Ko He ʼAta ʼe Maʼu Ai Te Logo Ki Totatou Temi
Koteā te logo ʼaē ʼe tou maʼu ʼi te foʼi ʼata ʼaē ko tona kupu tāfito David : il mettait sa confiance en Dieu ? Ko tatou, ohage pe ko Tavite, ʼe tonu ke tou falala kiā Sehova. (Pes. 91:2) Ko te sioʼi ʼo te ʼu meʼa maʼuhiga ʼaē neʼe hoko ʼi te maʼuli ʼo Tavite, ʼe tokoni anai ki te fānau pea mo nātou lalahi ke nātou tāʼofi he ako mai te faʼifaʼitaki lelei ʼa te tagata ʼaia. (Pes. 31:14) Pea ʼe ʼi ai te tahi ʼu meʼa ʼe lelei kiā tatou ʼi te foʼi ʼata ʼaia, ko tana “quiz” (te ʼu fehuʼi) pea mo te tahi ʼu “activités éducatives” (ko he ʼu akoako).
Koutou sioʼi te ʼata ʼaia, pea koutou fai kiā koutou te ʼu fehuʼi ʼaenī: (1) He koʼe neʼe fili e Sehova he hau ʼe lelei age? (1 Sam. 15:10, 11; 16:1) (2) He koʼe neʼe mole ina fili he tahi ʼi te ʼu tēhina ʼo Tavite? (1 Sam. 16:6, 7) (3) He koʼe neʼe leleiʼia e Saulo te tā alepa ʼo Tavite? (1 Sam. 16:14-23) (4) Neʼe ko ai ia Koliate? (1 Sam. 17:4-10) (5) He koʼe neʼe fia tauʼi e Tavite ia Koliate? (1 Sam. 17:23, 24, 36, 37) (6) Neʼe ko ai ia Sonatane? (1 Sam. 14:1) (7) Neʼe lahi feafeaʼi te fehiʼa ʼa Saulo ki tona fili tāfito ko Tavite? (1 Sam. 18:25-29) (8) He koʼe neʼe mole matehi e Tavite ia Saulo? (1 Sam. 26:7-11) (9) Neʼe mate feafeaʼi ia Saulo? (1 Sam. 31:1-6) (10) Neʼe malave feafeaʼi kiā Tavite ia te mate ʼo Sonatane? (2 Sam. 1:11, 12) (11) Koteā te fakapapau ʼaē neʼe fai e Sehova kiā Tavite? (2 Sam. 7:12, 13, 16) (12) Koteā te agahala mamafa ʼaē neʼe fai e Tavite? (2 Sam. 11:1-5, 14-17) (13) Neʼe fakahā feafeaʼi e Tavite tana fakahemala moʼoni ʼo ʼuhiga mo te meʼa ʼaē neʼe ina fai? (Pes. 51) (14) Koteā te ʼu tokoni ʼaē neʼe foaki e Tavite kiā Salomone, ʼaē neʼe kei tūpulaga? (1 Hau 2:1-4; 1 Fkma. 22: 6-13; 28: 9, 10) (15) ʼI te temi pule ʼa Sesu, koteā te ʼu tapuakina ʼaē ka maʼu anai e Tavite, mo Sonatane pea mo koutou?—Isa. 11:6-9; Soa. 11:25, 26.
Koutou fakakaukauʼi ia te fehuʼi ʼaenī: ʼE au lava faʼifaʼitakiʼi feafeaʼi te falala ʼa Tavite ki te ʼAtua?
ʼU mātuʼa, koutou akoʼi ki takotou ʼu fānau te maʼuhiga ʼaē ke nātou falala tuʼumaʼu ki te ʼAtua, ohage ko tona fai e Tavite.—Pes. 56:11.