ʼE Feala Hakotou Fiafia ʼi He ʼu Fakakaumeʼa ʼe Fualoa
ʼE ʼI AI te ʼu faka tuʼakoi ʼi te ʼu fakakaumeʼa. ʼI tona fakahagatonu, neʼe fakakikite e te Tohi-Tapu ʼi “te ʼu ʼaho fakamuli” ʼaenī ʼe mole ʼi ai anai te ʼofa, pea mo te agatonu. (2 Timoteo 3:1-5; Mateo 24:12) Ko te ʼu ʼaluʼaga ʼaia neʼe nātou fakaʼāsili te logo tokotahi ʼe mole hona fakatatau. Neʼe ʼui fēnei e te tahi: “Ko toku ʼu vāhaʼa fale ʼe hage ko te aleka ʼo Noe. Kapau ko koutou ʼe mole ko he taumatuʼa, ʼe mole feala ke koutou fakatahi mo nātou.” Ko te hala fuli ʼo te ʼu meʼa ʼaia ʼe mole feala ke tuku pe kia ia ʼaē ʼe logo tokotahi. ʼI ʼihi potu ʼo te malamanei, ko te lahi ʼo te tautau fetogi nofoʼaga, te mavete ʼo te ʼu famili, te ʼu kolo heʼeʼofa pea mo tuʼutāmakiʼia, pea mo te hā lelei ʼo te siʼisiʼi ʼo te temi ʼāteaina, ko te ʼu meʼa fuli ʼaia ʼe kau ki te faigataʼa ʼaē ke taupau ʼo fualoa he kaumeʼa.
ʼI totatou temi, ʼi he vāhaʼa e tahi, ʼe feala ke felāveʼi te hahaʼi ʼo he kolo mo he kaugamālie ʼi he tagata ʼo te 18 sēkulō ʼaē neʼe feala ke sio kiai ʼi he taʼu katoa peʼe ʼi tona maʼuli katoa! Kae, ko te fakakaumeʼa ia ʼaho nei, ʼi ʼihi temi, ʼe mole loloto. Tokolahi ʼe nātou kau tuʼumaʼu ki te ʼu fakatahi pea mo faiga ke nātou fakafiafia ʼi te temi ʼaia. ʼE mahino papau ia kia tatou, ko te ʼu fakafiafia ʼaē ʼe mole hona ʼuhiga ʼi te filifili kovi ʼo te ʼu fakakaugā, ʼe hage ko te ʼai ʼo te ʼakau talatala ki te afi. ʼE ʼui fēnei ia Tagata Tānaki 7:5, 6: “Ko te logo ki te fakatonutonuʼi mai he tahi ʼe poto, ʼe lelei age ia ʼi te tagata ʼaē ʼe fagono ki te hiva ʼa te kau vavale. He ohage pe ko te logoaʼa ʼo te ʼu ʼakau talatala ʼi te lalo kulo, ʼe tatau pea mo te kata ʼo ia ʼaē ʼe vale; pea ko te meʼa ʼaia ʼe toe vaʼiganoa mo ia.” Ko te ʼu ʼakau talatala ʼe ulo vave ʼi te afi pea mo logoaʼa, kae ʼe mole feʼauga ia moʼo fakamāfanaʼi ʼo tatou. ʼO toe feiā, ko te logoaʼa, mo te ʼu kakata ʼi te ʼu fakakaumeʼa ʼe feala ke tou fiafia faka temi ai, kae ʼe mole nātou pulihi katoa te logo tokotahi pea mo tali ki tatatou fia maʼu he ʼu kaumeʼa moʼoni.
Ko te nofo tokotahi ʼe kehekehe ia mo te logo tokotahi. Ko te nofo tokotahi ʼe ʼaoga kia tatou moʼo fakamālohiʼi ʼo tatou pea feala ai leva ke tou liliu ko he ʼu kaumeʼa lelei. ʼI tanatou tau mo te logo tokotahi, tokolahi ʼe nātou haga atu aipe ki te ʼu fakafiafia faka masini. Neʼe maʼu e te tahi sivisivi ko te meʼa ʼaē ʼe tau fai ʼi te logo tokotahi, ko te sioʼi ʼo te televisio. Pea tahi ʼaē, neʼe ʼui e te kau tagata kumi, ko te sioʼi fualoa ʼo te televisio ʼe ko te meʼa ʼaia ʼaē ʼe kovi age ia ʼi te ʼu meʼa ʼaē ʼe feala ke tou fai mokā ʼe tou logo tokotahi. ʼE fakaloto mālohi e te faʼahi ʼaia te lotonoa, te piko, pea mo te moemisi, ʼo liliu ai ko he fetogi kovi ʼo te ʼu felogoi mo ʼihi age.
