“Koutou Faka Fālahi”
1. Koteā ʼaē ʼe fakamaʼua mai kia tatou takitokotahi?
1 ʼI te fale tautēhina faka Kilisitiano, ʼe tou tahi maʼu te maʼua ʼaē ke tou fakatuputupu te ʼofa ʼi te kokelekasio. (1 Pet. 1:22; 2:17) ʼE tupu te ʼofa ʼaia mokā tou “faka fālahi” totatou ʼofa ki te hahaʼi. (2 Ko. 6:12, 13, MN ) He koʼe ʼe maʼuhiga ke tou feʼiloʼiʼaki lelei mo te ʼu tēhina mo tuagaʼane?
2. He koʼe ʼe maʼuhiga ke tou fakakaumeʼa mo te ʼu tēhina mo tuagaʼane?
2 ʼE Tuputupu ʼo Mālohi Te Fakakaumeʼa: ʼI tatatou feʼiloʼiʼaki lelei mo te ʼu tēhina mo tuagaʼane, ʼe tupu ai hatatou leleiʼia tanatou tui, mo tanatou faʼa kātaki, pea mo tanatou tahi ʼu kalitate lelei. ʼE mole maʼuhiga kia tatou tanatou ʼu kiʼi hala, pea ʼe tuputupu te felogoi fakakaumeʼa. ʼI tatatou feʼiloʼiʼaki lelei, ʼe feala ai ke tou fefakaloto mālohiʼaki pea mo fefakaloto fīmālieʼaki. (1 Tes. 5:11) ʼE feala ke tou liliu ko “he tokoni ʼe fakaloto mālohi” moʼo tauʼi te ʼu fakahala ʼo te mālama ʼa Satana. (Kol. 4:11) ʼUhi ko te ʼu faigataʼaʼia ʼo te ʼu ʼaho fakamuli, ʼe tou loto fakafetaʼi ʼaupito heʼe ʼi ai totatou ʼu kaumeʼa lelei ʼi te hahaʼi ʼa Sehova!—Taag. 18:24.
3. ʼE tou lava fakaloto mālohiʼi feafeaʼi totatou ʼu tēhina pea mo tuagaʼane?
3 Ko he ʼu kaumeʼa lelei ʼe feala ke nātou fakaloto mālohiʼi pea mo fakaloto fīmālieʼi tatou ʼi te ʼu temi ʼaē ʼe tou tau ai mo he ʼu faigataʼaʼia lahi. (Taag. 17:17) Ko te tuagaʼane neʼe ina tauʼi tana manatu ʼaē ʼe mole hona ʼaoga, pea ʼe ina ʼui fēnei: “Neʼe ʼi ai te ʼu kaumeʼa neʼe nātou fakahā mai te ʼu faʼahi ʼaē ʼe ʼau lelei ai, pea mo nātou tokoni mai ke ʼau tauʼi taku ʼu manatu ʼaē neʼe mole lelei.” Ko te ʼu kaumeʼa ʼaia ʼe ko he tapuakina mai ia Sehova.—Taag. 27:9.
4. ʼE lava feafeaʼi hatatou feʼiloʼiʼaki lelei mo nātou ʼi te kokelekasio?
4 Tou ʼOʼofa Ki Totatou ʼu Tēhina Mo Tuagaʼane: ʼE tou lava faka fālahi feafeaʼi totatou ʼofa ki totatou ʼu tēhina mo tuagaʼane? ʼE mole tonu ke gata ʼaki pe tatatou ʼu fakaʼalofa ʼi te ʼu fono, kae tou faigaʼi ke tou fai palalau mo nātou ki he ʼu faʼahi maʼuhiga. ʼE mole tou fia ʼiloʼi meʼa fuli anai ʼo ʼuhiga mo tonatou maʼuli, kae ʼe tou vakaʼi anai peʼe koteā ʼaē ʼe feala ke ʼaoga kia nātou. (Filp. 2:4; 1 Pet. 4:15) Moʼo fai te faʼahi ʼaia, ʼe feala hatatou fakaafe nātou ke tou kakai fakatahi. (Luka 14:12-14) Peʼe feala hakotou fakatuʼutuʼu ke koutou gāue fakatahi ʼi te fai faka mafola. (Luka 10:1) Kapau ʼe tou fakatuʼutuʼu ke tou feʼiloʼiʼaki lelei mo totatou ʼu tēhina, ʼe tou lagolago ai ki te logo tahi ʼi te kokelekasio.—Kol. 3:14.
5. Koteā ʼaē ʼe feala ke tou fai ke tou maʼu ai hotatou tahi ʼu kaumeʼa?
5 ʼE tou filifili pe koa totatou ʼu kaumeʼa ia nātou ʼaē ʼe taʼu tahi mo tatou peʼe ko nātou ʼaē ʼe nātou leleiʼia te ʼu meʼa ʼaē ʼe tou leleiʼia? ʼE mole tonu ke faka tuʼakoi e te ʼu faʼahi ʼaia te ʼu fakakaumeʼa ʼaē ʼe feala ke tou maʼu ʼi te kokelekasio. Ko Tavite mo Sonatane, pea mo Lute mo Naomi, neʼe nātou felogoi lelei ʼaupito logola te kehekehe ʼo tonatou taʼu pea mo tonatou maʼuli. (Lute 4:15; 1 Sam. 18:1) ʼE feala koa ke koutou maʼu hokotou tahi ʼu kaumeʼa? Kapau ʼe koutou fai te faʼahi ʼaia pea ʼe koutou maʼu anai te ʼu tapuakina.
6. Ko te ʼu lelei fea ʼaē ʼe tou maʼu mokā tou faka fālahi totatou ʼofa ki totatou ʼu tēhina?
6 ʼI tatatou faka fālahi totatou ʼofa, ʼe tou fefakaloto mālohiʼaki pea mo lagolago ki te tokalelei ʼi te kokelekasio. Tahi ʼaē meʼa, ʼe tapuakina tatou e Sehova ʼuhi ko te ʼofa ʼaē ʼe tou fakahā ki totatou ʼu tēhina. (Pes. 41:1, 2; Hep. 6:10) He koʼe ʼe mole koutou fakatuʼutuʼu ke koutou feʼiloʼiʼaki mo he tokolahi?