Ko Te Fakatahi Faka Tisitilike ʼe Ina Uga Tatou Ke Tou Haʼele Mo Te ʼAtua

ʼI te Fakatahi Faka Tisitilike ʼaē ko tona kupu tāfito “Tou Haʼele Mo Te ʼAtua,” neʼe talanoa ai ki te fakatotonu fēnei ʼa Sehova: “Koʼeni te ala. Koutou haʼele ai.” (Isa. 30:21) Ko te maʼuliʼi ʼo te ʼu tokoni ʼaē neʼe foaki mai ʼe tokoni mai anai ke tou ‘tokakaga fakalelei ki tatatou faʼahiga haʼele.’ (Ef. 5:​15) Kapau ʼe tou metitasioʼi te ʼu meʼa ʼaē neʼe tou ako, pea ʼe tokoni mai anai ke tou “haga haʼele ʼi te moʼoni.”​—3 Soa. 3, MN.

Koutou fakaʼaogaʼi te ʼu fehuʼi ʼaenī ʼo fakatahi mo takotou ʼu nota moʼo teuteuʼi pea mo tali ki te fakamanatu ʼo te polokalama ʼo te fakatahi ʼo te taʼu ʼaenī. ʼE fai anai te fakamanatu ʼi te Fono Gāue ʼo te vāhaʼa ʼe kamata ʼi te ʼaho 18 ʼo ʼOketopeli.

1. Neʼe lava haʼele feafeaʼi ia Enoke mo te ʼAtua logola tana maʼuli ʼi he ʼu temi maveuveu? (Hep. 11:​1, 5, 6; Suta 14, 15; “Tou Haʼele Mo Te ʼAtua ʼi He ʼu Temi Maveuveu”)

2. Ko te ʼu faʼahi fea ʼo te maʼuli ʼaē ʼe feala ke tou maʼuliʼi ai te pelesepeto ʼaē ʼe tuʼu ia Luka 16:10? (“ ʼE Koutou ‘Agatonu Koa ʼi Te ʼu Meʼa Liliki’?”)

3. (a) Koutou fakahā he ʼu ako e fā ʼe feala ke tou tāʼofi mai ia Osea kapite 6 ki te 9 ʼe tokoni mai anai ke tou haʼele mo te ʼAtua. (Osea 6:​6, 7; 7:​14; 8:7) (b) Koteā te tahi ʼu manatu ia Osea kapite 10 ki te 14 ʼe tokoni mai anai ke tou haʼele mo te ʼAtua? (Ko he akonaki ʼe koga tolu, ko tonatou kupu tāfito “Ko Te Lea Faka Polofeta ʼo Osea ʼe Tokoni Mai Ke Tou Haʼele Mo Te ʼAtua”)

4. Koteā te ʼu meʼa ʼe feala ke fai e te ʼu taumatuʼa Kilisitiano moʼo taupau tanatou nofo ʼohoana ke mālohi? (Taag. 12:4; Ef. 5:​29; “Ke ʼAua Naʼa Koutou Veteki ‘Te Meʼa ʼAē Neʼe Haʼi Fakatahi e Te ʼAtua Ki Te ʼAkau ʼAmo’ ”)

5. ʼE tou lava fakahā feafeaʼi tatatou fakaʼapaʼapa ki tatatou ʼu fakatahi taputapu? (Tnk. 5:1; Isa. 66:23; “Tou Fakaʼapaʼapa Ki Tatatou ʼu Fakatahi Taputapu”)

6. (a) Koteā te ʼu faʼahi maʼuhiga e tolu ʼo tatatou gāue fai faka mafola ʼe tonu ke tou vakavakaʼi ke tou ʼiloʼi papau ia te maʼuhiga ʼaē ʼo tatatou kau kiai? (Isa. 52:7; Sakl. 8:​23; Mko. 6:​34) (b) ʼI te kaupepa Une bonne nouvelle pour des gens de toutes nations koteā ʼihi ʼu faʼahi ʼe koutou tokagaʼi ʼe ʼaoga tāfito? (“Ko He Logo Lelei Ki Te Hahaʼi ʼo Te ʼu Puleʼaga Fuli”; “Tou Tokoni Ki Te Hahaʼi ʼAē ʼe Palalau ʼi He Tahi Lea”)

7. ʼE tou lava tokoni feafeaʼi kia nātou ʼaē kei foʼofoʼou ke nātou loto falala mokā nātou faka mafola ia te logo ʼo te Puleʼaga? (Ktf. 7:​17; “ ʼI Tanatou Tokoni Ki He Kaugamālie Ke Nātou Kau Mo Tatou ʼi Te Minisitelio”)

