Te Polokalama Faka Famili—Ki Te Fai Faka Mafola Faka Famili
1 ʼE fiafia ia Sehova ʼi tana sio ki te kau tūpulaga ʼe nātou fakavikiviki tona huafa. (Pes. 148:12, 13) ʼI te temi ʼo Sesu māʼiape la mo ‘te kihiʼi tamaliki pea mo nātou ʼaē ʼe kei meamea, neʼe nātou fakavikiviki’ ki te ʼAtua. (Mat. 21:15, 16) ʼE toe feiā pe ia ʼaho nei. ʼU mātuʼa, e feafeaʼi hakotou tokoni ki takotou fānau ke nātou faʼafai ʼo fakavikiviki ia Sehova ʼi te minisitelio faka Kilisitiano? Ohage pe ko tona fakahā ʼi te alatike ʼo ʼuhiga mo te ʼu fono ʼo te kokelekasio, ʼe maʼuhiga ʼaupito ke koutou tuku he faʼifaʼitaki lelei kiā nātou. Neʼe ʼui e te tāmai te manatu ʼe teitei maʼu e te ʼu mātuʼa fuli: “ʼE mole mulimuli te fānau ki te ʼu meʼa ʼaē ʼe koutou ʼui age, kae ʼe nātou mulimuli ki te ʼu meʼa ʼaē ʼe koutou fai!”
2 ʼE ʼui fēnei e te tuagaʼane neʼe taupau e tanā ʼu mātuʼa Fakamoʼoni: “ʼE mole ʼi ai he Moeaki ʼe mātou ʼaʼala ake ʼo feʼekeʼaki peʼe tonu ke mātou ʼolo ʼo fai faka mafola. Neʼe mātou ʼiloʼi lelei ʼe tonu ke mātou ʼolo ʼo fai faka mafola.” ʼO toe feiā pe, ʼe tonu ke sio takotou fānau ʼe maʼuhiga ia te fai faka mafola mo kapau ʼi te vāhaʼa fuli, ʼe ko hakotou agamāhani takotou fai faka mafola faka famili. ʼE feala ai ki takotou fānau ke nātou sio ki takotou faʼifaʼitaki, pea mo koutou pe foki ke koutou sio ki tanatou ʼu agaaga pea mo tonatou ʼu fealagia.
3 Te Ako ʼe Foaki Māmālie: Ke leleiʼia te fai faka mafola e te fānau, ʼe tonu ke koutou akoako nātou ke feala hanatou fai faka mafola lelei. Ko te tuagaʼane ʼaē neʼe tou talanoa ki ai, neʼe ina ʼui fēnei: “Neʼe mole mātou fia mulimuli feiā pe ki tamatou ʼu mātuʼa ʼi tanā fai faka mafola. Neʼe mahino kiā mātou ʼe tonu ke mātou kau kiai, tatau aipe peʼe ko te lomi ʼo te meʼa tatagi ʼo te ʼu matapā peʼe ko te tuku pe ʼo he kiʼi pepa lotu ki te hahaʼi. Neʼe mātou teuteu lelei ki te ʼu gāue fai faka mafola ʼaē ka fai ʼi te fakaʼosi vāhaʼa, ke feala hamatou ʼiloʼi te ʼu meʼa ʼaē ka mātou talanoa kiai.” ʼE feala ke koutou akoako feiā takotou fānau, ʼo koutou toʼo he ʼu kiʼi minuta ʼi te vāhaʼa fuli lolotoga te ako faka famili, peʼe ʼi he tahi age temi, ʼo teuteuʼi nātou ki te minisitelio.
4 Ko te fai faka mafola faka famili ʼe ko he tahi ʼaia faigamālie moʼo akoʼi te moʼoni ki takotou fānau. Ko te tāmai Kilisitiano neʼe ina ʼave mo ia tona ʼofafine ʼo nā haʼele ia kilometa e 10 moʼo tufa te ʼu kiʼi pepa lotu ki te ʼu kolo. ʼE ʼui fēnei e tona ʼofafine: “ʼI te ʼu temi ʼaia neʼe mā haʼele ai neʼe fakahū e taku tāmai te moʼoni ki toku loto.” (Teu. 6:7) ʼOfa pe ke toe tapuakinaʼi mo koutou ʼi takotou kau ki te fai faka mafola faka famili ʼi te vāhaʼa fuli.