Te Musika Fakaloto Mālohi
1 Ko te musika pea mo te hiva ʼe ko te ʼu faʼahi maʼuhiga ʼi te tauhi moʼoni. ʼI te Iselaele ʼāfea, ko Asafe pea mo tona ʼu tēhina neʼe nātou hiva fēnei: “Koutou fakafetaʼi kia Sehova. . . . Koutou hiva maʼa ia, koutou fai he ʼu hiva maʼa ia, koutou tokagaʼi tana ʼu gāue lalahi fuli.” (1 Fkma. 16:8, 9) Ia ʼaho nei, ʼe tou hiva kia Sehova ʼi tatatou ʼu fono ʼaē ʼe fai ʼi te vāhaʼa fuli. (Ef. 5:19) Ko he faigamālie fakatalakitupua ʼaia ke tou fakavikiviki ai ki tona huafa!—Pes. 69:30.
2 Ko te fakalogo ki te ʼu musika ʼo te ʼu Mélodies du Royaume, ʼe feala ai ke ina fakafonu totatou ʼatamai ʼaki he ʼu manatu fakalaumālie. Neʼe fakamahino fēnei e te tuagaʼane: “Mokā ʼe ʼau logo ki te musika ʼo te ʼu katiko, ʼe ʼau manatuʼi tonatou ʼu kupu. ʼAki te musika fakafiafia ʼaia ʼe ʼau manatuʼi ai ia Sehova!”—Filp. 4:8.
3 Te ʼu Lakaga ʼAē ʼe Feala Ke Tou Fakalogo Ki Te ʼu Musika ʼAia: Ko te fakalogo ʼi tota ʼapi ki te ʼu Mélodies du Royaume, ʼe tupu ai he ʼaluʼaga fīmālie pea mo fakalaumālie ʼe tokoni ki te tokalelei ʼa te famili. Neʼe tohi fēnei e te famili: “ ʼE lahi tamatou fakalogo ʼo te [musika] ʼaia ʼi tomatou loto fale pea mo te motokā, pea ʼe mole mātou fiu ʼi te fakalogo ki te ʼu musika kehekehe ʼaia. Ko te meʼa ʼaē ʼe tau hoko, ʼaki te ʼu Mélodies du Royaume ʼe tokalelei ai tamatou fakakaukau mokā mātou ʼolo ki te ʼu fono peʼe ki te ʼu fakatahi.” Neʼe ʼui fēnei e te tuagaʼane: “Mokā ʼau fai taku ʼu gāue ʼi fale, ʼe ʼau fiafia lahi ʼi te fakalogo kiai—ʼe ʼau fiafia māʼia mo te temi ʼaē ʼe ʼau fetuʼi fō ai. ʼE ʼau fakalogo ki te ʼu musika ʼaia ʼi te temi ʼaē ʼe ʼau lotovaivai ai. Ka ʼau fakalogo ki te musika ʼaia pea ʼe ʼau fiafia ʼaupito! . . . ʼE fakafiafia te ʼu musika fuli ʼaia.” ʼE ʼi ai koa te ʼu lakaga ʼe koutou logoʼi ai ki te fua lelei ʼo te fakalogo ki te musika ʼaia?
4 ʼE lahi te ʼu musika ʼi te temi nei ʼe talanoa ki te ʼu manatu ʼo te mālama. ʼE feala ki te ʼu mātuʼa ke nātou tokoni ki tanatou fānau ke nātou leleiʼia te ʼu musika ʼaē ʼe ʼaoga kia nātou, ohage ko te ʼu Mélodies du Royaume. Tokolahi te kau ako ʼo te Tohi-Tapu pea mo te ʼu hahaʼi ʼaē ʼe nātou fia logo, ʼe nātou fiafia anai ʼi te fakalogo ki te musika logo lelei ʼaia, ʼaē ʼe faka kolōlia ai kia Sehova pea mo fakaloto mālohi.—Pes. 47:1, 2, 6, 7.