8. ʼE tou lava fakahā feafeaʼi tatatou tui papau ʼaē “ko te ʼaho lahi ʼo Sehova kua ōvi mai”? (Sofo. 1:​14; “Tou Haʼele ʼAki Te Tui, Kae Mole ʼAki Te Sio”)

9. (a) He koʼe ʼe kovi hatatou tūkia pea mo fakatupu tūkia? (Mko. 9:​42-​48) (b) Koteā ʼaē ʼe tonu ke tou fai ke mole tou tūkia? (Pes. 119:165) (c) Koteā ʼaē ʼe feala ke tou fai ke mole tou fakatupu tūkia ki niʼihi? (1 Ko. 10:24; “Ke ʼAua Naʼa ʼi Ai He Meʼa ‘ ʼE Fakatupu Tūkia’ ”)

10. He koʼe ʼe tonu ke tou aga fakapotopoto mokā tou kumi hotatou ʼohoana, mokā tou fia puipui ia tatou mai te mahaki, pea mokā tou fai koloā? (Pes. 26:4; Mat. 6:​25; 1 Tim. 6:9; “Koutou Katoa ʼi Te Aga Fakapotopoto”)

11. (a) Koteā ʼaē ʼe tou tokagaʼi ʼo ʼuhiga mo Sesu, ʼi te ʼu temi ʼaē neʼe fakaafe ai ia ia? (Luka 10:42; 24:32) (b) Koteā ʼaē ʼe feala ke tou fai ʼi totatou ʼu temi fakafiafia ke tou maʼu ai he loto mālohi ʼo feiā mo nātou ʼaē ʼe kau ai? (1 Ko. 10:31-​33; “Ko He ʼu Gāue Lelei ʼe Fakaloto Mālohi”)

12. ʼO mulimuli kia Pesalemo 23, koteā te ʼu tapuakina ʼe tou maʼu e tatou ʼaē ko te ʼu ōvi ʼa Sehova, pea koteā totatou ʼu maʼua? (1 Ko. 10:21; “Ko Sehova ʼe Ko Totatou Tauhi Ōvi”)

13. ʼE mulimuli feafeaʼi te kau Kilisitiano ki te tokoni fakaʼatua ʼaē ʼe ina ʼui ke tou ‘toʼo te faigamālie ʼo te temi’? (Ef. 5:​16; “Tou Toʼo Te Faigamālie ʼo Te Temi”)

14. (a) Koteā ‘te hola ʼo te fakamāu’ ʼaē ʼe tuʼu ia Apokalipesi 14:7? (b) ʼE tou fakamoʼoni feafeaʼi kua tou mavae moʼoni mai ia Papiloni Lahi? (“ ‘Koutou Nonofo ʼAlaʼala’—Kua Hoko Mai Te Hola ʼo Te Fakamāu”) (c) Koteā te ʼu manatu neʼe koutou leleiʼia ʼi te kaupepa Veillez ! (Koutou Nonofo ʼAlaʼala)?

15. Koutou fakahā mai he ʼu kalitate e tolu ʼe ʼaoga kia tatou ke ʼaua naʼa tou “mavae ʼi te ala foufou ʼaē ʼe totonu.” (2 Pet. 2:​15, MN; “ ʼAua Naʼa Tou ‘Mavae ʼi Te Ala Foufou ʼAē ʼe Totonu’ ”)

16. Koteā ʼaē ʼe tonu ke fai e te kau tūpulaga ke nātou mamaʼo mai “te ala ʼa te kau agakovi”? (Taag. 4:​14; “Kau Tūpulaga, Koutou Haʼele ʼi Te ʼAla ʼo Te Faitotonu”)

17. (a) Ko te ʼu faʼahi fea ʼaē neʼe tuku mai ai e Paulo ia he faʼifaʼitaki lelei ʼo ʼuhiga mo te faʼa kātaki? (Gaue 14:19, 20; 16:25-​33) (b) He koʼe ʼe mole tonu ke tou matataku ʼi te hahaʼi ʼaē ʼe fakafeagai ki te tauhi moʼoni? (Ko te kiʼi gaoʼi pea mo te akonaki “Tou Fakahoko Katoa Te Fai Faka Mafola Ia ʼAho Nei Logola Te ʼu Fakafeagai”)

18. Koteā te ʼu tapuakina ʼe maʼu e nātou ʼaē ʼe haʼele mo te ʼAtua? (“Ko Nātou ʼAē ʼe Haʼele Mo Te ʼAtua ʼe Nātou Maʼu He ʼu Tapuakina, ʼi Te Temi Nei Pea ʼo Talu Ai”)

ʼOfa pe ke tou loto papau ʼo tokagaʼi ‘te folafola ʼaē ʼe logo mai ʼotatou tuʼa,’ ke tou haʼele ʼo talu ai mo tatatou Tāmai ʼaē ʼe ʼi selo.​—Isa. 30:21; Soa. 3:​36.