ʼI tona fakahagatonu, ko te nofo tokotahi ʼe feala ke maʼuhiga mo kapau ʼe tou fakaʼaogaʼi te temi ʼaia ʼaē ʼe tou nonofo tokotahi ai ke tou tuputupu. ʼE lagi feala ke tou fai te faʼahi ʼaia ʼaki te lautohi, mo te faitohi ki te hahaʼi, mo te fai ʼo he ʼu meʼa, pea mo tou mālōlō. Ke ʼaoga te nofo tokotahi, ʼe kau kiai te faikole ki te ʼAtua, mo te ako pea mo metitasioʼi ʼo te Tohi-Tapu. (Pesalemo 63:6) Ko te ʼu faʼahiga fai ʼaia ke tou vāhaʼa lelei mo Sehova ʼAtua, ia ia pe ʼaē ʼe feala ke liliu ko totatou Kaumeʼa ʼaē ʼe lahi tokotahi.
Ko He ʼu Faʼifaʼitaki Faka Tohi-Tapu ʼo Te ʼu Fakakaumeʼa
Logope la ʼe lelei te fakakaumeʼa mo ni ʼu hahaʼi tokolahi, ʼe fakamanatuʼi mai kia tatou e te Tohi-Tapu “ ʼe ʼi ai te kaumeʼa ʼe pipiki mālohi age ia ʼi he tēhina.” (Tāʼaga Lea 18:24) ʼE ʼaoga kia tatou fuli he ʼu kaumeʼa lelei ʼe nātou tokakaga moʼoni kia tatou, he ʼu fakakaumeʼa ʼe nātou foaki mai te fiafia, te mālohi pea mo te tokalelei. Logope la ko te ʼu taʼi fakakaumeʼa ʼaia ʼe mole ko he meʼa māhani ʼi te temi nei, ko ni ʼu faʼifaʼitaki ʼo te temi muʼa neʼe fakatokagaʼi tāfito ʼi te Tohi-Tapu. Ohage la, neʼe ʼi ai te fakakaumeʼa makehe ia Tavite pea mo Sonatane. Koteā ʼaē ʼe feala ke tou ako mai ai? He koʼe neʼe fualoa tanā fakakaumeʼa?
ʼUluaki, neʼe maʼu e Tavite pea mo Sonatane he ʼu manatu maʼuhiga ʼo nā felogoi tahi kiai. Ia meʼa fuli, neʼe nā atolasio fakamalotoloto kia Sehova ʼAtua. ʼI tana fakatokagaʼi te tui ʼa Tavite ki te ʼAtua pea mo tana ʼu gāue ʼo hāofaki te hahaʼi ʼa Sehova, “neʼe kamata pipiki ai te nefesi ʼo Sonatane ki te nefesi ʼo Tavite, pea neʼe kamata ʼofa ai ia Sonatane kia te ia ohage ko tona nefesi totonu.” (1 Samuele 18:1) Koia, ko te ʼofa ki te ʼAtua ʼe tokoni ki te fepipikiʼaki maʼu ʼo he ʼu kaumeʼa.
Ko Sonatane pea mo Tavite neʼe ko te ʼu hahaʼi mālohi neʼe mulimuli ki te ʼu pelesepeto fakaʼatua. Neʼe feala ai ke nā fefakaʼapaʼapaʼaki. (1 Samuele 19:1-7; 20:9-14; 24:6) ʼE tapuakina tatou mo kapau ʼe tou maʼu he ʼu kaumeʼa ʼe aga faka lotu ʼe takitaki e te ʼu pelesepeto ʼa te Tohi-Tapu.
Ko te tahi ʼu tupuʼaga neʼe kau ki te fakakaumeʼa ʼa Tavite pea mo Sonatane. Neʼe fakahagatonu pea mo moʼoni tanā ʼu felogoi, pea neʼe nā tahi fefakamatalaʼaki te ʼu meʼa ʼaē neʼe ʼi tonā ʼu loto. Neʼe fakamuʼamuʼa e Sonatane te ʼu meʼa ʼa Tavite ʼi tana ʼu meʼa totonu. Neʼe mole fuaʼā ʼi te fakapapau age ʼaē kia Tavite te tuʼulaga hau; kae neʼe lagolago ia Sonatane kia Tavite ki te ʼu meʼa ʼaē neʼe ina logoʼi ʼi tona loto pea mo te faʼahi fakalaumālie. Pea neʼe tali e Tavite tana tokoni. (1 Samuele 23:16-18) ʼI he ʼu ʼaluʼaga ʼe tau mo te Tohi-Tapu, neʼe tahi fefakahāʼaki e Tavite pea mo Sonatane te ʼu meʼa ʼaē neʼe nā logoʼi. Ko tanā fakakaumeʼa aga faka lotu neʼe fakatafito ki tanā feleleiʼiaʼaki moʼoni pea mo te ʼofa. (1 Samuele 20:41; 2 Samuele 1:26) Neʼe mole feala ke fakagata tanā fakakaumeʼa he neʼe nonofo agatonu te ʼu tagata ʼaia e lua ki te ʼAtua. ʼI tatatou maʼuliʼi te ʼu taʼi tokoni ʼaia, ʼe feala ke tokoni kia tatou ke tou fakatuputupu pea mo taupau he ʼu fakakaumeʼa moʼoni.
