ʼaē ʼe fakaʼāʼāsili, mo te fehiʼa, pea mo te ʼu tau ʼaē ʼe hoko ʼi te malamanei katoa. Neʼe fakamatalatala lelei e Paulo totatou temi ohage ko he ʼu temi “maʼuhiga ʼaupito” pea mo “faigataʼa.” (2 Tim. 3:1) ʼI te lotolotoiga ʼo te ʼaluʼaga mamahi ʼaia, ʼe tou maʼu fakalahi te logo lelei ʼaē ke tou fakahā ki niʼihi. ʼE tou maʼu te ʼu nusipepa matalelei e lua, ko Te Tule Leʼo pea mo te Réveillez-vous! ʼE tou fakahā te apone ʼi te māhina ʼaenī. ʼE tou toe maʼu foki mo te ʼu kaupepa ʼe lahi te ʼu puani ʼe talanoa kiai. Ko te ʼu tohi ʼaia ʼe feala ke nātou fakafimālieʼi moʼoni ia nātou ʼaē ʼe nātou lau. ʼE tonu ke uga tatou e tatatou loto fakafetaʼi ki te ʼu meʼa ʼe tou maʼu, ke lahi tatatou vaevae ki niʼihi.—Hep. 13:16.
5 Lagi ʼi te koga meʼa ʼaē ʼe koutou nonofo ai, ʼe mole lahi he tokaga ʼa te hahaʼi ki te ʼu meʼa fakalaumālie. Kae ʼi te tahi faʼahi, ʼe ʼi ai te ʼu telituale ʼe maʼu lahi ai tona fua. ʼE lahi te fia logo ʼi te hahaʼi ʼaē ʼe palalau ki he tahi lea. Kapau ʼe koutou lava palalau ki tanatou lea, ʼe feala ʼapē koa hakotou tokoni kia nātou? ʼE feala ke tuku atu e te taupau faka silikosikilipisio he ʼu tokoni ʼo ʼuhiga mo te faʼahi ʼaia.
6 ʼE lahi te ʼu tupuʼaga ke tou loto fakafetaʼi ai ʼo ʼuhiga mo te ʼu meʼa ʼaē ʼe tou maʼu, pea ʼe lahi moʼoni te ʼu meʼa lelei ʼe tou maʼu. Ko tatatou loto fakafetaʼi kia Sehova ʼe feala ke lelei age tona fakahā ʼaki tatatou fakaʼilo ʼo tona huafa pea mo tana ʼu fakatuʼutuʼu ki niʼihi.—Is. 12:4, 5.