Te Faʼahiga Meʼa ʼe Feala Ke Tou Leleiʼia Ai Te ʼu Kātiko

Ko te ʼu hahaʼi ʼa te ʼAtua ʼe natou fakaʼuhiga te musika ohagē ko he meʼa ʼofa taulekaleka ʼe haʼu mai ia Sehova. (Sakp. 1:17) Tokolahi te ʼu kōkelekāsio ʼe natou fakatagi māmālie ia te ʼu kātiko ʼi muʼa ʼo te kamata peʼe ko te hili ʼo tanatou ʼu fono. Ko te fakatagi ʼo te musika Fakateokalatike ʼe ko he faʼahiga fakatalitali lelei ʼaia ʼo tātou ki te ʼu fono. ʼE tokoni kiā tātou moʼo teuteuʼi totatou ʼatamai ki te tauhi. Pea tahi, ko te fakatagi ʼo he ʼu musika foʼou ʼe toʼo mai te tohi hiva kātiko ʼe tokoni kiā tātou ke tou māhani ki te ʼu fasi hiva pea mo feala ke tou hiva moʼoni te ʼu kātiko ʼaia. Ko te ʼu taʼi musika ʼaia ʼaē ʼe fakatagi ʼi te ʼosi ʼo te ʼu fono ʼe ina taupau te loto fiafia pea mo he ʼu fakatahitahi fakalotomālohi. Koia, ʼe tuku ki te ʼu kolesi tagata ʼāfea ʼo te ʼu kōkelekāsio takitahi te fili ʼo te faʼahiga musika ʼaē ʼe tonu ke fakaʼaogaʼi te u pā fakatagi ko tona kupu tāfito Sing to Jehovah—Piano Accompaniment (Tou Hiva Kiā Sehova—ʼAki te piano) ʼi muʼa pea mo te hili ʼo te fono. ʼE tonu anai ke natou tokaga ki te mālohi ʼo te tagi ʼo te musika ke feala he felōgoi ʼo te ʼu fai palalau.