ʼE Feafeaʼi Te Maʼu ʼo He ʼu Fakakaumeʼa
ʼE koutou kumi koa he ʼu kaumeʼa moʼoni? ʼE mole ʼaoga ke koutou kumi mamaʼo. Ko ʼihi ia nātou ʼaē ʼe fakatahi mo koutou ʼe feala ke nātou liliu ko hokotou ʼu kaumeʼa, pea ʼe lagi ʼaoga kia nātou ke nātou fakakaumeʼa mo koutou. Tāfito ʼo ʼuhiga mo te ʼu fakakaugā faka Kilisitiano, ʼe ko he aga poto te faka ʼuhiga kia nātou te tokoni ʼa te ʼapositolo ko Paulo ke tou “faka fālahi.” (2 Kolonito 6:11-13) Kae, ʼaua naʼa koutou ʼiʼita mo kapau ko takotou ʼu faiga fuli ʼaē ke koutou maʼu he ʼu kaumeʼa ʼe mole iku ki he ʼu noʼo ʼe loloto. ʼI te agamāhani, ʼe tonu ke ʼi ai he temi ke fakatuputupu ai te fakakaumeʼa, pea ʼe mole tatau anai te loloto ʼo te ʼu felogoi fuli. (Tagata Tānaki 11:1, 2, 6) ʼE mahino ia, ko te fiafia ʼi he fakakaumeʼa moʼoni, ʼe mole tonu ke tou manatu pe kia tatou, kae ʼe ʼaoga ke tou mulimuli ki te tokoni ʼa Sesu, ʼaē neʼe ina ʼui fēnei: “Koia, ko te meʼa fuli pe ʼe koutou loto ke fai e te hahaʼi maʼa koutou, ʼe maʼua foki mo koutou, ke koutou toe fai feiā maʼa nātou.”—Mateo 7:12.
Ko ai ʼaē ʼe ʼaoga ki ai takotou fakakaumeʼa? ʼO mole gata pe kia nātou ʼaē ʼe taʼu tahi mo koutou, e feafeaʼi koa ʼo ʼuhiga mo te hahaʼi tūpulaga peʼe ko nātou ʼaē kua matutuʼa? Ko te fakakaumeʼa ʼa Tavite pea mo Sonatane, ʼa Lute pea mo Naomi, pea mo Paulo mo Timoteo, neʼe kau ai te ʼu hahaʼi neʼe taʼu kehekehe. (Lute 1:16, 17; 1 Kolonito 4:17) ʼE feala koa ke koutou faka fālahi takotou fakakaumeʼa ki te ʼu fafine vitua pea mo ʼihi ʼu hahaʼi ʼe mole heʼeki ʼohoana? Koutou manatuʼi foki mo te ʼu hahaʼi foʼou ʼaē ʼe koutou vāhaʼa fale. Neʼe lagi nātou tuku tanatou fakatahi mo te tokolahi peʼe ko tanatou ʼu kaumeʼa fuli, ʼi tanatou mavae mai he koga meʼa peʼe ko tanatou fetogi tonatou faʼahiga maʼuli. ʼAua naʼa koutou atalitali ke ʼōmai niʼihi kia koutou. Kapau ko koutou ko he Kilisitiano, koutou fai ke fualoa te ʼu fakakaumeʼa, ʼo koutou maʼuliʼi te tokoni ʼaenī ʼa Paulo: “ ʼO ʼuhiga mo te ʼofa fakatautehina, ke koutou femaʼuʼaki he ʼoʼofa ʼe loloto. ʼO ʼuhiga mo takotou fefakaʼapaʼapaʼaki, koutou tuku he faʼifaʼitaki.”—Loma 12:10.
Kia tatou ko te fakakaumeʼa ʼe feala ke faka ʼuhiga ko he fia foaki. Neʼe ʼui e Sesu mo kapau ʼe tou maʼuliʼi te fia foaki, ʼe foaki mai anai e te hahaʼi kia tatou. Neʼe ina toe faka maʼuhigaʼi foki te lahi age ʼo te manuʼia ʼi takita foaki, ʼi takita tali. (Luka 6:38; Gāue 20:35) Neʼe koutou fetaulaki koa mo ni ʼu hahaʼi neʼe ʼōmai mai he ʼu faʼahiga maʼuli kehekehe? Ko te ʼu fakatahi faka malamanei ʼa te kau Fakamoʼoni ʼa Sehova neʼe fakahā ai ko te hahaʼi mai te ʼu fenua kehekehe ʼe feala ke nātou faʼufaʼu he ʼu fakakaumeʼa ʼe moʼoni pea mo fualoa, ʼi tanatou tauhi fuli ki te ʼAtua.
Koutou Taupau Ke Lelei Takotou ʼu Fakakaumeʼa
Meʼa fakaʼofaʼofa, ko nātou ʼaē ʼe nātou lau ko ni ʼu kaumeʼa ʼe nātou fefakatupuʼaki ʼi ʼihi temi te lotomamahi. Ko he palalau fakatupu kovi, mo te fakahā ʼo te ʼu meʼa ʼaē neʼe tou fakamatala age, te puli ʼo te feleleiʼiaʼaki—ko te ʼu meʼa ʼaia ʼe kau ki te ʼu meʼa ʼaē ʼe fakamamahi lahi ai mokā ʼe tupu te faʼahi ʼaia mai he tahi neʼe tou ʼui ko hotatou kaumeʼa moʼoni. Koteā ʼaē ʼe feala ke fai ʼi he ʼu taʼi ʼaluʼaga feiā?
Koutou tuku he faʼifaʼitaki lelei. Koutou fai ia meʼa fuli ke koutou tekeʼi te fakatupu ʼo he lotomamahi ʼe mole hona ʼaoga. ʼI ʼihi ʼu potu, ʼe ko he meʼa māhani te fakalainoaʼi e he ʼu kaumeʼa te ʼu vaivaiʼaga ʼo he tahi age. Ko he gaohi koviʼi peʼe ko he kākāʼi ʼo he ʼu kaumeʼa ʼe mole nā fefakatahi leleiʼaki, logope peʼe lau ko he “gaoʼi.”—Tāʼaga Lea 26:18, 19.
Koutou gāue mālohi moʼo taupau ʼo te ʼu fakakaumeʼa. ʼE tupu te ʼu manatu hala ʼi te temi ʼaē ʼe lahi fau ai te ʼu meʼa ʼaē ʼe nā feʼamanakiʼaki. Ko he kaumeʼa ʼe mahaki peʼe loto tuʼania ʼuhi ko he fihifihia maʼuhiga, ʼe lagi mole feala anai ke ina fakahā he loto māfana ohage ko te agamāhani. Koia, ʼi te ʼu temi ʼaia, koutou faiga ke koutou lotomahino pea mo tokoni kia ia.
Koutou fakatokatoka fakavilivili pea mo fakalelei te ʼu fihifihia. Koutou fai te faʼahi ʼaia ia koulua toko lua pe mokā ʼe feala. (Mateo 5:23, 24; 18:15) Koutou vakavakaʼi lelei peʼe mahino tokotou kaumeʼa ʼe koutou fia taupau he ʼu felogoi lelei. Ko he ʼu kaumeʼa moʼoni ʼe nā fefakamolemoleʼaki. (Kolose 3:13) ʼE koutou fia liliu koa ko he kaumeʼa feiā—he tahi ʼe pipiki mālohi age ia ʼi he tēhina?
Ko te lau peʼe ko te fakakaukau ʼo ʼuhiga mo he ʼu fakakaumeʼa ʼe ko te kamataʼaga pe ia. Kapau ʼe tou logo tokotahi, tou fai te aga ʼaē ʼe tau, pea ʼe mole tou nofo tokotahi anai ʼo fualoa. Kapau ʼe tou faiga, ʼe feala ke tou maʼu he ʼu kaumeʼa moʼoni. ʼE tou faʼufaʼu anai he ʼu noʼo makehe, mo ʼihi ia nātou. Kae ʼe mole feala ki he tahi ke ina fetogi te ʼAtua, te Kaumeʼa ʼaē ʼe lahi tokotahi. ʼE gata pe kia Sehova ʼaē ʼe feala ke ina ʼiloʼi, mo mahino, pea mo tokoni kia tatou. (Pesalemo 139:1-4, 23, 24) Pea tahi ʼaē, ʼe foaki mai e tana Folafola te ʼamanaki fakatalakitupua ʼo ʼuhiga mo te temi ka haʼu—he mālama foʼou ʼaē ʼe feala ai ke tou maʼu he ʼu kaumeʼa moʼoni ʼo heʼegata.—2 Petelo 3:13.
[Paki ʼo te pasina 5]
Neʼe fiafia ia Tavite pea mo Sonatane ʼi tanā fakakaumeʼa moʼoni, pea mo toe feiā pe mo tatou